9 حاجات لازم تاخد بالك منها في «الجيم»
الاهتمام ببناء العضلات «Body building» بقى شيء مهم جدا بالنسبة لشريحة كبيرة من الشباب، لكن للأسف فيه شباب بيكون هدفها من نزول «الجيم» هو المنظر وشكل الـ«تي شيرت».
لو بتفكر تنزل «جيم» في شوية حاجات لازم تاخد بالك منها لأن الـ«Body building» حاجه صعبة مش سهلة.
الهدف
لما تنزل «الجيم» لازم تبقى عارف إنك رايح تلعب رياضة مهمة وده المفروض هدفك، لكن لو كنت رايح تعمل «فورمة» عشان شكل الـ«تي شيرت»، عليك يبقى حلو فـ«مكانك مش هنا».
لو على منظر الـ«تي شيرت» اضرب شوية مكملات وهات تيشيرت مقاسه صغير، إنما لو عايز تلعب رياضة كمال الأجسام، انزل «جيم». ساعتها هتحس بحلاوتها وتكمل فيها.
عشان تستمر
قليل جداً اللي بيستمر في الجيم وبيداوم عليه، لكن في طرق كتير من واقع الناس اللي بتكمل.
الناس الي بتكمل دول هتلاقيهم دايماً رايحين شلة مع بعض، بيساعدوا بعض وتحس في التمرينة إنهم بيتنافسوا وبيتحدوا بعض.. من الأخر حولوا الموضوع من مجهود زيادة لتسلية بسيطة وحاجة بيعملوها مع بعض وتسعدهم.
المراية
مرحلة تعود جسمك على اللعب نفسه بتاخد وقت، ده غير الوقت اللي بتحتاجه عضلاتك عشان تبدأ تبني نفسها وتتحمل الضغط الجديد. يعني متبصش كل شوية في المراية وتقيس العضلات وتلبس وتقلع وتتفرج على نفسك بعد كل تمرينة، لأن ده هيخليك تحس بالملل، يعني متستناش حاجة قبل شهرين، واتمرن بس.
المكملات
واضح من إسمها إنها حاجات بتكمل بس مش بتعمل عضلات، يعني متعملش حسابك إنك هتروح الجيم تلعب شهر وتضرب «باودر» وتبقى الشحات مبروك.
«المكملات» بتعوض بعض الحاجات اللي بيفتقدها الجسم وبتزود نمو العضلات تدريجيا. متسمعش كلام اللي يقولك إنها مضرة وبتعمل ترهلات. ممكن يكون فيه بعض المنتجات المضروبة فعلا وبتسبب مشاكل وتزود كولسترول، لكن الباقي كويس ومضمون لو اخدتها عن طريق المدرب واتبعت تعليماته.
الأكل
زيادة هرمون «التيستيرون» في الجسم هو الفكرة الأساسية للجيم، لأنه المسؤول عن تقليل القلق وزيادة حجم العضلات وهو الهرمون الذكوري الأكثر في جسم الإنسان.
«التيستيرون» بيجوع فلازم تاكل كويس بعد التمرينه عشان يقدر الهرمون يمد القلب والعضلات والمخ كويس، لأنه لو مكلتش كويس هيبدأ يتجه للجسم وهنا تبقى انت بتلع على نفسك مش ليها.
نظم أكلك وسيبك من أكل الشارع وكل على قد ما تقدر في البيت وخصوصا اللحوم والسلطات والرز.
اتعلم
الكتب ومواقع هتفيدك بس الواقع هيفيدك أكتر، عشان كده وانت بتلعب متسرحش مع نفسك وتعمل اللي يتقالك وخلاص.
وانت بتلعب اتفرج على الناس اللي اقدم منك وبيلعبوا من زمان، طبعا هتعرفهم من أجسامهم مش صعبة :D ، شوف بيعملوا الحركات والتمرينة إزاي ولما تلعب قلدهم بالظبط، واسالهم وحاول تستفيد منهم بأكبر قدر من المعلومات، وخد رأيهم دايما في طريقة لعبك وإذا كنت بتأدي الحركات صح ولا لأ.
مش مجرد تمرينة لازم تعرف إن «الجيم» مش الساعة اللي بتنزل فيها التمرينه. عشان توصل لـ«الفورمة» اللي انت عايزها لازم تهتم بسلوكياتك وتكون الرياضة مسيطرة على جزء كبير من وقتك. اجري كل يوم وتعمل تمارين صباحية وكل وقت تقدر تشغل فيه عضلاتك متبخلش فيه على نفسك.
الجيم والمدرب
هناك في قوانين بتمشي على الكل الاحترام أهمها، والمدرب مش عايز منك حاجة غير إنك تبقى لاعب كمال أجسام ومتتصورش إنه بيستغلك وطبعا لكل قاعدة شواذ.
لو حاولت تتصرف من دماغك ممكن تؤذي نفسك وتسبب مشكلة لجسمك بتوصل لمشاكل مزمنة أحياناً، زي حرق العضلات والضمور وغيرها. اسمع كلام مدربك واتبع نظامه واحترم كل الناس ومتقللش من حد .
خليك في نفسك
متخفش لما تدخل وتشوف ناس بحجم عربيات النقل :D ، الناس دي بدأت زيك كده ويمكن فيهم اقل منك كمان، الفرق إنهم بيشتغلوا من زمان على نفسهم وأخدوا سنين كمان عشان جسمهم يوصل كده.
ما تزهقش وركز وحطهم قدامك كمثال مش حاجة تحبطك وتهبطك.
ده موقع لأكبر جيم في مصر، هيقدملك كل النصايح وممكن تدخل على صفحتهم على فيسبوك وتسأل أي سؤال وهيردوا عليك.
اضغط هنـــــــــــــــــــــــــــــا للموقع
