الرئيس السيسي: سنبني معابد لليهود بمصر إذا كانت لدينا حاجة لذلك

تحدث رئيس الجمهورية، عبدالفتاح السيسي، اليوم الأربعاء، عن سياسة الدولة المصرية فيما يتعلق بالتعايش بين أصحاب الديانات المختلفة، خلال مؤتمر صحفي مشترك مع رئيس وزراء اليونان.

تصريحات السيسي عن دور العبادة

قال السيسي: «أحب أتكلم في موضوع دير سانت كاترين، واسمحولي لإن المؤتمر ده هيسمعوه الناس في مصر واليونان، واحنا آخر 10 سنين كنا بنأكد على آراء محددة لدى الرأي العام، والكلام خرج من مصر للمنطقة، عن الاحترام الشديد جدا للآخرين والتنوع الموجود في النسيج الإنساني».

وأضاف: «ده مكنش طرح طرحناه كسياسات فقط، ولكن عملنا ممارسات تؤكد كده، وأنا انزعجت بشدة لما تم تداول موضوع دير سانت كاترين، وإن مصر تعمل أي إجراء سلبي، وده غير وارد مش علشان مكانة الدير بس ولكن لإنه يتعارض مع ثوابت الاعتقاد والسياسة المصرية اللي بنمارسها».

وتابع: «في الفترة الصعبة اللي حرق خلالها المتطرفين 65 كنيسة في مصر قمنا بإعادة بناءها مرة تانية، وقلنا في جميع التجمعات السكانية الجديدة نبني دور عبادة للمسلمين والمسيحيين».

وقال الرئيس السيسي: «قلنا وبقولها دلوقتي لو أنا عندي مواطنين يهود هعملهم معابد لهم، فالنقطة دي حاولت أشاور ليها، لإن العلاقة التاريخية وحجم المودة بين الشعبين المصري واليوناني خفت إن الأمر ده يتم العبث بيه».