قواعد رمضان الأربعون.. عيش شهر الصيام والعبادة بكل تفاصيله

كل سنة وأنتم طيبين، رمضان جديد هل علينا بكل ما فيه من أكل وشرب ونوم وصيام وجوع وعطش.

رمضان ضيف سريع مهما حسيناه تقيل علينا، وبنيجي قبل العيد بشوية ونقول: كمل بدري بدري! لكن مش ده موضوعنا النهاردة.

عاوزين نسأل الأسئلة المهمة، نعمل إيه عشان الشهر يعدي خفيف ونطلع منه بأكتر استفادة في النواحي التعبدية والجسمانية كمان؟

عشان كدة جمعنا ليكم 40 قاعدة لرمضان، لو مشينا عليها، نقدر نوصل لدرجة معقولة من الرضا خلال الشهر الكريم.

القواعد الـ10 لعبادة سهلة 

رمضان شهر الحسنات والأجر والثواب، إزاي بقى تتعبد من قلبك مش تصلي وتقرأ قرآن زي المكنة وخلاص؟

• من أولها كدة، مش ضروري تختم القرآن مرتين وتلاتة وعشرة، الحقيقة لو ختمته مرة واحدة بفهم وتدبر هيكون أحسن كتير ليك بعد رمضان كمان، الموضوع مش سباق في سرعة فر المصحف.

• مصحف السنة اللي فاتت ضاع في الأغلب، يستحسن تشتري واحد تاني، وأهو لو لقيت القديم يبقى تهدي الجديد لحد تاني وتكسب ثواب قراءته.

• القراءة في المواصلات هتريحك أوي، منها تستفيد بالوقت الضايع، ومنها تكسب أجر القراءة.

• القراءة بالتفسير مزاج تاني صدقني، وأسهل مصحف هو «التفسير الميسر» اللي هيخليك تفهم كل آية وتفكر فيها لو لثواني، التفكير ده نفسه عبادة.

• مع القرآن ممكن تقرأ كتب تانية في الدين ممتعة جدًا، زي سيرة النبي (ص) أو كتاب الأحاديث القدسية، هيفرق معاك جدًا لو مكنتش قرأته قبل كدة.

• صلاة التروايح سنة عظيمة وثواب كبير، لكن مش لازم تصلي كل يوم بجزء إلا لو تقدر، عشان تعرف تركز مع قراءة الإمام، اختار الجامع اللي يناسبك ومتنساش إن الفروض هي الأساس.

• الصدقة مهما كانت قليلة هتنفعك طول رمضان، خصوصًا في آخر 10 أيام، وإياك تنسى زكاة الفطر.

• خليك فاكر إنك لو فطرت لسبب أو لآخر، بلاش تعلن ده عشان مشاعر اللي حواليك على الأقل، ولو مدخن إوعى تشرب سجاير قدامهم.

• لو نسيت وأكلت – يا بختك – يبقى مفيش مشكلة، لكن خليك فاكر أن المضمضمة الكتير مش لطيفة!

• حديث نوم الصايم عبادة طلع ضعيف على فكرة، يعني مش لازم تنام النهار كله وتضيع عليك الثواب وقت الصوم.

القواعد الـ10 وسط اللحمة والهبرة

أيوة أنت جعان طول النهار 16 ساعة وهتاكل، بس خليك فاكر إنك بني آدم من لحم ودم وإن لجسمك عليك حق.

• السحور مهم، وهيفيدك جدااااا في المجاعة اللي هتحسها، بلاش تهمله.

• مفهوم طبعًا إنك جعان، بس افتكر إن معدتك مش غسالة جامبو، بلاش تملاها على الآخر بعد ما فضلت فاضية طول النهار.

•  النوم بعد الفطار على طول مؤذي، استنى شوية المعدة تهدى.

• اشرب 3 لتر ماية ع الأقل بين الفطار والسحور، عشان تعرف تستحمل تاني يوم.

• الحموم على قد ما تقدر، خصوصًا في الحر اللي إحنا فيه.

• السلطة مهمة أوي ع الفطار والسحور، برضه هتقلل عطشك جدًا.

• بلاش ملح بزيادة في الأكل، عشان متفقدش كل الماية اللي حوشتها.

• بعد الفطار اشرب حاجات مهدئة، كركديه أو ينسون، ده هيساعدك على مقاومة غياب الشاي والقهوة طول الصيام.

• بلاش تسهر كتير وتنام قليل، خد كفايتك من النوم وإلا هيتضاعف عليك تعب الصيام.

• لو جعت تاني بعد الفطار، مش لازم لحمة ورز وفراخ، قضيها خضار وفاكهة شوية لغاية طبق الفول في السحور.

القواعد الـ10 للحفاظ على العِشرة

أهلك وصحابك والناس اللي حواليك، تعاون معاهم اكسبهم في الشهر ده كويس.

• حكاية الفطار مع صحابك مش نافعة في الأغلب، إلا لو مرتب لها من رمضان اللي فات، متزعلش من حد لو مقدرش يجيلك.

• لو نويت تبطل سجاير، صاحبك اللي هيعزم مش هينفعك، على الأقل اتفق معاه على كده.

• لو متجوز، بلاش تحنس نفسك مع الجماعة، ابعد عن أي مقدمات للعلاقة في الصيام عشان سلامك النفسي حتى.

• لو هتعمل رجيم في رمضان، ابعد برضه عن صاحبك الأكيل اللي هيبوظلك النظام كله.

• بلاش نقاشات حادة في الصيام مع زمايلك في الشغل، صدقني مش وقتها خالص.

• لو لقيت حد ناسي وأكل قدامك، مش لازم تعمل هيصة وهليلة عشان تفكره، فكره بالهداوة.

• لو هتصلي التروايح، بلاش تاخد ولادك معاك إلا لو هتعرف تسيطر عليهم، لأنهم مش هيصبروا لغاية الآخر في الأغلب.

• صلة الرحم في رمضان فرصة هايلة إنك تزور قرايبك ومعارفك، منها تشوفهم ومنها برضه ثواب كبير، ومتنساش تتصل بيهم طبعًا.

• رمضان فرصة جميلة عشان تصالح حد متخانق معاه أو غلطان في حقه، جرب واتصل اهو تبقى عملت اللي عليك وكأنك بتهنيه وخلاص.

• شوف لك صاحب وروح معاه الجيم، هتفرق معاك كتير أوي في رمضان مع الأكل القليل.

القواعد الـ10 مع المسلسل والنشرة

رمضان موسم تليفزيوني بامتياز، والفن فيه للركب، بس لو هتشوف كل حاجة هتحتاج 5 رمضانات على بعضهم.

• لو مش ناوي تشوف أي مسلسل الموضوع في إيدك، كل ده على النت والحياة حلوة.

• حدد من دلوقت هتشوف مسلسل إيه، وهاته على الفطار أهو كده كده هتاكل وتشوفه.

• مسلسلين أو تلاتة بالكتير عدد مناسب عشان تعرف تعمل حاجة تانية في الشهر، إلا لو كنت شغال ناقد فني بقى.

• بلاش تقع في الفخ وتشوف كل المسلسلات على التليفزيون، الإعلانات هتضيع وقتك كله، افتكر اختراع اسمه اليوتيوب موفر جدًا.

• مهما الناس حكت لك عن روعة المسلسل اللي مشفتوش، متصدقهمش وخليك في مسلسلك لبعد رمضان.

• حاول تطلع بفايدة من المسلسل!، مش بس مجرد مشاهد وخلاص، أي مغزى أو فكرة تتناقش فيها مع غيرك.

• المسلسلات الدينية مفيدة جدًا والله، وصدقني بتكون مسلية زي العادية بالظبط.

• اختار برنامج ديني تتفرج عليه، التليفزيون مش تمثيل وخلاص.

• فيه قناة اسمها ماسبيرو زمان هترجع بيك 50 سنة لورا، جرب تشوفها مرة وتقارن بين زمان ودلوقت.

• بلاش مسلسلات وأفلام وقت الصيام على قد ما تقدر، يمكن ده ييخصم من رصيدك.