الشهامة في مصر من «حسن» لـ«ميشو».. So what؟!
فاكر أفلام زمان وأنت صغير وحلو كده ومتسرح وقاعد قدام التلفزيون بتتفرج على البنات والممثلات القمرات بتوع زمان فساتين ايه وشعر ايه وصوت ايه ومشية ايه، حاجة تشرح القلب مش الغفر اللي في الشارع دلوقتي.
ولا الرجالة الصايعة بتوع زمان تلاقيهم لابسين بدل وكرافتتات ويوم لما يعاكس "موزة" يقولها: "نهارك سعيد ياهانم!" لا صياعة صياعة مش هزار!
الشهامة زمان
سيبك دلوقت من البنات القمر دول عشان ما تتعقدش، وانتي سيبك من الرجالة المزز دول عشان ما تولعيش في نفسك، بص على المعاكسة نفسها وتصرف الناس في الشارع لما يلاقو بنت بتتعاكس، يلاهوي! ده فريد شوقي كسر عظم رجالة كتير في الشارع عشان عاكسو البنت بتاعته أو أي بنت هيعلقها بعد كده في الفيلم يعني، وكل ده عشان ايه عشان الواد صفر صفارة صغيرة كده، ولف حواليها لفة، وقالها: "هو القمر بيطلع بالنهار؟" طب الواد بيسأل سؤال برئ يقوم يتقطع كده ووشه يضيع خالص! المهم أن فريد شوقي بياخدها بعد كده يوصلها قال يعني بيحميها.
طب شوفت رشدي أباظة كان بيعجن في الكومبارس ازاي وفي أحمد رمزي عشان بس كانو بيبصو لنعيمة عاكف في فيلم "تمر حنة"، ده كان وشه كله بيتقلب ياراجل، وطقم سنانه بيخرج بره بؤه من النرفزة، ويتعصب ويبقى على اخره عشان بس واحد بص لها ولا قالها كلمتين عاديين جدا.
وفيلم "هنا القاهرة" بتاع محمد صبحي "سنوسي" وسعاد نصر "صابرين"، لما كانو بيتخانقو و"سنوسي" فضل يجري وراها ويشدها من هدومها في الشارع، وطبعا طلعله اتنين رجالة افتكروه بيعاكس، فقعدو يلقفوه لبعض، ده ضربة وده ضربة لغاية ما الراجل اتهرى في ايديهم.
ده بقى غير الرجالة اللي بتشوف واحد بيعاكس واحدة في الشارع بجد، ويتلمو عليه وهاتك يا ضرب لما وشه يتبهدل، وما تعرفش هما طلعو منين دول.
الشهامة دلوقتي
هو فيه زي الشهامة دلوقتي؟ ده عصر الشهامة كلها ياجدعان، يعني بص على فيلم "طير أنت" بتاع أحمد مكي "ميشو" ودنيا سمير غانم "ليلى"، أول ما طلع عليهم شوية بلطجية قلبو اللي معاهم وهياخدو "ليلى" في سكتهم، "ميشو" المنفوخ عضلات وحركات سلمها تسليم أهالي في ثانية، لأنه داخل على مسابقة "مستر ايجيبت" وما ينفعش يتعور طبعا، وقالها الجملة العبقرية اللي حيرت الملايين والناس حفظتها كمان (طالما اللي هيعملوه معاكي in public ومفيش فيه feeling يبقى so what)
طب بلاش ده، شوف فيلم "يا انا يا خالتي" لما طلع على محمد هنيدي "تيمور" ودنيا سمير غانم "نوال" بلطجية برده يعني مش معاكسة والسلام، لا ده خطف وتحرش وبلاوي، قالهم: "استنى ياد يا بسلة انت وقفصين الخضار اللي معاك" طبعا حركة شهامة اهيه والواد رايح يجيب البنت منهم، ولما سألوه عايز حاجة، قالهم: "عاوز اليوستفندي بتاعي اللي مع خطيبتي دي".
يعني من الاخر كده اتحولت المعاكسة لتحرش وخطف، واتحولت الشهامة لـ "peace يا مان" و"انا مالي ياعم"، والبنت خلاص بقت هي فريد شوقي ورشدي أباظة عشان تحمي نفسها.
