عنصرية وغيرة.. ارتباط عمرو يوسف و«كندة» يُظهر الوجه القبيح للبنات
عقد الفنان المصري عمرو يوسف قرانه على الفنانة السورية كندة علوش، وتم الإعلان عن ده يوم 25 نوفمبر، والخبر ده كان ليه نصيب الأسد في نقاشات كتير على مواقع التواصل الاجتماعي على مدار الأيام اللي فاتت.
طبعا كان فيه جانب من التعليقات اللي بتبارك للاتنين، إلا أنه كان فيه مجموعة كبيرة من تعليقات البنات اللي بتظهر من خلالها مجموعة من الصفات غير المقبولة والمنتشرة بقوة في المجتمع.. في الموضوع ده هنقولك على الصفات والأفكار السلبية اللي ظهرت في التعليقات على ارتباط "كندة وعمرو".
غيرة البنات
بنات كتير كانت معتبرة عمرو يوسف، فارس أحلامها وكانوا بيغيرو عليه، وأول ما ارتبط اتصدمو، لأنهم كانوا شايفين إن ممكن يقابل حد فيهم في يوم من الأيام ويتجوزها!
وعن التفكير ده بيشوف استشاري الصحة النفسية جمال فرويز، إن ممكن المشهور اللي البنات بتحبه لما تيجي تتعامل معاه على أرض الواقع تكتشف أنه غير اللي بتشوفوا في التليفزيون، لأن التعامل وجه لوجه بيبقى مختلف، وهى بتكون بانية صورة خيالية للشخص.
وبيضيف فرويز "لو فضلت البنت عايشة في الصدمة دي مدة، والموضوع مكنش مجرد هزار يبقى عندها حالة اضطراب نفسي وهتحتاج أنها تتعالج وتخرج برا الأفكار اللي بتفكر فيها".
وبيقول أستشاري الطب النفسي للبنت اللي حالفة أنها لازم تلاقي فارس أحلام، زي عمرو يوسف بالظبط على أرض الواقع: "بصي على النجم اللي بتفكري فيه أنه رمز جميل، لكن لازم كل واحد يحط طموحاته على قدر إمكانياته، وميبصش على أعلى من امكانياته عشان لو بص، ومتحققتش ممكن يصاب بأزمة نفسية".
فرق السن
بالرغم أن عمرو يوسف أكبر من كندة علوش، لكن في الأول الناس كانت فاكرة أن "كندة" أكبر من عمرو. وطبعًا انتقدوا فكرة إنه يتجوز واحدة أكبر منه، عشان فكرة أن الولد لازم يكون أكبر من البنت، المنتشرة عند كتير من الناس، اللي لو حصل العكس هيحصل في نظرهم "خلل في العلاقة" والبنت هى اللي هتكون مسيطرة ومتحكمة.
بيعلق "فرويز" على الأمر ده، وبيقول إن "عمر ما فارق السن بيعمل نوع من التسلط.. يعني لو شوفنا علاقة النبي محمد (ص)، وزوجته خديجة هنلاقي أن مفيهاش أي نوع من أنواع التسلط، وكانت العلاقة بينهم جميلة وكانت خديجة عندها 40 سنة والرسول (ص) عنده 25 سنة".
والتسلط ده زي ما بيقول أستشاري الطب النفسي "بيجي على حسب الشخصية إذا كانت متعودة أنها هي اللي تكون متحكمة أو هي اللي بتكون معتمدة على الطرف الآخر".
ولو فيه فرق سن، بيقول الدكتور جمال فرويز "لا بد من مراعاة النمو الفكري والعقلي والجسماني والعاطفي بين الاتنين لأن نمو البنت بيكون أسرع من الولد في كل حاجة، فبيبان عليها السن أكبر، لكن في حالة أن الولد رغم صغر سنه متوافق معاها في الجانب الفكري والعقلي والجسماني والعاطفي عمر ما فرق السن ما هيبان".
سيطرة ولا إدارة؟.. هذا ما فعلته المرأة بالرجل في الأعمال الفنية
دي مُطلقة
لما تم الإعلان عن ارتباط الثنائي، ظهرت نظرة دونية من البنات لـ"كندة" لأنها "مُطلقة"، وانتشرت تعليقات من نوعية إزاي عمرو يوسف يتجوز واحدة مطلقة.
استشاري العلاقات الأسرية، أسماء مراد، استنكرت النظرة الدونية للمطلقة، وأكدت أن الطلاق لا يعني أن المطلقة مش كويسة أو أقل من غيرها، وقالت إن "الراجل في حياته بيدور على الأنثى اللي هتكمله نصه تاني وفق شروطه الخاصه، ولما يلاقيها مش هيفرق معاه خالص إذا كانت مطلقة أو لأ، لأن اللي يفرق معاه بس أنه يعيش مع بنت بيحبها".
سورية مش مصرية
"يعني ملقاش حد في مصر فراح مرتبط بواحدة سورية" ده كان تعليق من تعليق بعض البنات. وعن التعليق ده بتقول استشاري العلاقات الأسرية، أسماء مراد "الراجل لما يحب مش هيفرق معاه إذا كانت البنت سورية ولا أمريكية اللي هيفرق معاه زي ما قولنا إذا كانت بتكمل نصه التاني ولا لأ.
وبتشير أسماء إلى أن "الست السورية فيها روح الأنثى، وبتحب تعمل كل حاجة بإيديها، وبتقدر جوزها تقدير كبير بعكس كتير من المصريات اللي بتاخد الموضوع تحدي وبتعمل اللي عليها مع الراجل وفي نفس الوقت بتنكد عليه وبتكون حاسة بإرهاق وبتكون كمان مهملة لنفسها".
الثنائي
عمرو وكندة، اللي أعلنوا في 25 نوفمبر، عن ارتباطهم بشكل رسمي، اشتركوا مع بعض في كتير من الأعمال الفنية منها على سبيل المثال أفلام "برتيتا"، و"احد صحيح"، و"هيبتا"، بالإضافة إلى مسلسل "نيران صديقة"، ومسلسل "عد تنازلي".
وشارك الاتنين كمان مع بعض في إعلان "مصر قريبة" اللي كان فيه برضه حسن الرداد وإيمي سمير غانم، واللي نقدر نقول عليه إنه كان إعلان "وش الخير" عليهم كلهم سواء على إيمي والرداد، أو عمرو وكندة، لأنهم ظهروا فيه كلهم وبعدين كل واحد منهم أعلن ارتباطه بالتاني وكأن الإعلان قدر إنه يوفق راسين في الحلال :)
نجوم كانوا فقراء.. قصص 6 مشاهير بتقولك «مفيش مستحيل»
