أقرب طريق لقلب جوزك كرشه.. 4 وصفات شهية
«أقرب طريق لقلب جوزك معدته» جملة قالوها زمان على إعتبار إن الراجل أكيل، وعشان تكسبي قلبه اعملي ليه أكلة حلوة. وبما إن دي أول سنة جواز ليكي فديه فرصة حلوة إننا نعرفك إزاي تكسبي قلب جوزك من خلال بعض وصفات الأكلات اللي بتقدمها ليكي الشيف نهير مدحت، والوصفات ديه هتخلي معدته ترقص.
المكرونة بالبشاميل
المقادير
كيس مكرونة.
1/2كيلو لحم مفروم.
8 ملاعق دقيق.
2 بصلة.
2 لتر لبن أو 24 معلقة لبن بودر مخفف بلتر ماء للبشاميل.
من 2 لـ 3 معالق زبدة حسب رغبتك.
كوباية لبن.
3 بيضات.
صويا صوص.
توابل (ملح - فلفل - بابريكا- قرفة- زنجبيل- سماق - بهارات لحم – مرقة فورية).
طريقة التحضير
العصاج
هتشوحي البصل وبعدين تحطي اللحمة عليه، وتقلبيهم في بعض لمدة دقيقتين، وبعدين هتحطي عليهم كوباية لبن، وهتقلبيهم في بعض لغاية ما منسوب السوايل اللي في الحلة يقل وهتضيفي التوابل وصويا صوص وهتسبيهم شوية.
البشاميل
فيه طريقتين اختاري منها واحدة
الطريقه الأولي
هتضربي اللبن والدقيق مع بعض وهتحطيهم في الحلة على نار هادية عشان الخليط يمسك في بعضه شوية وبعدين هتقفلي النار.
وبعدين هتضربي البيض مع شوية ملح وفلفل وهضفيه للبشاميل اللي انتي عملتيه وممكن تضيفي زبدة لو حبة.
الطريقة التانية
هتسيحي قطعة الزبدة وتضيفي عليها معلقتين دقيق وتقلبيهم في بعض لغاية ما لونهم يبقى دهبي وبعدين هتضيفي اللبن عليهم مع التقليب المستمر عشان الخليط يمسك في بعضه.
وبعدين هتضربي البيض مع شوية ملح وفلفل وهضفيه للبشاميل اللي أنتي عملتيه وهتقسمي كمية البشاميل اللي عملتيها لجزئين، وهتقلبي المكرونة المسلوقة في أي كمية منهم وتسيبي كمية البشاميل التانية لوحدها.
وهتجهزي صينية وتحطي كمية المكرونة بالبشاميل اللي عملتيها وبعدين تحطي عليها طبقة لحمة وبعدين باقي المكرونة المسلوقة وبعدين هتحطي كمية البشاميل اللي كنتي سايباها لوحدها وتدخلي الصينية الفرن لمدة 60 دقيقة.
الإقبال على الأكل تاريخي في الشتا.. طب هتعمل أيه في الدايت؟
الرقاق
المقادير
8 رقاقات طرية.
نص كيلو لحمة مفرومة.
لتر لبن.
4 معالق زبدة.
3 بصلة متوسطة.
معلقة صغيرة صويا صوص.
توابل مختلفة (ملح- فلفل أسود-قرفة-جنزبيل-بابريكا- 2باكت مرقة فورية).
طريقة التحضير
هتحطي الزبدة على النار، وعليها البصل وهتقلبيهم لحد ما يبقى لونهم دهبي، وبعدين هتحطي اللحمة، وهتحطي نص كوباية لبن لأنها بطري اللحمة وبتديها تيست حلو.
على الجنب التاني هتحطي على بقية اللبن المرقة الفورية. وهتجيبي حلة وهتمسكي رقاقة واحدة تدهيني ناحية منها زبدة والناحية التانية لبن.
هتعملي الأربع رقاقات بالطريقة دي وما بين كل واحدة والتانية هتحطي العصاج يعني رقاقة وعصاج رقاقة وعصاج وهكذا بس آخر وحدة في الرقاق هتدهني الناحيتين زبدة وهدخليها الفرن على 180 درجة حرارة والوقت اللي هتحطي الصينية فيه في الفرن هو 35 دقيقة.
ولما تطلع الصينية من الفرن هتحطي اللبن اللي مع المرقة اللي عملتيه على الرقاق عشان يطلع طري وتغطي الصينية.
هذه الأكلات اخترعتها السينما المصرية
الملوخية بالأرانب
المقادير
كيس ملوخية.
أرنب متوسط.
طريقة التحضير
الأرانب
هتقطعي الأرنب 8 قطع وتشوحي القطع بمعلقة زبدة وهتحطي ملح وفلفل وبصلة وعليهم ماية وتسبيهم على النار لغاية ما الأرنب يستوي.
وهتعرفي إذا كان استوى أو لأ عن طريق شوكة تغرسيها فيه وتشوفي إذا كان لحم الأرنب استوى ولا لسة جامد.
وبعدين إما هتحمريها بالزيت عادي أو ممكن تحطيها في طاسة أو صينية وتحطي ملح وفلفل أسود عليها وتجيبي طماطم وتقطيعها وتحطي الصينية في الفرن لمدة 10 دقايق على الشواية وهتحمر.
الملوخية
هتاخدي شوربة الأرانب متصفية من أي حاجة وهتحطيها في حلة لوحدها على النار.
وبعدين هتجيبي الملوخية وهتحطيها في الشوربة وهي بتغلي وهتجيبي معلقة وتفضلي تقلبي الخليط ده لمدة خمس دقايق لغاية ما تحسي إن الملوخية استوت وبعدين تقفلي النار.
وهتجيبي طاسة لوحدها وتحطي عليها معلقة سمنة أو زبدة وهتحطي عليهم شوية توم تكوني مفصصاه وتحطي كسبرة ناشفة وشوية ملح وفلفل أسود وتفضلي تقلبيهم في بعض لحد ما يحمروا خالص.
وهتاخدي الخليط اللي في الطاسة وتحطيه على الملوخية وتقلبيهم من غير ما تغطيهم لأنك لو غطيتي الملوخية هتسقط.
لو «تحت 18 سنة».. الأكل الصحي اللي هيخليك برنس هنا
البرياني الهندي
المقادير
5 قطع دجاج.
2 كوب أرز بسمتي منقوع.
2 بصلة مفرومة.
5 فص ثوم مفروم.
2 ثمرة طماطم معصورة أو مقطعة مكعبات.
3 فلفل حار أو رومي مقطع قطع صغيرة.
2 كوباية زبادي.
معلقة كبيرة صويا صوص.
معلقة صغيرة ملح.
معلقة صغيرة عسل أبيض أو سكر.
باكو مرقة فورية.
نص معلقة صغيرة من كل مكون من المكونات دي: فلفل أسود، كمون، سماق، زعفران أسباني، قرفة ناعمة ، قرنفل ناعم أو حبوب، بهارات كبسة، وكركم.
ربع معلقة صغيرة زنجبيل، و ورق لوري.
5 حبات حبهان
2 لتر ماية.
مكونات إضافية لتتبيل الفراخ
مكونات إضافية للفراخ قبل ما تحطيها في الفرن:
2 معلقة كبيرة زعتر.
2 معلقة كبيرة لبن خالي الدسم.
1 معلقة كبيرة خل تفاح.
1 معلقة صغيرة صويا صوص.
1 معلقة صغيرة مسطردة.
نص معلقة صغيرة من: ثوم بودرة، بصل بودرة، وعسل أبيض.
معلقة كبيرة معجون طماطم أو كاتشب.
طريقة التحضير
هتحطي البصل المفروم مع الزبدة في حلة على النار لغاية ما يطرى البصل وبعدين هتضيفي التوم، والفلفل، والطماطم، والتوابل والبهارات، وبعدين الفراخ والجزر وتقلبي كله في بعضه. وبعدين هتحطي الزبادي والمية عليهم وتغطي الحلة وتسبيها على النار لغاية ما الفراخ تستوي.
وبعدين هتخرجي الفراخ من الشوربة دي وتحطي الرز في الشوربة، وخلي بالك إن الخليط يكون فوق مستوى الرز بـ 1 سم. وبعدين غطي الحلة وسيبيها لحد ما الرز يستوي. وفي الوقت ده هتحطي على الفراخ اللي استوت المكونات الإضافية وتدخليها الفرن لحد ما تاخد اللون الدهبي، وهتقدمي لجوزك الرز و الفراخ ومعاهم سلطة زبادي.
