هتنبسط في أسيوط.. ولو مش مصدق تعالى وهنقولك إزاي
«أسيوط يا قلب الصعيد يا حتة مننا» أغاني كتير اتعملت عن أسيوط واتغنت بحلاوتها، وأنت لازم ينوبك من الحلاوة دي جانب. فلو كنت مقيم في أسيوط أو رايح ليها اجازة يبقى لازم تزور الأماكن الفنية اللي موجودة في قصور الثقافة اللي هندلك عليها.
قصر ثقافة أسيوط
أول حاجة هتعملها هناك أنك هتروح قصر ثقافة أسيوط، وده يعتبر أكبر قصر ثقافة موجود فيها وبيتعرض فيه مسرحيات وحفلات لفرق موسيقية وغنائية مختلفة بجانب كمان أنه بيقدم مجموعة من الأنشطة الفنية المختلفة يعني هتقضي فيه أجازة آخر بهججة.
والأنشطة دي هتفيدك جدًا، يعني لو أنت عايز مثلًا تاخد ورشة تمثيل تقدر تروح القصر وتسأل على التفاصيل بتاعت الورشة ومش محتاج أنك تروح لمحافظة تانية زي القاهرة مثلًا على اعتبار أن فيها فرص لورش كتير، لأ أنت هتلاقي اللي عايزه جوا محافظة أسيوط.
قصر الثقافة هتلاقيه موجود في وسط مدينة أسيوط في ميدان البنوك. أه نسيت أقولك كمان أن القصر فيه نادي سينما بيعرض أفلام أجنبية قديمة منها اللي سبق وحاز على جايزة الأوسكار. ومن هنا تقدر تدخل وتتفرج على فيديوهات من العروض اللي بتم داخل القصر.
قصر أحمد بهاء الدين
طبعًا أسيوط مفيهاش قصر ثقافة واحد لأ ده فيه قصر تاني مهم جدًا برضه أنك تروحوا بعد زيارتك لقصر ثقافة أسيوط وتشوف العروض اللي بيقدمها. وهو قصر أحمد بهاء الدين، واتسمى القصر بالأسم ده تكريمًا للصحفي والمفكر المصري أحمد بهاء الدين، والقصر موجود في قرية الدوير مركز صدفا.
والقصر ده متخصص أكتر في الأنشطة الفنية الخاصة بالطفل يعني لو فيه أطفال معاك وعايز تخليهم يتبسطوا تقدر توديهم المكان ده وأنت تروح تتبسط في قصر ثقافة أسيوط اللي كلمتك عنه. تقدر من هنا تدخل على صفحة قصر أحمد بهاء الدين. القصرين دول بقى يعتبروا أبرز الأماكن اللي بتقدم عروض وأنشطة فنية في محافظة أسيوط.
السينما
هيكون فيه نادي سينما في قصر ثقافة أسيوط زي ما قولتلك، بس السينما في المحافظة تتعد على صوباعين فقط لا غير يعني عندك نادي السينما ده، وفيه سينما صيدناوي اللي موجودة في مول صيدناوي وسط مدينة أسيوط أمام محطة السكة الحديد.
هتستغرب وتقولي إزاي محافظة كاملة مفيهاش غير العدد القليل ده من السينمات؟ هقولك إن كان فيه سينمات زي رنيسانس وكمان كان فيه سينما صيفى بس للأسف اتهدوا واتبنى مكانهم أبراج. بس الأماكن اللي قولتها ليك هتقدر برضه أنك تستمتع وياها بجو السينما فأفرح كده وانبسط.
