أماكن ابعدي عنها في العيد
ظاهرة التحرش بتنتشر وبتزيد خاصة في أيام العيد، حتى في ظل إنتشار حملات التوعية المضادة للتحرش متمش التصدي للظاهرة تماماً، علشان كده لازم ناخد بالنا من الأماكن المشهور عنها إنها "مناطق تحرش" ونتجنبها قدر الإمكان.
ودي أشهر الأماكن المعروفة بالتحرش:
حديقة الفسطاط
من الأماكن اللي بتحقق أعلى نسب للتحرش رغم التواجد الأمني من قوات الشرطة التابعة لقسم السيدة زينب، ياريت تتجنبيها في العيد أو الخروج في تجمعات وتاخدي الإحتياطات اللازمة.
الحديقة الدولية بمدينة نصر
بسبب المساحات الخضراء، المكان بيساعد المتحرشين إنهم يستخبوا ورا الأشجار ويهاجموا البنات وبيكون صعب الإفلات منهم خاصة وسط قلة عدد أفراد الأمن في المكان.
حديقة الحيوان
بسبب تواجد عدد كبير من الناس-أغلبهم عائلات-بيحصل حالات تحرش كتيرة، ومع تواجد أفراد شرطة الحديقة بتخلص المشكلة بفض أي إشتباك مش بمحضر.
حديقة الأزهر
بسبب حالات التحرش اللي بتزيد كل سنة طلب الأزهر تغيير إسم الحديقة علشان إسم الأزهر ما يتلوثش، والتحرش فيها بيبقى سهل بسبب مساحتها الكبيرة والأشجار.
كورنيش النيل
غالباً ما يتجمع الشباب حول الفتاة في شكل دائري للتحرش بها ولمنعها من الهروب رغم إنتشار الأمن في منطقة ميدان التحرير حتى الأوبرا إلا إن بيصعب ملاحقتهم بسبب الزحمة.
شارع طلعت حرب
إنتشار أماكن السينمات والمحلات والزحمة في شارع طلعت حرب في وسط البلد بيساعد المتحرشين على التحرش بآمان وبسهولة وتبرير فعلهم بـ«الدنيا زحمة وماقصدتش».
