كلمات أجنبية بنقولها بتاتش مصري.. تعرف عليها
فيه كلمات أجنبية بنستخدمها في حياتنا اليومية البعض منا ميعرفش إن أصلها أجنبي. الكلمات دي هنرصدها في الموضوع ده وهنشوف كمان هل فيه كلمات مرشحة إنها تدخل معجم اللغة العربية ولا لأ؟
كلمات في الحياة اليومية
رئيس تحرير موقع «اكتب صح» حسام مصطفى إبراهيم بيقول إن كلامنا كله مليان بالكلمات الأجنبية ومن الكلمات دي: استراتيجية، ديمقراطية، امبريالية، تليفون، تليفزيون، شوفونية.
متعقد من الإنجليزي؟.. 6 مواقع لكورسات تعليمية بالعربي
التاتش المصري
بجانب الكلمات الأجنبية اللي فيه ناس متعرفش أن أصلها أجنبي من كتر ما هي بقت متداولة في لغتنا فيه كلمات تانية معروف إن أصلها أجنبي، و«إبراهيم» بيقول عليها إن المصري ضاف على الكلمات دي التاتش بتاعه وبقي يقول مثلًا «هرستر» الكمبيوتر بدل هعمل Restart للكمبيوتر.
وبيقول «إبراهيم» إن «هو طبعًا التاتش ده مش صح لكن من وجهة نظر الشخص اللي بيقولوا فشايف إن ده أسهل ليه».
شروط المعجم
وبيقول «إبراهيم» إن من ضمن شروط المعجم في إنه يدخل كلمة أجنبية المعجم إنها تكون مفهومة وليها وزن زي مثلًا تليفزيون اللي أوزانها في المعجم تلفز، تلفزة، متلفز.
الفرق بين الإنجليزي الأمريكي والبريطاني.. إيه الأفضل؟
كلمات هيتم إضافتها في المعجم
الباحث المساعد في مجمع اللغة العربية مصطفى يوسف بيقول إن فيه كلمات مستخدمة في لغة الشباب بيتم التفكير فيها حاليًا إنها تتعرب وتدخل في معجم اللغة العربية، ويتم الإشارة إلى أن أصلها أجنبي ومن الكلمات دي «شير» من كلمة «share»، و«دلت» من كلمة Delete ، و«هنج» وغيرها من الكلمات.
وبيقول: «لما بنقف قدام أي كلمة أجنبية وبنشوف إذا كان ممكن ندخلها المعجم ولا لأ ده بيكون بناء على إن الكلمة الأجنبية هل ليها مقابل في اللغة العربية على وزن عربي صحيح ولا لأ، ولو ملقيناش ليها مقابل عربي بنقوم بتعريبها بمعنى إننا بناخد الكلمة ونحطها في معجم اللغة العربية وبيتم الإشارة إلى إنها أصلها أجنبي».
وبيضيف «يوسف» إن: «فيه كلمات أجنبية زي استراتيجية وديمقراطية دخلت معجم اللغة العربية زي ما هي بترتيب حروفها، وحولناها لوزن عربي صحيح».
أمثلة لكلمات أجنبية في حياتنا
ومن أبرز الكلمات اللي بنستخدمها في حياتنا اليومية كلمة «أتوماتيكي»، وده يقصد بيه الشيء اللي بيتحرك بنفسه يتحرك بنفسه، وهي كلمة فرنسية «autometigua» أصلها يوناني والترجمة بتاعتها الحرفية «تلقائي». كمان كلمة «بطارية» في الأصل «bettarie» وهي عبارة عن إيطالية جهاز يخزن القوة الكهربية أو «مشحن كهربي».
كمان بنقول على المصباح «لمبة» وهو بالتركية «lembe» والإيطالية «lempe»، وأصل الكلمة يوناني. ده بالإضافة لكلمات زي مصرف، اللي بنقول عليه «بنك»، وملعب كرة القدم، اللي بنقول عليها «ستاد»، وقهوة اللي بنقول عليها «كافيه».
