خلي بالك وأنتي راكبة الميكروباص.. نصائح هتوصلك بالسلامة
الميكروباص صعب جدا تستغني عنه، بس ممكن في يوم تكرهيه ومتركبيهوش أبدًا وده لو مخدتيش بالك من الحاجات دي.
اختيار المكان
اختاري المكان المناسب اللي تقعدي فيه اللي متحسيش فيه إنك قلقانة. ممكن تقعدي في الكنبة اللي ورا جنب الشبالك اللي برا مش اللي جوا عشان يبقى سهل عليكي إنك تنزلي على طول أو تقعدي جمب أي ست.
ولو عايزة تقعدي قدام جنب السواق يبقى لازم الكرسين اللي جمب السواق يكونوا فاضيين وتدفعي تمن تذكرتك وتذكرة الكرسي اللي جنبك.
عشان يكون فيه مسافة بينك وبين السواق ومتقعديش أبدًا جنبه ومفيش مسافة بينكوا عشان ميحصلش إنه يتحرش بيكي. صحيح مش كل الناس وحشة بس الإحتياط واجب فخليكي في الأمان وإختاري المكان المناسب ليكي.
سيلفي تحرش
لو لمحتي إيد حد هتلمسك إجهزي بسيلفي الموبايل على طول وصوريه بسرعة جدًا وبعد كدة إمسكيه هزقيه ولو مثل فيها دور البريء وقال إنو معملش حاجة طلعي دليل إدانته، وهى الصورة اللي إنتي مصوراها ليه وبكده إنتي بتثبتي حقك جامد قصاد اللي هيقولك كلام زي «متتبليش عليه الراجل معملش حاجة» والكلام اللي زي ده وممكن كمان ترفعي عليه قضية.
ولو ملحقتيش تاخدي صورة إمسكي إيديه بكل قوتك وفرجي عليه الميكروباص ومتسكوتيش عن حقك ومتسمعيش لحد بيقولك خلاص يا أنسة والكلام اللي من النوعية ديه.
متركبيش لوحدك
لقيتي ميكروباص فاضي ورايح كمان للمنطقة اللي إنتي رايحة ليها أوعي تركبي فيه لوحدك وتقولي أنا مستعجلة والوقت متأخر عشان لا قدر الله ميحصلش إنو يخطفك ويأذيكي.
متكمليش معاه
لو كنتي رايحة التحرير مثلًا و قعدتي تسألي كل ميكروباص معدي قدامك رايح التحرير ياسطى ويقولك لأ رايح رمسيس فإضطريتي تركبي معاه وقولتي لنفسك أنزل رمسيس وأركب حاجة تانية للتحرير.
وبعد لما وصل رمسيس ونزل الناس كلها قالك إستني هوديكي التحرير يا أنسة متستنيش خالص لوحدك وإنزلي ومتكمليش معاه خالص عشان هو كدة شخص مش دوغري قالك في الأول مش رايح وبعد كده قالك رايح يبقى الموضوع مقلق وفيه خطر عليكي، فإنزلي وشوفي مواصلة تانية.
اعملي حدود مع الناس
وأنتي راكبة الميكروباص اعملي حدود بينك وبين الناس اللي راكبة. يعني لو حد كان لازقة كده وعمال يتكلم وعايزك تتكلمي خليكي حادة في ريأكشنك معاه ومتديش ليه وش.
