لو بتشتغلي.. نصائح عشان توفقي بين وظيفتك وبيتك

كتير من المتزوجات اللي بيشتغلوا بيواجهوا مشكلة في تنظيم وإدارة يومهم، لدرجة عجز بعض الزوجات عن التوفيق بين شغلها وبيتها، وده بيأثر  بالتأكيد على علاقتهم بأزوجهم وتربية الأولاد.

في التقرير ده هنعرفك إزاي توفقي بين بيتك وشغلك.

الأعمال المنزلية

شغل البيت من أكتر الحاجات اللي الراجل بيقلق إن مراته تقصر فيها، عشان كده أفضل طريقة هي التعاون، وعمل جدول بسيط كده ترتبي فيه وقتك، ومهامك، بالاتفاق مع الزوج.

وعشان ده يحصل، بينصحك استشاري العلاقات الأسرية، ومؤسس مدرسة «اتجوز صح»، أحمد وجيه، أنك تتفقي مع جوزك على تقسيم بعض المهام المنزلية على بعض.. «يعني أنتي تحطي الأكل وهو يشيله، يعلق هدومه، يرتب مكتبه».. وده من غير ما تضغطوا على بعض، ومع تحديد يوم في الأسبوع تعملي فيه أكتر الحاجات اللي البيت محتاجها.

تجهيز الأكل

ولأن شغل البيت مش بيقتصر على التنظيف بس، فخبيرة الطهي نهير مدحت، بتقولك إن «أفضل طريقة ليكي، هو تجهيز أكلك بشكل أسبوعي، وتخزينه في الفريزر».. ودا زي المحاشي، المكرونة بالبشاميل، الفراخ، اللحوم، الأسماك،  ويدوب لما ترجعي تعملي اللي ناقص، اللي غالبا هيكون حاجة بسيطة زي (السلطة، الرز، المكرونة،...)

الأطفال

ممكن تكلفي أطفالك ببعض المهام البسيطة، زي أنهم يرتبوا اوضة نومهم مثلا.. وبخلاف أن ده هيعلمهم بحسب ما بتقول خبيرة الإرشاد التربوي الدكتورة رانيا صابر، المشاركة وتحمل المسئولية، ده طبعا هيخفف عليكي بعض الأعباء.

وخليكي متأكدة أن «شغل الست مش بيدمر الأطفال».. زي ما بيقول استشاري الطب النفسي، الدكتور عبد الفتاح درويش، «لأن الأم اللي بتشتغل مش بتكون في مجتمع مغلق مقتصر على بيتها بس، وولادها وجوزها هم النافذة الوحيدة اللي بتطل منها على الدنيا.. لأ، دا هي كمان بتحتك بالمجتمع بطريقة أوسع، وواعية أكتر، وبالتالي بتقدر تفهم التغيرات اللي في المجتمع، وتتعامل معاها كمان».. دا غير أنها بتكون واعية بشكل أكبر للمشاكل اللي ممكن يواجهها أطفالها، وهتعرف تتعامل معاها.

لازم يعرف ده

وعلى الزوجة اللي بتشتغل أنها تعرف زوجها أن «التربية المفروض تكون مشتركة».. وده عشان زي ما بيقول استشاري الطب النفسي «في الوقت اللي الأب بيكون فيه مش موجود، الأم تعوض غيابه، والعكس صحيح.. وفي المذاكرة ممكن يقسم الزوجين المواد بينهم، كل واحد يذاكر للأطفال مادة، وكمان ممكن يقسموا بينهم مواعيد حضانة الأطفال، مثلا الأب يوديهم، والأم تاخدهم» لأن ده في حد ذاته بيزرع في قلب الأطفال الإحساس بالأمان، والحب، والاستقرار الأسري.

جوزك

طبعا لازم جوزك يكون حاسس بوجودك في البيت، وأن حقوقه كزوج عليكي مش متأثرة.. فلازم يكون جوه يومك وقت تكوني فيه أنيقة ومنظمة وفاضلة تقعدي تتكلمي معاه وتدردشوا وتسهروا، لأن لو محسش ده هيكون شايف أن شغلك سبب في إهمالك لبيتك وتقصيرك في حقوقه كزوج.

الشغل الآمن

ولو أنت بتشتغلي في وظيفة بتاكل وقتك، أو مواعيد الشيفتات فيها مش محددة، فلازم تدوري على وظيفة آمنة، محددة بـ«شيفت»، ومتزدش عن 8 ساعات، ويومين أجازة في الأسبوع، ويفضل تكون وظيفة إدارية، وياسلام لو قريب من البيت، وحضانة الأولاد، «لو موجودين»، أو «أون لاين»، وبكده الزوج هيكون ضامن أنه هيرجع، يلاقي مراته في البيت، وكمان أنتي مش هترجعي مرهقة.. ودا زي ما بيقولك استشاري الطب النفسي الدكتور عبد الفتاح درويش.

متنسيش نفسك

خلود فوزي، زوجة وعاملة، بتنصحك، وأنت بتنظمي وقتك ما بين الشغل والبيت، أنك متخليش المهام اللي عليكي تضغطك، وبتقولك «حاولي تخلي لنفسك نص ساعة في اليوم، ترتبي فيها أمورك، تقعدي مع نفسك تسترخي، وعلى الأقل يوم في الأسبوع تروحي للكوافير، تهتمي بشكلك، وستايلك، عشان متحسيش ان شغلك وولادك خدوكي من نفسك».