متجوزة في «بيت عيلة»؟.. المرمطة والسعادة بين ايديكي انتي
«الجواز في بيت عيلة ده مرمطة وقلة قيمة، لأن فيه تدخلات في شؤوني ومشاكل من الهوا»، بهذه الكلمات تلخص رقية فوزي (اسم مستعار) تجربتها مع الزواج في بيت عائلة زوجها.
حالة «رقية» تتشابه مع فتيات كثيرات خضن نفس التجربة، ومنهن من نجحن في التأقلم مع الوضع والعيش بسلام وسعادة داخل «بيت العيلة»، وهن يقدمن خلاصة تجاربهن في هذا التقرير من «شبابيك».
ضعي حدودا
السر الأول الذي يجلب لكِ السعادة بناء على تجربة «شيماء» هو أن تضعي حدودا من البداية لعلاقتك مع أهل زوجك، تقول: «متطلعيش أسرارك لحد، ولا تهزري كتير، لأن ده ممكن يسبب مشاكل، والحدود دي بتخلي الكل يعملك حساب.. أنا عشان بحترم الصغير والكبير في البيت، الكل بيحترمني، وفي نفس الوقت هتعيشي حياة هادية».
اعتياد أهل زوجك على أن يكون لكِ حياة مستقلة، بحيث تقضي أغلب الوقت داخل شقتك، من أهم الحدود التي يجب وضعها أيضا، وفقا لـرحاب عبد الموجود، حيث ساعدها ذلك على أن تحيا حياة أكثر هدوءا واستقلالا.
تقول «رحاب»: «حماتي قعدة في الدور اللي فوق، لكن أنا مش بقعد معاهم الـ24 ساعة، لكن بعدي عليهم واقعد معاهم شوية، وباقي الوقت في شقتي، الحمد لله مفيش مشاكل جوهرية، لأني عملت حدود من البداية، وكمان هما ناس محترمين».
«الكلام على قد السؤال»
كثرة الكلام تتسبب في مشاكل لا حصر لها خاصة داخل «بيت العيلة»، لذلك قررت «إيمان» أن تلتزم الصمت أغلب الوقت عند تعاملها مع أهل زوجها، حتى لا تقع في خطأ يجلب لها مشاكل هي في غنى عنها: «أنا قاعدة في بيت عيلة وحياتي مستقرة، لأني مش بكتر في الكلام، لو سألوني على حاجة برد على قد السؤال بس».
المعاملة بالمثل
معاملة أهل زوجك بمثل معاملتهم يُريحك من مشاكل كثيرة، وفقا لتجربة أسماء مجدي (اسم مستعار). تقول «أسماء»: «أنا متجوزة بقالي سنتين في بيت عيلة، وفيه بيني وبين أهل جوزي علاقة ودية، لأنهم محترمين وأنا بعاملهم كويس، لكن أحيانا فيه ناس بيبقى طبعهم صعب، وفي الحالة دي المعاملة بالمثل هي الحل بردو».
توضح «أسماء»: «يعني لو لقيتي أنهم بيهتموا بيكي وبيسألوا عليكي لو تعبتي مثلا، فاهتمي بيهم بردو واسألي عليهم لو حد فيهم تعب، يعني اعملي بالمثل بالظبط».
مريان يونان تنصحك بنفس المضمون وترى أن الحل الأمثل للتأقلم وعيش حياة مستقرة داخل «بيت العيلة»، يتمثل في وضع حدود للتعامل، والمعاملة بالمثل، تقول: «بقالي 10 سنين متجوزة في بيت العيلة، أحسن حل إنك تحطي حدود للمعاملة ومتسمحيش لأي حد يتعدى الحدود دي، والمعاملة بالمثل يعني الكويس يتعامل كويس والوحش البعد عنه راحة تامة».
كلمة السر: «حاضر»
«حاضر»، هي كلمة السر للعيش بأمان وسعادة من وجهة نظر منار علاء (اسم مستعار) بعد تجربتها التي دامت 5 سنوات داخل «بيت العيلة» وتنصحك بـأن: «حاولي متقفيش قدام أهل جوزك، وتحديدا حماتك وحماكي، وخليكي مطيعة على قد ما تقدري، لو طلبوا منك إنك تساعديهم في حاجة، لكن في نفس الوقت متتحمليش فوق طاقتك أو إن يكون ده على حساب شقتك وجوزك».
وتستطرد «منار»: «حتى لو طلبوا مساعدة فوق طاقتك بلاش كلمة لأ وقولي حاضر لكن في الآخر اعملي على قد ما تقدري، ده هيخلي جوزك مبسوط منك طول ما انتي بترضي أهله، لكن المهم يكون ليكي حياتك الخاصة، يعني بلاش تقعدي معاهم غير ساعتين تلاتة بس في اليوم وباقي الوقت يكون في شقتك، عشان الطلبات متكترش كمان».
«خليكي في حالك»
لكي تجدي الراحة داخل «بيت العيلة» عليكِ أن تجعلي المثل الشعبي «ابعد عن الشر وغنيله» مبدأ لكِ، حيث تنقل لكِ نادية عماد (اسم مستعار) تجربتها: «أنا ماشية بمبدأ ابعد عن الشر وغنيله، مش بحاول اتدخل في اللي مليش فيه مع أهل جوزي، ولا بوجع دماغي بحاجة، واللي يقولي حاجة تضايقني بكبر دماغي واللي يشتكي من حد مش بديله عقاد نافع علشان مطلعش غلطانة في الآخر».
