متعملش بوقليلة وتخسر حد.. اتعلم فن اتيكيت الأكل
كل واحد مننا ليه طريقة معينة في الأكل ومش من حق حد يعلق عليه، لكن الأكل ليه اتيكيت ومهم نتعله علشان ميحصلش موقف محرج، خاصة لو الأكل مع خطيبك/ خطيبتك، أو صحابك أو قدام حد غريب عنك.
قواعد لازم تمشي عليها وانت بتاكل
خبيرة تطوير الذات أسماء مراد، بتقول إن من قواعد فن الإتيكيت إنك تاكل بطريقة نضيفة يعني متبوظش هدومك ووشك والمكان حواليك، متفتحش بوقك وإنت بتاكل، متعملش صوت سواء وأنت بتشرب أو بتاكل.
تصغير اللقمة. بمعنى إنك متاكلش لقمة كبيرة عشان متلاقيش نفسك عامل كورتين كدة يمين وشمال جوا بقك وتبقى شبه أحمد بدير لما كان بيأكل سهير البابلي في مسرحية ريا وسكينة.
وبترفض خبيرة الإتيكيت إيمان عفيفي الأكل بصوابع إيدك كلها وإنك تمشي على سنة النبي وتاكل بإستخدام صباعين من إيدك اليمين والشمال. وكمان إيمان بتقولك إن من قواعد الإتيكيت إن لو معزوم عند حد تغرف في طبقك الأكل اللي محتاجه يعني متحطش أكل فوق طاقتك ويبقى شكله زي الهرم كدة. وبرضه وأنت بتغرف الأكل تخلي بالك إنك متوقعش على المفرش أي حاجة عشان الناس متضيقش منك. ولو وقع حاجة شيلها على طول.
الاتيكيت بيقول كده..هذه طرق تقديم الهدايا
الإتيكيت في الطعام من أيام النبي
خبيرة تطوير الذات «أسماء مراد» بتقول إن الإتيكيت في الطعام موجود عندنا من أيام السنة النبوية كنوع من حسن تهذيب سلوك الفرد بحيث تصرفاته يتقبلها الطرف الأخر بصدر رحب بدون ما يشعر بالإشمئزاز.
طبيعة لا تصنع
مش معنى إنك مفروض تمشي على الإتيكيت وأنت بتاكل إن يكون طريقتك في الأكل فيها تصنّع وتكلف لأن أسماء بتقولك إن حاجة زي كدة هتعمل حاجز نفسي بينك وبين الناس فالأحسن إنك تمشي على مقولة خير الأمور الوسط. بمعنى إنك تخلي قواعد فن الإتيكيت جزء من طبيعتك بحيث تطلع بطبيعية منك ومتكونش مصطنعة.
لكل مطعم طريقة أكل
وبرضه مش معنى إننا بنقولك تمشي على الإتيكيت إنك لما تروح كنتاكي مثلًا تطلب شوكة وسكينة عشان تاكل الفراخ لأن كل مطعم بتروحوا بيكون ليه طريقة أكل معينة وعليك إنك تمشي على طريقة الأكل بتاعت المكان عشان متكونش منتقد من الناس.
ولو إنت بتحب تاكل أكلات معينة براحتك زي السمك مثلًا متروحش في فندق وتطلبوا لأن طبيعة المكان هتحتم عليك إنك تاكل بطريقة معينة وتستخدم الشوكة والسكينة والأفضل إنك تروح تاكلوا في مطعم سمك لأن الناس هناك كلها هتلاقيها بتاكل بإيديها. وطبعًا في كلا الحالتين لازم تلتزم بقواعد فن الإتيكيت.
وبجانب طريقة الأكل في المطاعم فيه كمان طريقة أكل ممكن تتعلمها لبعض الأكلات اللي بتحب تاكلها والطريقة ديه هتكون سهلة ليك لو مثلًا اتحطيت في موقف إنك بتاكلها برا البيت.
لو عاوز تكسب زمايلك في الشغل.. عليك بـ«إتيكيت التعامل»
وده فيديو لتعلم أكل المانجا
فيديو للسمك
أكل البرجر
مفيش اتيكيت مفيش ناس
وبتأكد أسماء مراد، على أنك لو متبعتش قواعد فن الإتيكيت وإنت بتاكل هتلاقي إن طريقة أكلك بتخسرك ناس حواليك سواء كانوا معارف، أو حد هترتبط بيه وفيه قصص عن ناس مرتبطة سابوا بعض بسبب الطريقة المنفرة اللي كان بياكلها أحد الأطراف اللي مكنش فيها اتباع لقواعد فن الإتيكيت.
تلميح لا إحراج
طيب لو إنت بتتبع قواعد الإتيكيت وعمرك ما أكلت بطريقة أكل منفرة لكن صاحبك القريب بياكل بطريقة فيها اشمئزاز ومفيهاش أي اتيكيت ففي الحالة دي عليك إنك تلمح ليه ومتقولوش بطريقة صريحة تحرجوا بيها.
والتمليح مش هيحرج اللي قدامك وبالتالي هيظبط طريقة أكله ولو ملمحتش ممكن تخليه يجرب قاعدة من القواعد اللي انت بتعملها بس بطريقة غير مباشرة متقولوش يعني ديه قاعدة من قواعد الإتيكيت لازم تعملها. لكن لما تشوفوا بياكل لقمة كبيرة وبيخزنها جوا بوقوا قولوا ايه يا عم ده إنت بتفكرني بأحمد بدير في مسرحية ريا وسكينة.
وهتلاقيه ضحك وبعدين اقترح عليه ياكل دايمًا بلقمة صغيرة عشان كمان يعرف يهضم بشكل سليم. فأنت كدة هتخليه ياخد باله من صحته ويعرف أن أكله بالطريقة ديه هى الصح وأن الطريقة الأولانية غلط لأنها هتأثر على صحته.
