عايزة «تربطي جوزك»؟.. لاعبيه «بلاي ستيشن»

لو داخلة على جواز هتلاقي ناس كتير تقولك إن الطريق لقلب الراجل معدته.. متجيبيلوش هدية في عيد جوازكم وأعملي محشي.. الكلام ده مظبوط شوية :) لكن الأكل خلاص بقى شيء أساسي.. لكن في شوية اهتمامات بتفرق في حياة الراجل..هتقربك منه جدا وتخليكي تقضى معاه أكبر وقت.

بلاي ستيشن

دلوقتي الـ"بلاي ستيشن" بقى الهواية الرئيسية لـ 50% من الشباب.. وفيه 25% من الباقيين بيحاولوا يتعلموه أو مهتمين بيتقريبا بيقضوا معظم وقتهم مع بعض وخروجاتهم بيبقى فيها لعب.. وحتى لو فيه وقت راحة في الشغل بيبقى لعب برضو.

اثنين من زميلاتي في الشغل واحدة بتقول عن جوزها إنه بيقضي معظم الوقت يلعب بلاي ستيشن مع أصحابه.. حتى في يوم الإجازة.. والتانية مخطوبة وبتقول إنه لما بيجي عندهم بيقعد معظم الوقت يلعب مع أخوها.. استغلي أنتي الوقت ده واهتمي واتعلمي بلاي ستيشن لأنه هيحب ده جدا وهتضمني إنه هيقعد وقت أطول يلعب معاكي في البيت..

فريقه المفضل

تشجيع الكورة مش هواية تافهة زي ما معظم البنات فاكرينها.. هي عند الشباب زي مسلسلك التركي أو عروض الأزياء والميك أب اللي بتتفرجي عليهم ليهم نهار.. ده هيخليه ميتفرجش عالقهوة لما تخلقوا جو وروح في بيتكم.. سواء أهلي أو زمالك دول عشرة عمر وحاجة اتربى واتعلق بيها من صغره فمتحاوليش تقللي منها.. حبي الكورة وشجعي فريقه وحسسيه إنك بتشاركيه هوايته وفيه حاجة بتربطكم ببعض..

القهوة

في ناس كتير هتتخض من الحاجة دي.. لكن دلوقتي بقى فيه فعلاً قهاوي بلدي ولكن مختلطة واقرب للنادي أو الكافيه اللي بتقعدوا فيه.. بصي يا ستي ده المكان الوحيد اللي الشاب المصري بينسى رسميات العمل فيه ويندمج ويبقى بطبيعته.. حاولي تكوني موجوده فيه لو هو من رواده.. هتقعدوا على جنب وتقضوا وقت أطول مع بعض وهتفهمي شخصيته على طبيعتها وتتفاهمي معاه لأنها مش هتظهر غير هناك.