رشدي أباظة.. دنجوان ما ينفعش واحدة تقوله لأ

رشدي سعيد بغدادي الشهير بـ«رشدي أباظة»، أو «دنجوان السينما المصرية»، من عيلة شركسية معروفة اسمها «الأباظية»، وبدأ رحلته مع السينما بفيلم «المليونيرة الصغيرة» و بعدها كمل وعمل سلسلة أفلام كتيرة كان فيها دايماً ما ينفعش واحدة تقوله لأ.

لما حبت قسمت أباظة توصف والدها بكلمة قالت عنه إنه «زير نساء» من غير أي كسوف، لأن والدها نفسه كان بيفتخر بكده. وحكت «قسمت» عن والدها إنه برغم تعدد علاقاته النسائية إلا إنه كان مخلص لحبه القديم «كاميليا» اللي مرة كانت بنته بتشغل مزيكا وهما في شقتهم في وسط البلد وسامية جمال موجودة افتكرها وقال «يا حبيبتي يا كاميليا، موتي في عز شبابك» وعلى الرغم من غيرة «سامية» عليها إلا إنها مكنتش بتهتم.

«السرقة» في السينما.. عرض مستمر من أيام إسماعيل ياسين

الرجل الثاني

جواز رشدي أباظة من سامية جمال جه في وقت تصوير فيلم «الرجل الثاني» بعد ما وقع في حبها، وكان ساعتها متجوز والدة قسمت الأمريكية «بربارا» وهي كانت مش مهتمة بعلاقاته وبرغم إن تحية كاريوكا (زوجة رشدي الأولى) حذرتها من طريقة تعامل «سامية» مع «رشدي» قالت لها «خدي بالك، سامية هتخطف رشدي منك» إلا إنها مصدقتش، وفي الوقت ده كانت «سامية» بتهتم بيه وبتعمل له الأكل أثناء التصوير وكانت ناعمة معاه زي ما معروف عنها.

استمتع.. أفلام مصرية مقتبسة من روايات أجنبية

أنا أخاف

«الدنجوان» إتجوز الفنانة «صباح» بسبب تحديها ليه في وقت سفرهم لتصوير فيلم، لأنها قالت له «إنت ما تتجرأش تتجوزني عشان بتخاف من سامية» فقالها «أنا أخاف؟ طب تعالي على المأذون»، ولما سامية جمال عرفت الخبر اتعاملت مع «رشدي» بكل حكمة واستقبلته في المطار واتعاملت معاه كأن مفيش حاجة لحد ما هو قالها وطلقها من نفسه وكل الوسط أشاد بحكمة «سامية» في التعامل اللي خلت «رشدي» يحس بالذنب من غير أي مناقشات جارحة.

رشدي أباظة اتجوز 5 مرات، أولهم تحية كاريوكا وبعدها «بربارا» وبعدهم «سامية» اللي قضى معاها 18 سنة من عمره لكن انفصلوا في الأخر، وصباح زوجته الرابعة أما الأخيرة كانت بنت عمه نبيلة أباظة.

«من فوايد السينما».. 3 أفلام مصرية غيّرت القانون

اما عن حب رشدي أباظة لـ«ماجدة» فكان «حب امتلاك» زي ما وصفته «ماجدة» وحكت حوار ما بينهم بعد ما صارحها بحبه وجابلها «خاتم الخطوبة» قالتله:

صدقني يا رشدي، أنا مش برفضك لشخصك، لكن المبدأ نفسه، أنا ليا مواصفات خاصة أوي في الحب وفي الشخص اللي هاحبه، يمكن تكون موجودة في خيالي بس، في مواصفات لأي راجل ممكن متكونش موجودة في رشدي أباظة؟، هو ده يا رشدي.. هو ده.

«رشدي» رد عليها وقال: هو إيه اللي هو ده؟ فردت «ماجدة»: هو ده اللي أنت عايز ترتبط بيا علشانه.. أنه مينفعش واحدة تقول لرشدي أباظة لا.

“الفهلوة” في الأفلام المصرية

عدوة الرجالة

ولما رشدي أباظة حس بإهانته عشان إترفض قالها «إنتي عدوة الرجالة» فردت عليه بدبلوماسية وخلصت الحوار وقالتله «زي مابيقولوا عليّ بيقولوا أكتر عليك، ومينفعش نصدق كل اللي بيتقال».

رشدي اللي اتولد في 3 أغسطس، واتوفى زي النهارده (27 يوليو) بسرطان في الدماغ بعد صراع مع المرض وكانت نبيلة أباظة هي زوجته الحالية اللي اتجوزها قبل وفاته بسنتين.