أكلة وغنوة.. حفلات في ليلة رأس السنة بأسعار معقولة
خلاص قربنا على نهاية 2016 وفيه مطربين ومطربات كتير بيستعدوا عشان يعملوا حفلات في أماكن مختلفة في ليلة راس السنة، بس بما إن الحفلات دي بتكون غالية ومش في متناول الكل فإحنا جبنا ليكوا طريقة تانية تحتفلوا بيها بليلة رأس السنة بأسعار معقولة. ولقينا إن فيه كافيهات ومطاعم عاملة حفلات اليوم ده بأسعار كويسة وأهو منها تاكل في مكان جديد وتسمع غنوة حلوة.
«أولديش» مطعم وكافيه هتحس فيه بروح الزمن الجميل اللي بتظهر في ديكوراته والإكسسوارات الموجودة فيه زي الطربوش، والبيشة. وفي يوم راس السنة الساعة 7 بالليل هيكون عامل حفلة فيها عازف الجيتارعبدالله مجدي، والمغنية ريم عصمت. ومفيش حجز مكان قبل الحفلة بس حاول تروح هناك من بدري عشان تلاقي مكان. وأسعار الأكل والشرب هناك في متناول الجميع.
الكافيهات كتير بس روح الزمن الجميل في الـ4 أماكن دي
عشا راس السنة
ومش بس المطاعم والكافيهات اللي عاملة حفلات، ده كمان ساقية الصاوي منظمة عشا بمناسبة يوم راس السنة الساعة 9 ونص بليل في مسرح النهر، ومع العشا هيتم عرض مقتطفات من حفلات الساقية في 2016 على شاشة كبيرة هيتعرض عليها مشاهد من استاند أب كوميدى، وأعمال لنجوم مسرح الساقية للعرائس (أم كلثوم - عبد الحليم - فريد الأطرش - محمد منير).
سعر الحفلة 65 جنيها، والموعد الأقصى للحجز هيكون يوم السبت 31 ديسمبر الساعة 2 الضهر. للحجز اتصل على 01126600940.
مجد القاسم، وفيروز، وماهي، ودي جي أحمد عمر، كل دول هيحيوا حفلة راس السنة الساعة 8 بالليل في مطعم «Jupiter. وسعر التذكرة 300 جنيه شاملة فقرات الحفلة والوجبة اللي هتكون مكونة من سلطة تختار منها مكس جرين، أو سيزر، أو جريك سلطة. أما الطبق الرئيسي فهتختار ما بين مكس جرين، أو إيطاليان فيش، أو تشكن مسحب، أو فريك بالكبدة. والحلو هيكون تشيز كيك تختاره بالطعم اللي تحبه سواء كارميل، أو شوكلت، أو فراولة.
عنوان المطعم 26 شارع رفاعة، بجوار فندق سفير، الدقي. وعشان تحجز اتصل على 01021569999، 01021539999. ومطعم Jupiter موجود فيه مساحات مختلفة منهم مساحة للأطفال فيها ألعاب وسينما، ومساحة أوبن أير، ومساحة «No smoking» لو بتتضايق من ريحة الدخان، وفيه مساحة عمل لو عايز تجتمع مع ناس وتتكلموا في شغل ما ممكن تأجرها وفيها لاب توب متاح وغيرها من المساحات.
والمطعم ليه فرع كمان في أخر شارع عبد المنعم رياض بالمهندسين بإسم أوسكار، وهيعمل حفلة في نفس اليوم برضه هيكون فيها «إيساف» ونفس الفقرات الباقية والوجبة اللي هتكون موجودة في فرع الدقي وبنفس السعر. لو عايز تحجز في الفرع ده اتصل على 01021569999.
«كافيه تمبو» الموجود في 12 شارع الموسيقار علي إسماعيل أمام البنك الأهلي، بجوار مترو الدقي هيكون فيه حفلة فيها مجموعة من المطربين منهم هاني عامر، وهشام قمر، وغادة شمس، ودي جي، وسعر التذكرة هيكون 150 جنيها 75 منها سعر الحفلة والـ75 التانية تقدر تطلب بيها أي حاجة من المنيو سواء مشروبات أو أكل. والحفلة هتبدأ من الساعة 8 بالليل.
رقم تليفون الكافيه 01010870719.
