يوسف شاهين.. الخواجة وبنات البلد(3)
اتكلمنا في الحلقة اللي فاتت من حلقات حكايات يوسف شاهين مع بنات البلد، عن قصته مع يـسـرا، وقبلها اتكلمنا عن جكايته مع فاتن حمامة.. النهارده هنتكلم عن حكاية جديدة من حكايات "الخواجه"..
"جو وبلبلة"
أول احتكاك ما بين يوسف شاهين والفنانة نبيلة عبيد "بلبلة" كان في فيلم الآخر، الشغل مع "جو" كان حلم بالنسبة لـ"بلبلة" وإتحقق، لكن أول مشهد صورته مع يوسف كان صدمة بالنسبة ليها..
سبب الصدمة
كان التصوير في "سانت كاترين" وبعد المشهد لقت المخرج خالد يوسف جاي بيكلمها عن إن "جو" متضايق منها وهيعمل إجتماع معاها ولازم تستعد، ولما قعدوا مع بعض "جو" قالها إنه مش مبسوط بالمشهد وكمان الماكياج مش عاجبه..تاني يوم قررت تقلل الماكياج وراحت تصور مشهدها، لكنه برضه علق على أدائها فقررت تقول إنها معتذرة عن الفيلم يمكن يحصل تغيير في المعاملة، بس المفاجأة في إن يوسف شاهين ماعترضش وقبل اعتذارها.
قررت نبيلة عبيد عشان ما تمشيش من الفيلم ومحدش يعرف إنها مش هتكون بتمثل فيه إنها توقع نفسها وتعمل إنه ضهرها إتوجع ومش هتقدر تتحرك لفترة، الكل صدق لكن "جو" لأ.. راح لها أوضتها في وقتها وقالها إنه كان بيهزر معاها هزار "تقيل" وإن ده عشان يطلع منها أداء أحسن مش أكتر وقالها "يلا قومي، عندنا شغل"، ومن بعد الموقف ده نشأت ما بينهم علاقة صداقة.
رأي مختلف
ولما إتسألت نبيلة عن فيلم "الآخر" كتير وإتقال إنها بنت يوسف شاهين عشان إتطبعت بطباعه في الفيلم ده وخدت الشخصية اللي عايزها بأدائه هو بس كأن رأيها مختلف وقالت : “بالعكس أنا الوحيده التي فلتت من تأثير يوسف شاهين في أدائي للدور، ولكن هذا الدور مختلف عن أعمالي السابقه تماما، وكان دور سيدة أمريكية ذهبت من أجله خصيصا لأمريكا كي أشاهد العلاقات التي تحدث ما بين الأبناء وآبائهم هناك”، بس قالت إن "جو" مدرسة إتعلمت منها ماغيرتش في أدائها.
إنتظروا الجزء الرابع من الخواجه وبنات البلد..
اقرأ أيضا:
