تفاصيل إصابة طالبة بمدينة جامعة الأزهر.. والإدارة تحقق في الواقعة
روت إحدى طالبات جامعة الأزهر إحدى وقائع الإهمال داخل المدينة الجامعية بالقاهرة، وطريقة تعامل إدارة المدينة معها.
وقال الطالبة مروة السنهوري إنها تعرضت لدخول إبرة تنجيد كانت موجودة بمرتبة السرير داخل قدمها وعندما توجهت للعيادة الصحية قالت لها الدكتورة المتواجدة «مش مستاهله نعمل لها حاجة وإن شاء الله خير».
وأضافت أن مكان دخول الإبرة تورّم بشكل ملحوظ، فعادت إلى العيادة الصحية مرة أخرى فتم تحويلها لمركز السموم بالدقي للحصول على أمصال ضد التسمم.
وبحسب الطالبة فإن تسلسل الأحداث جاء بالشكل التالي:
♠ الساعة 7 حولوني لمركز السموم بالدقي وقالولي لازم تخرجي بإسعاف لأن بعد الساعة 7 مش مسموح تخرجي لوحدك.
♠ عم رمضان سواق الاسعاف قالي احنا نروح الزهراء، وضلت أقنع فيه نروح الدقي مرضيش ويقول انا إيه يوديني آخر الدنيا.
♠ في الزهراء حولوني للدقي، وعم رمضان قعد يزعق ويقول للدكتورة أنا مأكلتش من العصر خليها تعصر عليها لمونة وخلاص بلاش شحططة على المسا.
♠ ادعى إنه مش عارف الطريق فقولتله هبحث على النت ونروح حسب الطريق اللى على الخرايط، المهم راح لوحده من غير نت ووصلنا لقيناهم قفلوا وكانت الساعة 9.20 وقالولي تعالي الصبح الساعة 9.
♠ كان عندي امتحان تاني يوم، ففضلت أقنع فيه نروح مركز سموم الجيزة وبالفعل روحنا، والدكتور قاللي ادفعي 250 جنيه بدل كشف ودمغة وإقامة أو تروحي الدمرداش.
♠ عم رمضان بأعلى صوته «قسما بالله منا رايح في حتة تاني عشان تبقى فاهمة؛ عايزه تدفعي وتاخديها خديها مش عايزة انا راجع على المدينة».
♠ اتضح إن الدكتور بيعمل مصلحة ومن هنا لهنا دفعت 70جنيه عشان إبره المفروض إنها ببلاش أصلا ورجعت الساعة 12.30 نص الليل.
التحقيق في الواقعة
وأشارت «السنهوري» إلى أنه تم استدعائها، اليوم الأحد، لمقابلة مديرة المدينة الجامعية وقدموا لها اعتذارا لما حدث، وأنه سيتم التحقيق في الواقعة، وأنها كتبت مذكرة رسمية بما حدث.
