«بوظة رول».. اتحدى الحر بـ«آيس كريم» على كيفك
محدش فينا مش بيحب الآيس كريم، سواء كان عادي أو سوفت أو مغلف، أو كان في علبة أو بسكوتة، بس عمرك شوفت آيس كريم ملفوف جوة ساندوتش؟
فكرة بسيطة بدأها مجموعة شباب من سنتين في محل في القاهرة، اتوسعت وانتشرت لحد ما اتحول المحل الصغير لأكتر من 30 فرع متوزعين على 4 محافظات باسم أصبح في حد ذاته علامة تجارية.. «بوظة رول».
«البوظة» هي أصل صناعة الجيلاتي بس الكلمة نفسها اختفت من عشرات السنين لحد ما قرر مجموعة من الشباب إنهم يحيوا الاسم القديم جوة فكرة جديدة جدا وهي تقديم الآيس كريم في شكل بيضاوي ملفوف بدل من شكل الكورة المعتاد.
الشباب دول مكنش اهتمامهم واقف على الاسم والشكل وبس، لأ هم من البداية قرروا ينوعوا في النكهات ويقدموا نكهات معروفة وغير معروفة للآيس كريم، وكمان عليها إضافات مش معتادة زي الكراميل والعسل والطحينة والتوت الأحمر.
في 2 فبراير اللي فات وقبل نهاية فصل الشتا، إدارة «بوظة رول» اتحدت الطقس البارد بالآيس كريم بتاعها، لأنها فتحت آخر فروعها في الزقازيق عاصمة الشرقية، وهو الفرع اللي بقى عليه إقبال كبير جداً خاصة من الشباب رغم إن افتتاحه كان في عز الشتا، ودي الخطوة اللي جت بعد شهرين بس من افتتاح فرع الإبراهيمية في الإسكندرية وقبله كان في سبورتنج وسموحة واللي برضه لازالوا شغالين لحد دلوقتي بنفس الإقبال في إسكندرية.
في «بوظة رول» مفيش نكهة بتدور عليها مش حتلاقيها بداية من الكريمة والشيكولاتة لمختلف أنواع الفواكه، وضيف عليهم (عسل وطحينة - كوكيز وكراميل- توت أحمر– أو أوريو)، ده غير توفيرهم لنوع مخصوص من الآيس كريم للي عاملين «دايت» بأسعار تتراوح ما بين 18: 25 جنيه.
أما الاختراع الأخير اللي لسه مجموعة من جمهور «بوظة رول» مش عارفين يستوعبوه فهو ساندوتش البوظة وهو عبارة عن شريحتين عراض من أي نكهة تختارها من الآيس كريم بينها رول من نكهة تالتة وسره بيتراوح ما بين 30: 45 جنيه.
ورغم إن أسعار «بوظة رول» تعتبر غالية مقارنة بمحلات الآيس كريم المتعارف عليها إلا أنها لازالت محافظة على إقبال الجمهور عليها وده بسبب الطعم المميز للآيس كريم ولشكله اللي واضح إنه لازال قادر يجذب محبي الآيس كريم.
