تفاصيل أزمة محمد سراج الدين ومرتضى منصور التي تحولت لاتهامات بالسب والقذف

تصاعدت حدة الأزمة بين محمد سراج الدين، عضو مجلس إدارة الأهلي، مع رئيس نادي الزمالك، مرتضى منصور، حتى وصلت إلى ساحة القضاء بعد تبادل الطرفين الاتهامات بالسب والقذف في بلاغات للنائب العام.

أزمة مرتضى منصور ومحمد سراج الدين

كانت الأزمة بين محمد سراج الدين ومرتضى منصور، بدأت بعد تصريحات الأخير عبر قناة نادي الزمالك الرسمية، والتي تحدث فيها عن أزمة الحجز على أرصدة النادي، حيث قال :«أنا اتصرفت في فلوس وهندفع للموظفين والعمال يوم الأحد عشان مينزلوش الشارع، والقرار التاني هوقف النشاط الرياضي لغاية لما الدولة تتدخل متقوليش امتى».

إلا أن تصريحات مرتضى منصور لم تمر مرور الكرام على محمد سراج الدين، حيث علق عليها بمنشور عبر صفحته الشخصية على فيسبوك، قائلاً  «تهديد علني للدولة على قناة الدولة بنزول العمال الشارع، لو مشاكل النادي المالية متحلتش..طيب هي الدولة مالها، ما تحل مشاكلك أنت اللي بتوقع ناديك فيها، وبعدين ترجع تحلها وتلعب دور البطولة قدام الجمهور، وإزاي يتم السماح والموافقة على كم التهريج والإساءات اللي بتحصل دي على الهواء.. أمور غريبة الواحد بيشوفها بصراحة، وغير مفهومة وبتسيء للدولة قبل أي حد تاني».

ماذا قال مرتضى منصور عن محمد سراج الدين

 وسرعان ما تصاعدت الأزمة بين الطرفين، بعد أن رد مرتضى منصور في تصريحات له على قناة الزمالك قائلاً  :«فيه واحد اسمه محمد سراج الدين بيقول إني هددت الدولة بنزول الناس في الشارع، لو أنا عايز أهدد الدولة مكنتش اتصرفت في صرف مرتبات العاملين، لكن بقول هتيجي لحظة من اللحظات هفقد السيطرة على العمال اللى مش بتاخد مرتباتها.. بقوله مشاكل إيه إللى أنا عاملها يا عيل يا تافه، هل انت فعلا من عائلة سراج الدين؟، انت شكلك مجنون، لأنك شتمت قبل كده تركي آل شيخ، انت شكل أهلاويتك مجنناك والغل واكلك وعلى العموم أنا رفعت عليك قضية النهارده عشان أربيك».

رد محمد سراج الدين على مرتضى منصور

وعقب ذلك رد محمد سراج الدين على مرتضى منصور، في منشور على فيسبوك بقوله :«بلغني إن في واحد مختل وعليه حكم حبس هارب منه شتمني من شوية على القناة اللي يملكها..وأعلن أنه رفع عليا قضية، وسبب القضية أن أهلاويتي مجنناني وبهاجم ناس كتير مهمة وكده طيب يا سيد، أنا هاجمت الناس دي قبل كده عشان مبدأ وأسباب كتير أوي مش جنان مع نفسي كده ولا حاجة..هل بالمنطق مش هقدر أهاجمك انت مثلًا وأنت يادوب دلدول للناس دي، وشخصية نكرة وتافه وبتاع كل الموائد وملكش مبدأ متبقاش غبي كمان، طيب وكده كده في بلاغ هيتقدم فيك صباحًا على الفيديو ده».

وفي منشور جديد قال محمد سراج الدين :«تم تقديم بلاغ اليوم لسيادة النائب العام من مستشاري القانوني مؤسسة أستاذ محمد عثمان ضد المدعو رئيس نادي الزمالك فيما نسب إليه من تجاوزات وسب في حقي على قناة نادي الزمالك وموثق بالڤيديو المنشور على صفحة القناة وبعض مواقع النادي.. بسلك الطرق الشرعية والقانونية وعدم الانجراف لمستوى متدنٍ من الأخلاق لم أعتد عليها وليس هو بتربيتي أو أخلاقي ولا أفضل هذا الأسلوب ولكن أحيانًا تضطرك الظروف وعدم المحاسبة والتمادي في الخطأ للدفاع عن نفسك بنفس الشكل ونفس الأسلوب وما فعلته بالأمس ومن قبل منذ عامين ونصف هو رسالة طبيعية بعد أن كان فاض الكيل ورسالة برضه إن مفيش أسهل من رد الإساءة بالإساءة ومفيش أسهل من قلة الأدب والتجاوز بالتجاوز لو حبينا الأصعب هو ظبط النفس».