رئيس التحرير أحمد متولي
 يوسف شاهين.. الخواجة وبنات البلد(4)

يوسف شاهين.. الخواجة وبنات البلد(4)

اتكلمنا في الحلقة اللي فاتت من حلقات حكايات يوسف شاهين مع بنات البلد، عن قصته مع نبيلة عبيد.. النهارده هنتكلم عن حكاية جديدة من حكايات "الخواجه"..

"جو وأم كلثوم"

بدأت علاقة "جو" بـ"الست" أو"ثومة" زي ما كان بيقولها، بعد فوزه بنيشان من عبد الناصر ولقى كل الناس بتقول له "الست بتدور عليك"، سألهم "يعني إيه الست؟ الست مين؟"، "جو" الخواجه الإسكندراني ماكانش لسا يعرف مين أم كلثوم ولما عرفها ماحبش صوتها ولا كان مهتم يسمع عنها.

أم كلثوم

قال "جو": "فجأة لقيت الناس بيقولوا الست بتدور عليك، الست بتدور عليك.. أنا كنت لسه واخد نيشان من عبدالناصر، فقلت لهم إيه الست بتدور عليا؟! طيب ما تدور!.. وبعدين لاقيت الدنيا كلها اتنططت والكل بيسأل ووكيل وزارة بيقول الست عاوزاك روحلها، فروحتلها، ولما رحت أقابلها أخدت قهوة في أول صالون، وقهوة تانية في تاني صالون، وهي لسه منزلتش تقابلني، واتأخرت عن الميعاد اللي كانت قايلة عليه".

"جو" اللي كان متعود لما يقول "أكشن" الدنيا كلها تتجمع وتبدأ، و"الست" اللي كانت متعودة الكل يستناها ويتمنى لقاها..شخصيتين مختلفتين كانوا صعب يتجمعوا لكن أكبر رابط بينهم كان "اللسان الطويل والصراحة المطلقة".

سر استغراب جو

بيقول "جو": "جت الست، وكانت غريبة جداً، وبتبصلي بشكل غريب جداً، وقعدت تتكلم عن أي حاجة، قلتلها أنا جاي ليه؟ أنا مش عارف أنا جاي ليه!"، فردت: "أنا قررت انك تعملي الأغنية اللي جاية"، فاستغرب "جو" ردها وقال : "قررتي؟!، طيب أسمع الأغنية"، و حكى عن الست وقال "طلعت ورقة وقالت شوف وطوف، وطوف وشوف، العجلة دارت، والمركب مشيت"، وبعد  ما خلصت الأغنية، قلت لها: "هبلة أووي يعني، شوف وطوف والعجلة والمدخنة؟! دي أي حمار يعملهالك"، فردت "الست": "يا ابن المجنونة!".. من هنا فعلاً بدأت صداقتهم، قال عنها "لما شتمتني عجبتني"، وسألته الست : "طيب يعني إنت عايز إيه؟"، فرد "معرفش، أغنية تانية مختلفة عن شوف وطوف، أغنية فيها إحساس مختلف"، ثم سألها "what is طوف"، وإتريقت عليها وقالت له "إنت خواجة إيش فهمك إنت".

وقال "جو" عن "ثومة": "كانت خفة دم ماحصلتش، وذكاء محصلش"  وقال كمان: كان لسانها طويل شوية، فكان فيها السمات اللي أحبها أنا، مش خايفة من أي حاجة، وبتتكلم من قلبها، وفهمتها بعد ما كنت بقول عليها زي ما بيقولوا الخواجات بتوع إسكندرية: بتعيد وبتزيد، حاجة تفلق!، بعدين عرفت إنها بتعيد كل مرة بفكر مختلف وبإحساس تاني"، وبعد علاقته الطويلة بالست قال"إتعلموا التمثيل من أم كلثوم وهي بتغني، فهي تقدم كل كلمة بإحساس مختلف، وبفكر جديد".

اقرأ أيضا:

يوسف شاهين.. الخواجة وبنات البلد(1)

يوسف شاهين.. الخواجه وبنات البلد(2)

يوسف شاهين.. الخواجة وبنات البلد(3)

روزانا ناجح

روزانا ناجح

حاصلة على كلية الإعلام من جامعة القاهرة