ابتعد تماما.. 6 أخطاء قاتلة تهدد مستقبلك في فن الكوميديا
لو عندك خفة دم وموهوب في التمثيل وعايز تكون ممثل كوميدي يبقى لازم تعرف إن فيه مجموعة من الأخطاء لابد تتجنب الوقوع فيها، وده ملوش علاقة بكونك شايف أنك هتدي في الكوميديا أكتر من أي جانب تمثيل تاني، لكن ده عشان تكون ممثل كوميدي ليك بصمة والناس تضحك معاك من قلبها بدون ما تحس أنك بتستظرف.
متقلدش حد
الناقدة الفنية علا الشافعي بتقولك إن من أكبر الأخطاء اللي لازم تتجنبها هي انك تقلد طريقة أي نجم من نجوم كوميديا سواء عادل إمام، أو أحمد حلمي، أو محمد هنيدي، لأن الناس خلاص عارفاهم كويس قوي فبالتالي مش هتسيبهم وتيجي تشوفك وأنت بتقلدهم. وعليك أنك تدور على الحاجة المميزة فيك اللي تخلي ليك بصمة زي ما كل واحد منهم ساب بصمة في حياته الفنية ومقلدش حد.
وبخصوص الجزئية دي بيقول الممثل في فريق «1980 وأنت طالع» محمد العتابي إنك عشان تكون مميز لازم تعرف أيه المنطقة اللي عندك بتضحك الناس واللي ميعرفش حد يقلدك فيها وده عشان تكون منور وأنت بتمثل في المنطقة دي.
وبيقول «العتابي» إن منى زكي مثال على ده وعندها منطقة بتعرف تكون مميزة فيها، وهي لمعة العين، والإبتسامة اللي بتعرف إزاي توظفها خلال الأدوار اللي بتجسدها.
والمنطقة المميزة دي هتعرفها من خلال التمارين اللي هتأديها في الورش التمثيلية، ومن المخرج اللي بيعرف إنه يطلع منك أحلى ما فيك وينوروا وبيعرفك إن الحاجة دي أنت مميز فيها.
بالعربي والإنجليزي والفرنساوي.. عن الممثل العالمي جميل راتب
الاستظراف
«الشافعي» بتقول كمان إنك تبعد خالص عن الاستظراف، أو إنك تستخف دمك عشان تضحك الناس لأن لو عملت كده الناس هتقفل منك، ولازم تعرف إن فيه شعرة بين الاستظراف وخفة دم فحافظ على الشعرة دي دايمًا وأنت بتمثل.
ايفيه كل ثانية
«الشافعي» و«العتابي» بينصحوك كمان أنك متقعش في خطأ إنك تقول الإيفيه كل شوية لأن دي حاجة مش بتبقى حلوة وبتخلي الناس تحس إن دمك تقيل. وبيشوف «العتابي» إن مفروض يكون فيه مساحة ما بين الإيفيه والتاني عشان تدي للجمهور فرصة إنه يضحك.
خيال الإيفيه ميكونش بعيد
وبيقولك «العتابي» متوقعش في خطأ إنك تقول إيفيه خياله بعيد، بمعنى إن الناس تلاقي صعوبة في فهمه ولازم يكون الإيفيه بسيط وغير متوقع عشان الناس تقدر تضحك من قلبها. وكمان يكون الإيفيه مفروش ليه كويس بمعنى لو فيه ممثل معاك في مشهد ما وأنت عايز تقول ايفيه غير متوقع بتتفق مع الممثل إنه يمهدلك أو يفرشلك مدخل الإيفيه عشان أنت ترميه صح.
وفي الآخر بتلاقي المشهد عالي، وده عشان أنتوا متفقين مع بعض إزاي هطلعوا الإيفيه بشكل حلو. وبيشوف «العتابي» إن دنيا سمير غانم من أحسن الناس اللي بتعرف تفرش الإيفيه لأي ممثل وده بجانب طبعًا إن عندها حس كوميدي عالي.
الإسفاف
الخطأ اللي بينصحك «العتابي» تبعد عنه نهائيا هو الضحك المسف اللي بيأذي مسامع الناس لأن الإسفاف ده عمره قصير وهتنتهي معاه بسرعة. ولو رجعنا مثلًا للمسرح في التسعينات هنلاقي إن مسرحيات زي «سك على بناتك»، و«مدرسة المشاغبين»، و«العيال كبرت» هي اللي متعلقة في ذهننا لحد دلوقت لأنها كانت بتقدم كوميديا بدون إسفاف وأي مسرحية تانية كانت فيها إيفيهات مسفة خدت وقتها وراحت ومعلقتش في أذهان أي حد.
وزنك مش هيوقفك.. ادخلي التمثيل برجلك اليمين
