في «الانترفيو».. احذر الوقوع في هذه الأخطاء
«الانترفيو» بيفرق كتير في أي مكان بتقدم فيه علي شغل، لأنه بيكون الانطباع الأول عنك عند المسئولين في مكان العمل اللي انت مقدم فيه، وعشان كدا مهم جدا أنك تحاول تدي انطباع كويس عنك في أول مرة تروح مكان تشتغل فيه.
ناس كتير فاكرة إن «الانترفيو» امتحان مفروض يجاوبو الأسئلة فيه إجابة نموذجية عشان يعدو من الاختبار ويتعينو في الوظيفة اللي عايزينها. بس الحقيقة أن مفيش حاجة اسمها إجابة نموذجية.
في «الانترفيو» انت بتعبر عن شخصيتك وتفكيرك وعن اهتمامك أنك تنضم للشركة أو للمؤسسة الي بتقدم فيها. أي سؤال بيتسأل بيكون فرصة ليك أنك تخلي اللي قدامك مهتم يعرف أكتر عنك وأنت هتفيده بايه لو اشتغلت معاه. مهم إنك توضح للي قدامك أنت ليه مناسب للشغلانة دي، وتحاول تربط مميزاتك وخبراتك بمتطلبات الوظيفة.
دي حاجات اساسية جدا في أي «الانترفيو» لازم تعرفها:
1- لو بدأت الانترفيو بأنك جاي متأخر عليهم من الأول، هيبقي في احتمال كبير أنهم يعتبروك شخص غير ملتزم وبالتالي فرصتك في التعيين تقل.
2- حاول متكونش متوتر.. ولو اتوترت او اتلغبط في إجابة سؤال اعتذر وعيد الإجابة مرة تانية بحيث تكون راضي عنها.
3- مينفعش تروح انترفيو في أي شركة لابس جينز وتيشرت، مهم تسأل قبل ما تروح الانترفيو مطلوب الـ dress code يكون إيه، وتكون بسيط قدر الامكان.. اقرأ أيضا ⇐ عندك «انترفيو»؟.. اختار لبسك صح
4- متجاوبش الاسئلة بـ «اه» أو «لا» إلا لو كان السؤال عايز كدا بس، ومتعديش أي سؤال من غير ما تحاول تعبر فيه عن خبراتك أو مواقف استفدت منها في حياتك الشخصية أو العملية.
مثلا لو اتسألت عن ازاي بتتعامل مع الضغط؟
احكي تجاربك أو خبراتك السابقة اللي كنت مضغوط جدا فيها واتصرفت إزاي ساعتها عشان تعمل المطلوب منك بشكل كويس ،مترصش اجابات اتهرست كتير .
5- متحاولش تبين نفسك عارف حاجات مش عارفها سواء خاصة بالشركة أو بالوظيفة نفسها أو بأي مجال اتسألت فيه.
6- لو اتسألت ليه سيبت شغلك القديم ؟ ماتخبطش في مديرك القديم أو زملائك وتقعد تحكي إزاي كان مكان مش مناسب والناس مش متعاونين وعشان كدا انت مشيت.. إلخ . ممكن توضح عيوب المكان بطريقة مهنية، وتقول انت دورك كان إيه وإزاي كنت بتتعامل معاهم.
7- تواصل بعينك مع اللي قدامك، ولو كانو اكتر من شخص وزع نظرك عليهم وانت بتتكلم.. مثلا لو واحد سألك سؤال تبصله الأول في بداية الإجابة وبعدين تنقل نظرك بين الأشخاص الموجودين لحد ما ترجعله في آخر الإجابة تاني.
8- لما تتسأل عن مميزاتك وعيوبك، مترصش ايجابيات وسلبيات وتسكت، مهم تقول إزاي بتحاول تستغل المميزات دي وإزاي بتحاول تعالج العيوب الي فيك.
9- متروحش «انترفيو» في أي مكان، من غير ما تكون عارف كويس المكان دا نشاطه ايه أو بيعمل ايه، مهم جدا تبقي مجمع معلومات عنهم قبل ما تروح ،مثلا : الشركة ليها فروع فين أو اهتمامهم الأساسي إيه.
-----------------------------------------------------------------
تابع آخر أخبار #فرص_العمل من «شبابيك» بالضغط هنا
