من أجل مرتبة أفضل.. نصائح عشان تريّح ضهرك ع الآخر
بعد يوم من العمل الشاق، كل اللي بنفكر فيه واحنا في طريقنا للبيت هو السرير عشان نرتاح ونخلص من أوجاعنا خلال النوم، فلما نرمي روحنا على «مرتبة السرير» وتسبب لينا آلام في الرقبة أو الضهر، وتخلي جسمنا مكسر، ده بيكون مستفز جدا.
والسؤال هنا إزاي نواجه المشكلة دي؟ وهو فعلا المراتب القطن أفضل؟ طيب هو وزن الشخص بيفرق أصلا؟ وامتى يبقى لازم ولا بد نغير مرتبة السرير؟ إجابة كل الأسئلة دي هتلاقيها في التقرير ده من «شبابيك».
المرتبة مناسبة للكل ماعادا
دكتور العظام محمود ناجي بيقول إن «المراتب السوست اللي حالتها جيدة ومتناسقة مع بعضها يعني متلاقيش فيها حتة طرية وحتة ناشفة دي بتناسب كل الناس ما عدا اللي عندهم مشاكل صحية في الضهر بيكون ليهم مرتبة مخصصة».
الحالة الصحية
وبيكمل «المرضى اللي بيعانوا من مشاكل صحية في الضهر سواء كانت خشونة أو انزلاق غضروفي لازم يناموا على مرتبة قطن، وتتنجد كل فترة لأن القطن مع الوقت كثافته بتقل وده عشان يفضل القطن فيها دايمًا كثيف ومتماسك ولازم المُلل الخشب تحت السرير يكونوا كلهم لازقين في بعض وميكونش بينهم فراغات».
ويوضح «ناجي» أن «المرضى الكبار في السن اللي بيعانوا من مرض أدى إلى إنهم ميقدروش يتحركوا من على السرير بيحتاجوا لنوع مرتبة اسمه المرتبة الهوائية، عشان ميحصلش ليهم قرح فراش نتيجة لعدم الحركة».
هو وصاحبتك خانوكي ولا بيحبوا بعض؟.. هذه القصص دليلك
الوزن بيفرق
وكيل مراتب «هابيتات» و«يانسن» حازم أسامة، بيقول إن الوزن بيفرق في نوعية المرتبة المختارة؛ يعني لو وزن الواحد فوق الـ120 كيلو لازم يختار أنواع معينة من المراتب تستحمل معاه.
وبيشير «أسامة» إلى أن فيه نوع مراتب بيكون عبارة عن سفنج مضغوط ناشف، وده هيكون كويس مع المستخدم أحسن من المرتبة السوست اللي هتهبط معاه بسرعة. واللي تحت الـ120 بيجيب أي مرتبة عادي.
اجهاد عضلات الرقبة
بسبب إن المرتبة مش متناسقة هتلاقي أنك مش عارف تحط راسك بشكل مستقيم على المخدة وبالتالي هيحصل ليك اجهاد في أربطة الفقرات العنقية وبالتالي هيحصل قصور في الدورة الدموية للمخ فهتلاقي نفسك لما تصحى حاسس أنك مرهق ومش نايم كويس.
ولما المخدة تكون متناسقة وحجمها على قد المسافة بين كتفك ورقبتك هتلاقي نفسك عارف تنام عليها بشكل كويس ومش بتتزحلق ولا هتلاقي طرف راسك بس هو اللي على المخدة لأن الوضعية دي بتعمل اجهاد في الفقرات العنقية ليك.
إلغاء انحناءات العمود الفقري
والمرتبة لما تكون مش متناسقة ومتماسكة وكثافتها عالية مش بس بتأثر على الرقبة لأ ده كمان بتلغي الإنحناءات الطبيعية اللي بتحافظ على العمود الفقري فهتلاقي إن ضهرك بيحصله حالة من التقوس. ولما تكون المرتبة متينة وكثافتها عالية هتلاقي إن رقبتك وعمودك الفقري في حالة استقامة.
والإنحناءات دي متمثلة في الفقرات العنقية المنحنية للأمام، والفقرات الظهرية المنحنية للخلف، والفقرات القطنية اللي موجودة أسفل العمود الفقري واللي بتنحني للأمام، أما الفقرات العجزية العصعوصية فديه موجودة في آخر فقرات العمود الفقري وبتنحني للخلف.
«الجاثوم».. شلل النوم المؤقت أسبابه وعلاجه
أنواع المراتب
- القطن
دكتور العظام محمود ناجي بيشوف إن المراتب القطن طبعًا كويسة بس المشكلة إنها مبقتش متوفرة بجودة عالية لأن طريقة التنجيد اختلفت عن زمان شوية. فزمان كان الراجل يقعد قدام البيت وينجد بآلة مخصوصة معاه بتحافظ على فتلة القطن إنها متتقطعش فكانت المرتبة القطن بتقعد سنة ولسة محتفظة بجودتها لكن دلوقت بقى بيتم استخدام مكنة بتقطع القطن وبنلاقي المرتبة تحتاج إنها تتنجد بعد شهرين أو تلاتة.
لكن على الجانب الآخر بيشوف الدكتور محمد العراقي، طبيب عظام، إن المرتبة القطن هي الأفضل ليك من أنك تشتري المرتبة السوست والإسفنج، وده لأنها قادرة على إنها تخلي رقبتك وعمودك الفقري في حالة استقامة، فلو لقيت الراجل اللي بينجد الحاجة تحت عينيك زي زمان ممكن تكلمه وتنجد المرتبة قطن.
- السفنج
أما المرتبة السفنج بيشوف «ناجي» إنها بتسبب مشاكل في الضهر، بس لو أنت مضطر تجيب مرتبة سفنج بينصحك «العراقي» أنك تشتري نوعية مرتبة اسمها Firm، والـFirm هي نوعية مرتبة وسط مابين المرتبة الـSoft اللي هي الإسفنج بتاعها بيكون ناعم وكأنك نايم على ريش نعام والمرتبة الـHard اللي الإسفنج بتاعها بيكون خشن.
- السوست
وكيل مراتب «هابيتات» و«يانسن» حازم أسامة بيقول إنك لما تيجي تحدد أفضل مرتبة سوستة بيكون من ناحية ارتفاع المرتبة وكمية الطبقات اللي موجودة جواها سواء سفنج أو قطن، وكلما زادت المرتبة في الإرتفاع كل ما كان أحسن، والإرتفاع فيه مثلًا 25 ، 30، 35 سم. وبرضه كل لما زاد السمك بتاع سلك السوستة يعني مثلًا لو كان 2,4 ده هيديها عمر أكتر.
ويؤكد «أسامة» إنه هيكون أحسن ليك لأنك كل ما تنام على طبقات أكتر كل ما ضهرك هيكون مستريح، ولو الطبقات قليلة هتحس بالسوستة وبالتالي هيحصلك مشاكل في ضهرك. ولما سمك السوستة يكون أكتر المرتبة هتقعد معاك أكتر.
- المرتبة السوستة المنفصلة
النوع ده من المراتب السوست بتاعته منفصلة، فبالتالي لو نام اتنين مثلًا جنب بعض وحد اتقلب مش هيحس بحركة التاني كأن كل واحد منهم نايم على مرتبة منفصلة عن التانية. والنوم عليها مريح.
- المرتبة السوستة المتصلة
هى اللي السوست بتاعتها متصلة ببعضها واللي نايم عليها بيحس إنها بتتحرك وهو بيتحرك عليها ولو حد نايم جنبه هينزعج من حركته لأنه هيحس بيها.
وأنت بتختار المرتبة بقى اختار الأنسب ليك، وجرّبها بنفسك قبل ما تشتري. وأسماء المراتب دي بتبقى مختلفة من مصنع للتاني. بس اختيارك بيبقى على أساس إن المرتبة تكون متصلة أو منفصلة.
