بطريقة آمنة ومربحة.. «استثمر فلوسك وابسط أصحابك»
كلنا بندخل جمعيات ونلجأ لاصحابنا عشان نستلف ونحوش في حصالات، وأحيانا في ناس بتخلي حد يشيله فلوسه عشان متضيعش منه، ما تيجي بقى نفكر في حاجة نشغل بيها فلوسنا ومضمونة وحاجة هتساعد بيها اصحابك وأصدقائك المتعثرين وفي نفس الوقت يجيلك من وراها أرباح ولما تحتاجها تلاقيها زادت ما نقصيتش.
الهدف
حدد هدفك اللي عايزة من ورا فلوسك، انت راضي بإنها في أمان كده وهي في البنك أو شايلها في البيت أو مع حد، ولا عايز تزودها أحسن من ركنتها.
الخطة
حط خطتك ووفق أوضاعك على حسب الهدف اللي اخترته وممكن تبدأ بحاجة صغيرة لو مش ضامن المكسب بحيث الخسارة تكون قليلة، شوف الوسط المحيط بيك وأصحابك في الشغل القديم وجيرانك وممكن تستثمر معاهم إزاي .
أفكار
في حد زميلنا شايل جزء من الفلوس في البنك، والصدفة جابت واحد تاني عشان يطلب منه إنه يضمنه في جهاز لابتوب من أحد المحلات المشهورة اللي بتشتغل بنظام التقسيط.
وهنا كانت ولادة الفكرة، وسأل زمايله الباقيين لو حد عايز أجهزة موبايل أو لاب توب ولقى كتير فعلاً بيفكر في نظام التقسيط خصوصا إنه بدون مقدم.
سحب فلوسه من البنك واشترى بيها كل الحاجات اللي اصحابه عايزينها كاش، زود في الفوائد شوية عن المحل لكنه وفر عليهم نظام الضمانة المعقد شوية، وفتح حساب تاني في أحد البنوك عشان الناس تحط فيه الاقساط الشهرية.
حل مشكلة اصدقاؤه وزمايله، وشغل فلوسه بأرباح محسوبة وبطريقة مضمونة، لأن طبيعي كل عملاؤه مضمونين بحكم شغله وعلاقته الشخصية معاهم.
«الفلوس مش كل حاجة».. قول والمصحف؟ (مقال)
التانية
في كتير من الهايبر ماركت زي (مترو_ كارفور) بتقدم عروض على منتجات كتير في المناسبات والأعياد، ده غير بعض السلع الأرخص في أماكن منها في أماكن تانية، ولكن الناس بتجيب من الأقرب ليها مش الأرخص غالبا.
دور وانتظر العروض دي واشتري منها الكميات المطلوبة في محيطك وعارف إن الناس محتاجاها، وحطها في البيت واشتغل على تسويقها من خلال سؤال زمايلك وممكن تستعين بحد من اصحابك عشان يسأل الناس عنده في الشغل.
في النهاية هتزود دخلك وانت في مكانك بدون أي مجهود أو خسارة كبيرة في راس مالك وضمانات معروفة بحكم علاقتك بعملائك، وهتستثمر فلوسك المركونة في حاجة مضمونة.
شوية حاجات صغيرة بس لازم تاخد بالك منها وانت شغال بالطريقة دي.
* متحاولش تطول في أجل الأقساط عشان متحسش بملل وتزهق بسرعة من تحصيلها شهريا.
* حدد حد أقصى لتمن السلعة اللى الناس عايزاها، لأنك بتتعامل مع أصدقائك ولو حد جاب حاجة بسعر مرتفع هيدفع نفس القسط القليل بحكم علاقتكم والعشم.
* حط ضمانات بسيطة متزعلش حد منك، زي وصولات أمانة بعدد الأقساط، يسترد وصل مع دفع كل قسط.
* خلي تعاملك في نطاق ضيق كبداية، ومتحاولشس تقبل كل العروض المقدمة ليك، وركز في الأفضل في القيمة وأضمن.
* شغل جزء من فلوسك بعيد عن مصاريفك أو حسابات مالية تانية، متاخدش منه حاجة كأنه موجود في البنك، ومن الأفضل الاعتماد على حساب بنكي الناس هي اللي تدفع فيه القسط بنفسها وتبقى انت مجرد مشرف فقط وتتأكد من إن الكل مستمر في الدفع.
* سجل كل حاجة، مصاريفك والفلوس المدفوعة في الحاجة والأقساط المستحقة والمستردة، واحتفظ بالفواتير الخاصة بالحاجات اللي اشترتها.
في الأخر هي فكرة بنك مستقل بذاته، البنك بيشتغل بنفس الطريقة، بيشيلك فلوسك ويشغلهالك، خليك انت أشطر وشغل فلوسك بنفسك من غير مجهود أو تعب.
