في دمياط.. هتنبسط بالفن وتتمشى على اللسان في هوا يرد الروح
الأغنية بتقول أيه؟ «لما نقول الجدعنة وأجمل الصفات يبقى أكيد لازم نقول دمياط»، وأنا من موقعي هذا بقول لما تحب تخرج في أماكن سواء فنية أو ثقافية يبقى تروح دمياط. ولو أنت فيها دي حاجة عظيمة جدًا لأني هخدك في جولة أعرفك فيها على كل الأماكن اللي تقدر تحضر فيها عروض وأنشطة فنية.
مستعد نبدأ؟ تمام يبقى يلا نبدأ بزيارة قصر ثقافة دمياط، والحقيقة أغلب محافظات مصر بيكون فيها قصور ثقافة بتضم مجموعة من الأنشطة والعروض الفنية المختلفة اللي بتساعد أهل المحافظة في أنهم ينموا مواهبهم ويتمتعوا برؤية العروض.
وقصر دمياط لما تروحوا في شارع عمر أفندي هتلاقي فيه حفلات غنائية، وعروض مسرحية، وأمسيات شعرية، وكمان فيه كورال أطفال، ومعارض فنون تشكيلية وغيرها من الحاجات اللي هتتبسط لما تشوفها. وكمان أنصحك برضه تعدي على مكتبة مصر العامة في منطقة الأعصر على كورنيش النيل وهتلاقي فيها برضه أنشطة، ومعارض، وندوات ثقافية وفنية مختلفة بتتعمل جوا المكتبة.
دول أبرز الأماكن الفنية والثقافية في دمياط، أظن عرفت عنهم شوية. تعالى بقى نطلع على راس البر اللي تعتبر بؤرة وجود أي مكان فني أنت عايز تروحوا بجانب كمان أن فيها سينمات مختلفة. يعني في البداية كده هتلاقي عند منطقة اللسان، اللي الهوا فيه هوا يرد الروح بمعنى الكلمة، مسرح مكشوف بيتعرض فيه أمسيات فنية وثقافية.
ده غير أن عندك السيرك الفرنسي والروسي والإيطالي. والحقيقة فقرات السيرك بتبقى ممتعة جدًا يعني هتلاقي فيه فقرة المشي على الحبل، والمروحة الدوارة، وأكروبات النار، وفيه كمان رقصات أسبانية استعراضية. وعندك أكروبات الكرات والزجاجات وغيرها من الفقرات.
ومش بس فيه سيرك ده كمان فيه ملاهي وكل ده موجود في منطقة 109، ودي منطقة معروفة هناك. ركز بقى في الجزئية دي: شارع النيل، وشارع بورسعيد، ومنطقة الخليج، والسوق الكبير، كل الأماكن دي بيكون فيها كافيهات وليها ميزة عن غيرها بمعنى أن هتلاقي مثلًا كافيه بيبقى فيه فقرة فنية، وكافيه تاني بيعرض فيلم وهكذا.
يعني في منطقة الخليج فيه كافيه اسمه «أيلاند» بيتعرض فيه فقرات غنائية. وده غير كمان الكافيهات اللي موجودة على شط البحر اللي هتلاقي بعضها بيعرض أفلام على شاشة عرض وبعضها التاني بيشغل أغاني على كيفك تتسلطن وياها مع هوا البحر.
بالنسبة بقى لو عايز تحضر فيلم، عندك سينمات زي «سينما اللسان»، وسينما موجودة في مول اسمه «حسان» في السوق الكبير، وفيه كمان سينما موجودة في منطقة 101، وسينما في شارع النيل. هتسألني وتقولي أروح إزاي الأماكن دي؟ أرجع وأقولك الأماكن في راس البر عبارة عن أوضة وصالة لو سألت أي حد هيدلك فمتقلقش وحط في بطنك بطيخة صيفي.
