ابسطهالك.. «فيمنست أو النسوية» يعني ايه؟
«الفيمنست دي ملهاش كبير» «الفيمنست يعنى بنت بشنب» كلام كتير بيتقال حوالين كلمة فيمنزم أو النسوية، في ناس فاكره أن الفيمنست دول شوية ستات كدا بيكرهو الرجالة وبيخططوا أنهم يجمعوا رجالة الكوكب ويحرقوهم مثلا، أو انهم شايفين الستات أحسن من الرجالة، وفي ناس شايفة الفيمنست واحدة مسترجلة وبتدعو الستات لإلغاء دور الرجل وسيطرة المرأة، وكل واحد بيفسر الكلمة على مزاجه أو بالنماذج الي بيشوفها قدامه.
طيب خلينا نتفق مبدئيا أن اللي بيعرّف أو بيمثل النسوية هو مفهوم النسوية نفسه، يعني لما نيجي نتعرف على النسوية مش هنبص لتصرفات مدعين النسوية وإنما هنبص على معنى المفهوم واللي بيطبقوه صح.
مؤخرا ظهر بنات كتير بتحاول تستقل بحياتها وتخرج عن «سيطرة» النظام الذكوري، النسوية مش حاجة جديدة أو مستحدثة، لكن ليها تاريخ طويل، إلا انها اتحولت من مفهوم إيجابي إلى مفهوم سلبي، بل ممكن ناس تكون فاكراها شتيمة كمان.
النسوية هي feminism، والكلمة مشتقة من كلمة feminine أو أنثوي.
النسوية ببساطة هي فكر بيطالب بالمساواة بين الست والراجل، بمعنى أصح إن الست يكون ليها نفس حقوق الرجل، زي الحق في التعليم، الحق في العمل، الحق في الجسد، الحق في الاختيار، الحق في الاستقلال، وجامعة كامبرديج عرّفت «الفيمنزم» كالتالي: «الإيمان بأن النساء لهن نفس الحقوق والفرص والصلاحيات التي للرجال».
الفيمنزم، ملهاش أي علاقة بكره الجنس الآخر، بل ملهاش علاقة بالجنس أساسا، يعني لو ولد بيناصر حقوق المرأة وشايف أن البنت من حقها تتعلم وتشتغل ويكون ليها كيان خاص بيها ومش معتمدة على حد ف دا بينطبق عليه لفظ «فيمنست»، يعني مش شرط يكون الفيمنست بنات أو ستات.
الفيمنست بيطالبو باعتبار الأنثى إنسان كامل الأهلية وليه حق تقرير مصيره، و تحرير المرأة من فكرة كونها تابعة للذكور في عيلتها، الفيمنست مش بيقللوا من أهمية الذكور، لأن مش هدفهم مناقشة أهمية الرجل أو أهمية المرأة والمقارنة بينهم.
القضايا اللي بتتناولها النسوية بتختلف من مجتمع للتاني، في المجتماعت الاوروبية غير المجتمعات الشرقية، في مصر مثلا الحقوقيات المصريات لسه بيطالبو بتعليم البنات، والمساواة في الأجور ووضع حد للعنف الجسدي ضد المرأة زي التحرش والاغتصاب وزنا المحارم والعنف الأسري .إلخ.
«الفيمنست بيقولو» إن الذكورية هي اللي أنتجت النسوية وشايفين إن سيطرة النظام الأبوي الذكوري بشكل سلطوي غير متوازن، هي اللي أدت إلى إهدار حقوق المرأة في بلاد كتير، وبالتالي ظهر ستات بيطالبو بحقوقهم.
الستات أو الرجالة الي بيطالبو إن الست هي اللي تتحكم في الراجل، أو إن الستات متتجوزش لأن دا ضد مبادئ النسوية، وغيرها من المطالب، دول ملهومش علاقة بالنسوية كحركة أو مفهوم، لأن النسوية موجودة لتحقيق المساواة مش عشان حد يتحكم في التاني.
المصدر
