الباز لعبدالله رشدي: «أنت شخص بجح وطلعت عيل صغير ودي آخر مرة هتكلم عليك»
استكمل الإعلامي محمد الباز هجومة الحاد، على الشيخ عبدالله رشدي، إمام وخطيب بوزارة الأوقاف المصرية، للحلقة الثالثة على التوالي، بعد أن نشر رشدي فيديو للرد على البازووصفه قائلا: «انت محتاج تتعالج نفسيا».
وقال الباز خلال تقديم حلقته ببرنامج 90 دقيقة المذاع على قناة المحور، مساء السبت، «والله دي آخر مرة هتكلم على عبدالله رشدي، بعد ما اثبتنا أنه متحرش جنسيا على النساء بصفحته بمواقع التواصل، لكنه شخص بجح وكلح بعد ما ظهر في فيديو بيهاجمني فيه وبيستمر في نشر الأكاذيب».
وأضاف مقدم برنامج 90 دقيقة، «انت بتاجر بالإسلام وبتتكسب من هذا الأمر وطلعت عيل صغير، ومفيش حد يدفع فيك مليم علشان نهاجمك زي ما أنت بتقول في فيديوهاتك، لكنك شخص تكذب كما تتنفس، ودوري إني أوعي الجمهور العريض اللى بيكذب عليهم»، متسائلا كيف يستقيم أن يكون في داعية ويكذب ويتعامل ببجاحة؟.
وتابع الباز «انت ليه مش بتروح الجامع بتاعك ياعبدالله، حرام عليك بتاخذ فلوس حرام من الأوقاف، وأنا لا أدخل معارك مع جبناء مرة ثانية».
ومنذ أيام، نشر الجروب الرسمي للشيخ عبدالله رشدي، إمام وخطيب بوزارة الأوقاف، فيديو للرد على الهجوم الحاد الذي شنه الإعلامي محمد الباز، خلال تقديم برنامج 90 دقيقة بقناة المحور على الشيخ عبدالله رشدي.
وقال رشدي في الفيديو المنشور على المجموعة الخاصة به وتضم 200 ألف متابع، «عاوز أرد على الأخ محمد الباز، واعرفه إن قناة المحور ملهاش بابا خلفي، ومفيش حد بيدخل يعمل برنامج في القناة من الباب الخلفي، وكنت بقدم البرنامج بتاعي بالاتفاق مع القناة، بس انت شكلك قاعد على الهواء مش عارف بتقول إيه».
وأضاف رشدي، «كنا بشتغل وبنحاول نقدم الخير للناس على قد ما نقدر، أحب أقولك يا باز معلوماتك كلها غلط عن مؤسسة سقيا الماء، وأنت مش عارف حاجة، وكنت بعرض انجازات هذه المؤسسة المسجلة بوزارة التضامن فحاول تسأل ولما تسأل وتعرف الحقيقة كن شجاعا واعترف بغلطك فى الحلقة القادمة».
وأكمل الشيخ عبدالله رشدي، «لم يتم وقف البرنامج الخاص بي بسبب النصب وهذا الأمر وفق تخيلات الباز الشخصية، وأحب أقولك انت محتاج تتعالج نفسيا لو عندك مشكلة في فعل الخير وتشوف مشكلتك فين».
وتابع رشدي، «أنت بتحاول في البرنامج بتاعك تجيب أي حاجة تثبت إني بتطاول أو بهين أو بشتم الجيش المصري العظيم، وهذا لم يحدث، انت ايه مشكلتك معايا، لازم تحترم عقول المشاهدين والمهنية الاعلامية في برنامجك، حلقتك كلها كانت خربانة ومكنش في أي داعي انك تظهر كمية الغل الرهيب اللى جواك من نحيتي، ومعرفش غيه سبب هذا الأمر».
وأكمل رشدي، «خلي أسلوبك لطيف ومحترم وبلاش تقلل من اللى بتتكلم عليه، أنا ممكن اتريق عليك واجبلك أسماء الطيور والحيوانات، واعمل مسخرة منك لو عاوز بس ده لا يليق بيا ومش هعمل زيك».
