سر العلاقة بين «المحشي» والإله «ست»
مكملين معاكوا «العالم فى أطباق».. زى مالشاورما أخدتنا للشرق.. قلنا نكمل طريقنا وفى السكة عرفنا إن المحشى الأكثر شعبية فى مصر.. مش بتاعتنا لوحدنا.. طلعت أكلة لفت العالم بس سرها فضل عندنا..
"المحاشي" أكلة مفضلة للمصريين باختلاف طبقاتهم الاجتماعية.. بس كل واحد ليه طريقة فى أكله.. عندنا فى مصر أى خضار جواه رز أو لحمة يبقى محشي..أما فى باقى العالم فالموضوع طلع متقسم و كبير..
فيه ناس بتقول إن المحشى أكلة أصلها فرعوني كانت بتتعمل فى عيد الإله ست.. لكن كل المعروف إن المحشي أصله تركى واسمه ضُلمه.
كلمة "ضلمة" فى اللغة التركية معناها "حشو".. بتتقال على أي خضار محشي بس الوصفة الأصلية كانت خاصة بورق العنب المحشي باللحمة المفرومة والمتبلة.. لما بتتعمل من غير لحمة (يعنى بالأرز فقط) بيسموها yalancı dolma يعني الضلمة الكدابة.. الوصفة سافرت مع توسع العثمانين فى أوربا وأخدت أسامى كتير.. منها: japrak فى المطبخ الألباني.. وفي المطبخ الفارسى (الإيرانى) barg.. وفب المطبخ اليونانى ليها اسمين واحد للمحشي اللى بيتم "تقوير الخضار" وحشوه ده بيتقال عليه "γεμιστά"..وواحد للمحشي الملفوف زي ورق العنب والكرنب ντολμάς.
الضُلمة مش الاسم الوحيد للمحشي.. الأتراك قسمو الموضوع وخلو أى حاجة بنشيل قلبها ونحط مكانه رز أو لحمة "ضلمه".. وأي ورق ملفوف سموه "سارما".. و الاسم جاي من فعل يلف الشيء فى اللغة التركية..
الملفوف الحادق زى ورق العنب اسمه "يابرك سارما".. أما الحلو فهو اللى بنقول عليه "البقلاوة".. وبسب ده المحشي اتعرف باسم "سارما" أو سارمل فى دول شرق أوربا.
المحشى غالبا بيتقدم مع سلطة (و غالبا ما بتكون سلطة زبادى) وشوربة.. وبيتعامل كطبق رئيسي لأنه بيبقى رز ولحمة مفرومة وخضار.. وجبة كاملة من الآخر..
أما فى مصر فهو طبق ما بين البينين.. يعنى رئيسي بس غالبا بيشاركه على السفرة المصرية حاجات تانية.
وصفة المحشى فى مصر حياة أو موت.. بس الوصفة من جدتي كده: طماطم وشبت وبقدونس وبصلة كبيرة وملح و فلفل وكمون.. مقدار الرز والطماطم بيختلف مع نوع المحشي.. بس السر بيبقى الحقيقة فى الخلطة إزاى بتتعمل اللى جدتى بتسميه "الإدام".. وأقرب وصفة لوصفة جدتي هى الوصفة دي: [embed]https://youtu.be/tPZz7snsZFE[/embed]
