تقّل جيبك.. أحلى خروجات إسكندرية مع خطيبتك في عيد الحب
عيد الحب قرب ودي فرصة ما تتعوضش للخروج والفسح بالذات مع خطيبتك أو مراتك، وعشان كده قدامك حل من اتنين؛ يا تكلف روحك وتجيبلها هدية كان نفسها فيها، يا إما تريح بالك من حكاية الهدية دي بس حتكلف روحك برضه وتخرجها في مكان حلو تقضوا فيه اليوم ده.
«شبابيك» جابتلك اقتراحات بأجمل أماكن شاعرية في إسكندرية عشان تقضوا فيها يوم ما يتنسيش، وكلها بتطل على البحر عشان يبقى الجو الرومانسي اكتمل ومفيش حجة.
كافيهات كورنيش البحر
أسهل مكان تفكر تروحه في عيد الحب هو كافيه أو كافيتريا بتطل على البحر مباشرة، ودي ممتدة من منطقة كليوباترا لغاية سيدي بشر، بس لو ميزانيتك ضخمة ومتقّل جيبك ومستعد تجيب حلويات ومشروبات، يبقى عليك وعلى أي كافيه من دول:
Cafe 4×4
وده مكانه في لوران على البحر مباشرة قدام حلواني كلاسيك، حتستمتع فيه بغداء أو حلويات أو مشروبات، خصوصا إنهم حيخصّصوا أغاني اليوم كله عن الحب.
Carlos Café
كافيه كارلوس ليه 4 فروع في إسكندرية لكن أشهرهم فرع سيدي جابر، وفرع لوران، والاتنين بيطلوا على البحر، وبيوفروا أكل أو شرب، وبرضه حتلاقيه مشغل أغاني رومانسية طول اليوم، بس الأضمن إنك تتصل تحجز ترابيزة قبل ما تروح.
Pablo Cafe & Restaurant
«بابلو» مش مجرد كافيه، هو كمان مطعم وفيه مكان مخصص للحفلات وأعياد الميلاد ودايما بيحرص يعمل ديكورات في أيام المناسبات، وعنوانه 418 طريق كورنيش البحر في لوران، وفيه أماكن جلوس برة وجوة يعني حتشوف البحر حتشوفه.
Malibu
«ماليبو» من أشهر كافيتريات منطقة سبورتنج اللي على البحر وده بالذات مافيهوش مكان مقفول، يعني حتقدر تستمتع بجو البحر وتتصور طول ما أنت موجود، وبيقدم وجبات غير المشروبات.
Taverna
«مكانك ع البحر».. ده شعار كافيه «تافرنا» في منطقة كليوباترا واللي بيطل على البحر مباشرة، وبيقدم وجبات ومشروبات وبرضه حتستمتع فيه بالديكور والأغاني الرومانسية يوم عيد الحب.
Delice
حلواني ديليس من أشهر وأقدم الكافيهات في منطقة محطة الرمل، واللي كان زمان حلواني بس قبل ما يتحول لكافيه بيقدم كل الخدمات ويتزود عليه مطعم كمان. حتستمتع هناك بالديكور التراثي والإضاءة الحالمة علما بإن فيه أماكن للجلوس برة وجوة، وأسعاره مش غالية كمان.
المنتزه
حديقة المنتزه زادت سعر تذكرة دخولها لـ 14 جنيه ولكن مش خسارة في سبيل إنك تقصي يوم كامل وسط الخضرة والمساحات الواسعة، خاصة إن المنتزه فيها مجموعة من أحسن المطاعم والكافيهات، وحيكون عندكم فرصة تتصوروا في أماكن كتير حلوة وفي نفس الوقت حتكونوا قريبين من شاطئ البحر.
قلعة قايتباي
قلعة قايتباي تعتبر اختيار أنسب لأصحاب الميزانيات الأقل؛ لأن تذكرة دخولها 5 جنيه بس، وحتى الكافيتريات هناك أسعارها حنينة، وفي نفس الوقت حتكونوا قريبن من البحر وتقدروا تاخدوا صور كتير حلوة، أو تركبوا مركب في المياه، وماتنساش غزل البنات والبالونات لو خطيبتك بتحبها.
المولات
إسكندرية فيها مجموعة من أكبر وأحلى المولات وبكدة حتبقى ضمنت تبسط مراتك بفكرة «الشوبينج» وفي نفس الوقت حتقدروا تقعدوا في مكان شيك للأكل أو الشرب، ومن أشهر المولات: جرين بلازا في سموحة، وسانستيفانو قدام محطة ترام سانستيفانو، وسيتي سنتر في مدخل الإسكندرية الصحراوي، والديب مول في رشدي، وكلهم فيها قاعات سينما عشان الخروجة تبقى كِملت.
