العالم المسحور.. المغرب ومدينة الألوان والجمال والصوفية
اتكلمنا في الحلقة اللي فاتت من سلسلة «العالم المسحور» عن تونس، والنهارده هنتكلم عن دولة تاني من دول ساحل أفريقيا الشمالى أو مايعرف بالمغرب العربى وهي المغرب.
ليه المغرب؟
مع إنتشار صور المتصوفين وأشعار جلال الدين الرومي الناس إبتدت تنتبه للمغرب مش بس عشان أغرب شيوخ الطرق الصوفية من هناك لكن لأنها بلد الألوان والجمال بالمعنى الحقيقى للكلمة. الجمال فى المغرب بيبتدي من الحضارة الأندلسية. المغرب مشهورة بالبهارات والمصنوعات اليدوية زى الخزف والنسيج.
السفر للمغرب أحلى حاجة فيه إن غير مكلف يعنى الفيزا شهر متعديش الميه جنيه الدرهم المغربى مش غالى (عامل حوالى جنيه وتلاتين قرش) يمكن المشكلة الوحيدة فى اللغة إللى هي العربى المكسر؛ بس أهل المغرب محبين للزوار وبيصبروا عليهم. المغرب من البلاد إللى متعرفش تزور فيها إيه ولا إيه عشان الطبيعة وجمالها والتاريخ والعمارة فيها بتصنف من أجمل الأماكن جمالا فى العالم. ترشيحات موقع تروبيا كانت الأفضل للمغرب.
مكناس
من أقدم المدن المغربية فيها مجموعة كبيرة من الآثار وعدد من القصور ومعروفة بإسم مدينة المئة مأذنة. وعشان كده المدينة اتسجلت فى قائمة التراث العالمى لمنظمة اليونسكو.
من الأماكن إللى متتفوتش فى مكناس هى القصر الجامع وقصر روسلان ويعتبر متحف للفن المغربى. ده غير مسجد الزيتونة أقدم مسجد فى المغرب وسيدى عثمان.
ومن أهم معالم المدينة ضريح مولاي إسماعيل إللى أهل مكناس بيتباركوا بيه. مولاى إسماعيل مؤسس المدينة وإللى فى عهده مكناس كانت عاصمة للملكة المغربية.
مولاي إسماعيل زيّن عاصمته بأسوار وأبراج. أشهر باب للمدينة هو باب المنصورالعلج .جوه المدينة فى "حدائق الحبوب" اوسع وأكبر الحدائق وإتأسست على الطراز الأوربى.
فاس
مدينة مميزة بكل المقاييس عشان مركزها "فاس البالى" بتتصنف على أنها أكبر تجمع حضرى من غير عربيات وسائل النقل جواها بدائية بالنسبة لأغلب مدن المغرب؛ الموضوع ده بيحسسك إنك دخلت بعد زمى تانى.
من أهم معالم "فاس" مسجد القرويين بيعتبر أقدم جامعات العالم لان كان ملحق بيه مدرسة لمناقشة الطرق الدينية وبعد كده إتوسع وبقى جامعة.
أسوار فاس البالى من التحف المعمارية ومداخل المدينة من الأبواب منها باب الحمرة وباب الفتوح. دار البطحاء وده كان قصر ملكى مخصص لإستقبال ملوك الدول وبعدين إتحول لمتحف. ده غير متحف فنون الخشب ومتحف الأسلحة فى البرج الشمالى .
شيفشيون.. "الجوهرة الزرقاء"
المدينة مشهورة بالبيوت الملونة بالأبيض ودرجات الأزرق. المكان معروف أكتر لأجواءه الهادية وكمكان بيلم الثقافة والفنون المغربية فى مدينة واحدة. جولة فى أحياء المدينة كأنها جولة فى المغرب.
الصويرة
السى إن إن ومواقع تانية كتير كتبوا عن أسباب تخليك لازم تزور مراكش لكن مش الكل كتب عن الصويرة ودى مدينة قريبة من مراكش ليها نفس الطابع التاريخى لأغلب المدن المغربية. الصويرة معروفة بشواطئها الجميلة ومطاعم الأسماك والمأكولات البحرية. مناطق الجذب فى المدينة موجودة فى المدينة القديمة موكادور وكمان الحى اليهودى وساحة مولاى الحسن. فى الصويرة ممكن تمارس كتير من الرياضات المائية نتيجة لموقعها المتميز على الساحلى المغربى.
المغرب تحتل قائمة التراث العالمى لليونسكو بمدن غنية بالآثار والفنون. شهرة المغرب فى العالم الغربى بدأت مع فيلم كازابلانكا من إنتاج هوليوود سنة 1942 وإستمرت شهرتها فى الستينيات بسبب زيارة فريق البيتلز الإنجليزى المشهور فى وقتها ومشاهير تانين من الكتاب إللى وصفوا تجربتهم بالسحر.
لوعايز تسافر المغرب صفحة وزارة الخارجية المصرية على موقعها موضحة كل التفاصيل عن التأشيرة وعادات وتقاليد البلد.
