ياسمين الصاوي تكتب: أكلك منين يا خروفي
أكيد قابلت قبل كده الناس اللي عاملة نفسها "فافي" أوي و"يع" و"ياي" ،وأول ما يسمع عن الأكل الصيني مثلا تلاقيه يقولك "يععع..ياي..دول بياكلو صراصير..ولا الكلاب..ياي" وتحس أنه قرفان أوي، وبيصحى كل يوم الصبح ياكل بسبوسة ويشرب ميرندا تفاح أخضر، ويقولك احنا شعب نضيف ما ياكلش القرف ده.
تعالى ياسيدي اتفرج على عيد الأضحى عندنا، أول ما الخروف يدبح بس أنسى أن واحد مصري ممكن يفرط في حتة من الخروف، يعني أمعاء الخروف بتبقى سجق وممبار الأكل الشعبي للمصريين، ورجليه تبقى كوارع، وعينيه يقولك دي الجوهرة، ولا مخ الخروف يتقلي ويتعمل عليه حفلة، ده كمان في سندوتشات لسان، وطبعا كل عضو من أعضاء الخروف هيتاكل فشة بقى وكرشة وكبدة وكلوة وقلب، واللحمة دي الأساس طبعا موزة وكتف وفخذ، ده حتى الدهون بتتاخد وتتسيح وتبقى زي السمن تستخدمها في الطبيخ والقلي، يانهار ابيض ده احنا حالفين نفصص الخروف حتة حتة، وما نفرطش في مليم دفعناه فيه، ياراجل ده حتى الفروة بتتغسل وتتفرش على الأرض وتبقى أجدعها سجادة.
أمشي بقى في الشارع وشم ريحة المطاعم والبيوت وكله بيشوح ويقلى كل فتفوتة في الخروف، والناس تطلب وتاكل وتتبسط أوي، مش قرفانين يعني ولاحاجة.
الغريب أن مرة واحدة صينية قالتلي انتو بتقرفو من أكلنا رغم أن مش كل الناس والمقاطعات عندنا بتاكل صراصير وقطط والكلام ده، طب ما انتو تقريبا كلكو بتاكلو أمعاء ولسان الخروف ومش بتقرفو عادي يعني، والله أنا ماعرفتش اقولها غير دي ثقافات وشعوب وفي ناس بتحب حاجة وناس مش بتحبها حتى في الاكل العادي يعني والخضار، قولتلها الكلمتين دول وانا مكبوسة منها، لاني كان نفسي اقولها هو لسان وأمعاء بس يا شيخة ده احنا اول ما بنشوف الخروف بيبقى نفسنا نقوله "أكلك منين يا خروفي؟"
