4 أماكن تجنب الجلوس فيها بالميكروباص

«كراسي الميكروباص مش زي بعضها» مثل جديد مستوحى من المثل المعروف، «صوابعك مش زي بعضها».

أصل الحكاية إن فيه كراسي في الميكروباص أماكنها تعتبر استراتيجية، وفيه كراسي تانية من الأفضل إنك متركبش فيها لأسباب مختلفة، هنوضحها في الموضوع ده.

الكرسي اللي جنب السواق

متفكرش في مرة إنك تقعد جنب السواق، وبالذات لو كنت آخر الشهر، لأنك لو قعدت جنبه هيدبسك في دفع أجرة الكرسي التاني، لأن أغلب سواقين اليومين دول بيحبوا ياخدوا راحتهم في المكان وهما بيسوقوا علشان كده مينفعش غير واحد بس اللي يقعد،غالبا بيكون نظام تدبيس، يعني بيخليك تركب ويطلع بالعربية ولما تديلوه الأجرة، يقولك هنا اتنين مش واحد، في الحالة دي هيكون قدامك حل من اتنين، إما تتخانق أو تدفع وإنت ساكت، غالبا الحل التاني هو الأسلم.

كمان فيه سبب تاني يخليك متفكرش تقعد جنب السواق، لأن في كتير من السواقين بيقولو "الكرسي محجوز" وهو في الأساس مش حجوز.. ليه بقى؟ السواق من دول بيكون مستني أي بنت تيجي عشان تقعد جنبه ويبصبصلها.

الكرسي اللي ورا السواق

مشكلته أكبر، لأن اللي بيقعد فيه لازم يتحول من راكب عادي لـ "تباع" مسئول عن لم الأجرة، من الصعب إنك تقدر تلم الأجرة وتسلمها للسواق بسلام، لأن في الغالب بيحصل لغبطة، فممكن يكون فيه حد مدفعش وبيتهيأله أنه دفع، أو حد ملوش مزاج يدفع، أو انت أصلا عندك عقدة من الرياضة ومبتعرفش تحسب.

وبعد ما تدي السواق الأجرة، غالبا هتسمعه بيقول "الأجرة ناقصة يا جماعة مين اللي مدفعش"، بعد السؤال ده هيكون فيه صمت رهيب ومحدش بيجاوب، في الحالة دي هتكون إنت المسئول الوحيد، بكده هدخل نفسك في مشاكل ووجع دماغ إنت في غنى عنه.

الكرسي القلاب

منه نوعين، الأول: بيكون ورا السواق، لكن المشكلة الأساسية فيه أنه بيكون قصاده ركن صغير جدا، المكان ده فيه سواقين كتير بيحبوا يستغلوه ويقعدوا حد عليه، في الحالة دي مش هيكون مجرد حد قاعد قدامك، لأ ده لاصق فيك، إنت مش عارف تتحرك لا يمين ولا شمال، غير الإصابات اللي ممكن تحصلك، لو الشخص اللي قاعد في الركن ده حب يتحرك، ممكن مثلا عينك تتفقع أو رجلك تتهرس، حتى لو كنت واخد وضع الإنكماش.

النوع التاني، بيكون ورا النوع الأول، اللي قاعد عليه بيضطر يقوم ويقعد من 3 لـ 5 مرات تقريبا، ممكن أكتر أو أقل إنت وحظك، لأن بيكون وراك ناس نازلة في محطات مختلفة، في الحالة دي المفروض تعمل تمارين رياضية كل كام دقيقة لأنك بتفتح الباب لكل واحد عايز ينزل، تنزل كمان علشان تنزله وبعدين تركب تاني، المشكلة بتزيد لما تكون شايل شنط لأن سرعتك هتقل في الحالة دي.

السبنسة

السبنسة وهو الكرسي الأخير.. تعتبر مشكلته أقل مقارنة بمشاكل الكراسي السابقة. مشكلته الرئيسية هي إنها ممكن تسبب صداع مزمن بسبب السماعات اللي السواق بيحطها آخر الميكروباص علشان يضمن إن الناس اللي قاعدة ورا تسمع صوت الكاست كويس، الحقيقة انت مش هتسمع الصوت بس، لأ انت كمان هتحس إن صدى الصوت بيتردد جواك.