مجموعك قليل في الثانوية العامة.. ولا يهمك «ركز في الكلام ده»
لو كنت طالب في الشهادة الثانوية العامة، وحصلت على مجموع قليل، لا يؤهلك لدخول كلية من كليات القمة أو الكلية اللي بتطمح فيها، أنصحك بأن تتوقف عن البكاء على اللبن المسكوب.. «اللي حصل حصل».. وركز في الكلام اللي هقولهولك هنا.
مبدئيا كده أنا خريج حقوق، وشغال صحفي "يعني مش باقي على حاجه"، فالكلام اللي هقولهولك خلاصة تجربة شخصية.
أول حاجه لازم تعرفها إن "مفيش حد في البلد دي بيشتغل بالشهادة بتاعته" ودي مش حاجه أنا بس اللي توصلت ليها.. لأ 99% من خريجي الجامعات اكتشفوها بعد التخرج.
إذا حطمت الثانوية طموحك فإليك الخطة البديلة
طيب أعمل إيه؟
لازم تسأل نفسك دلوقتي تعمل إيه، بس عشان تعرف تجاوب على السؤال ده لازم تحدد أنت عايز إيه؟.. حاول تحدد مجال تشتغل فيه بعد التخرج من الجامعة أو خلال دراستك الجامعة.. يعني لو عايز تشتغل في مجال «الجرافيك» ولا التسويق الإلكتروني، ابدأ خد كورسات من وأنت في أولى جامعة في المجال اللي أنت حابه وطور نفسك فيه.
ولو أنت مش عارف تحدد كويس المجال اللي انت عايزه ممكن تسأل ناس أكبر منك وأكثر خبرة، أو تبحث عن المجال اللي متوقع أنه يشهد ازدهار ونمو خلال السنين اللي جايه، زي مجال برمجة تطبيقات الهواتف الذكية مثلا.
مهم جدا في أي مجال أنت بتفكر فيه وهتسعى تاخد كورسات لتطوير مهاراتك فيه أنك تتعلم لغة تانية.. الإنجليزي مطلوب طبعا، فممكن تتقنه أو تشوف لغة تانية زي الإسباني مثلا لو بتفكر تشتغل صحفي رياضي، لأن المواقع الرياضية المصرية مثلا بقت مهتمة بمتابعة الدوري الإسباني، فلو أنت معاك لغة ممكن تشتغل محرر ومترجم صحفي، وده ممكن يكون بوابة للعمل في مؤسسات كبيرة زي «بي إن سبورتس» أو «سكاي نيوز».
طيب بالنسبة للكلية؟
بالنسبة للكلية في ضوء الكلام اللي فوق أنت محتاج كلية تكون الدراسة فيها نظري مش عملي، عشان يكون عندك وقت تقدر تاخد فيه كورسات وتطور نفسك خلال مرحلة الدراسة في الجامعة، وفي نفس الوقت بتذاكر موادك في البيت.
أنا كنت بحلم أدخل كلية من كليات الصحافة الإعلام، ورغم إني جبت مجموع كويس يخليني أدخل كلية منهم، قررت أدخل حقوق، وهي من الكليات اللي دراسة فيها نظري.. عايز اقولك إني حضرت أقل من 6 محاضرات تقريبا طول الأربع سنين بتوع الكلية، بس من وأنا في 3 كلية كنت اشتغلت في مجلة رياضية، لأن دراستي في كلية الحقوق أتاحت ليه أني اتعلم مهارات في المجال اللي قررت أني اشتغل فيه بعد الكلية.
وبعد التخرج، وخلال شغلي في الصحافة برضو كنت بحاول اطور من مهاراتي واتعلم مجالات جديدة عشان لو حابب اشتغل في مجال تاني في المستقبل أقدر اعمل ده بسهولة لأن شهادة الكلية عادي "ممكن تبلها وتشرب مايتها" لو أنت اتعلمت لغة وخدت كورسات بتأهلك لسوق العمل صح.
