«خلي بالك».. هتتعاملي ازاي لما تركبي تاكسي؟
التاكسي.. وسيلة مواصلات كل واحدة مننا بتستخدمها كل يوم ومن كتر ما بنكون مستعجلين اننا نروح مشاورنا مش بناخد بالنا من كذا حاجة، والحاجة دي هى الي هنكلمكو عنها النهاردة.
أول حاجة
اسأليه العداد شغال ولا لأ عشان تضمني ان ميضحكش عليكي ويقولك أجرة من دماغه حتى لو كان مشوارك صغير.
تاني حاجة
لو قالك شغال اركبي و خليكي بصة على العداد ولو لقتيه انه لسة معمول على سعر العداد القديم 2,30جنيه ، قدري مشوارك هيكون بكام وادفعي اللي انتي شايفاه صح.
تالت حاجة
العداد بيبدأ ب 3 جنيه وكل كيلو متر بعد كدة بيبقى ب 140 قرش وكل دقيقة انتظار بتبقى ب25 قرش وعشان كدة تكاليف المشوار بتزيد 28 قرش مع كل 200 متر بيمشيه السواق إضافة لدقايق الإنتظار، وعشان كدة خليكي متابعة العداد عشان تتأكدي انه ماشي على حسب الأرقام ديه.
لأن فيه بعض السواقين بيلعبوا في العداد وبيزودوا التسعيرة بحيث تزيد 28 قرش كل مسافة أقل عن المسافة القانونية يعني كل 180 متر أو 100 متر أو أقل في بعض الأحيان.
رابع حاجة
في عربيات ملاكي كتير بقت تحول نفسها لتاكسي وعشان تعرفي تفرقي بينهم فهتلاقي ان الملاكي اللي قالب العربية بتاعته تاكسي لوحة النمر بتاعته أزرق في أبيض. أما التاكسي فهتلاقي لوحة النمر بتاعته برتقاني في أبيض.
خامس حاجة
مشي التاكسي على كيفك ومتخليهوش أبداً يمشيكي على كيفه، يعني خليكي عارفة عنوان المكان اللي انتي رايحة له كويس ومتخليهوش هو اللي يوديكي بالوصف بتاعه عشان لاقدر الله ما يحصلش حاجة.
