العالم المسحور.. موريتانيا والمدن القديمة و«السفينة المهجورة»
لسه مكملين سلسلة العالم المسحور. المرة دي هنتكلم عن أخر جزء فى المغرب العربي: دولة موروتانيا. تاريخيا «موريتانيا» شريك في كل حضارات المغرب العربي من أول تاريخ البربر (السكان الأصليين) لحد تاريخ الأندلس.
«موروتانيا» سحرها فى إن أغلب مساحتها صحرا فميلاد الفنون فيها بيمثل تحدى كبير. وده إللى خلى عدد من المدن الموريتانية على قائمة اليونسكو لمدن التراث العالمى. عملة موريتانيا هى «الأوقية» وهى العملة الوحيدة المسموح استخدمها فى البلد. العملة دى مش غالية بالنسبة للجنيه المصرى.
موقع «Travel East» قدم أحسن اقتراحات لأجمل الأماكن فى موريتانيا بس إحنا دورنا أكتر لحد ما عرفنا أحسن الترشيحات إللى بهرت زوارها.
شنقيط :
واحدة من أقدم مدن موريتانيا ومن المدن الموضوعة على قائمة اليونسكو لمدن التراث العالمى. بمجرد دخولك المدينة بتحس إنك دخلت العالم القديم. المدينة دى كانت مركز للدراسات الإسلامية فى أيام الأندلس ومشهورة بمكتباتها القديمة. من أقدم المكتبات هناك مكتبة «حابوت» وإللى بتحتوى على حوالى 1450 مخطوطة للعلوم فى العصر الإسلامى. ومن المعالم التانية للمدينة هو المسجد الكبير.
محمية حوض أركين
ودى محمية طبيعية موضوعة على قائمة اليونسكو للمواقع الطبيعية. المحمية دى واحدة من أكبر أماكن تجمع الطيور المهاجرة عشان حوض «أركين» أكبر مساحة طينة على ساحل المحيط بيمر عليها الطيور المهاجرة من أوربا. من الطيور إللى ممكن تشوفها هناك البجع الأبيض والنعام الوردى.
من الأماكن إللى بيرشحها السياح الأجانب على موقع «trip-advisor» لطبيعتها وموقعها وكمان للأنشطة إللى ممكن تعملها هناك منها التخيم . فى الواحة دى بتقدر تشوف أكتر عادات قبيلة «الرجيبات» أحد القبائل المشهورة فى موروتانيا.
تانى أكبر تجمع حضرى فى موروتانيا بعد العاصمة. و من أجمل المدن الساحلية فى موروتانيا لانها شبه جزيرة داخل المحيط الأطلنطى. المدينة مشهورة بالصناعات السمكية وصناعات السفن والأكلات البحرية. موقع «Wiki travel» رشح أكتر من حاجة تتعمل فى المدينة دي لكن أغلب مواقع السفر اتفقت إنك متفوتش ألاماكن دى:
- راس الأبيض أو «Cape Blanc» أو رأس نواذيبو فيها محمية طبيعية ومتحف وعلى الشط هتلاقوا سفينة كبيرة مهجورة.
- سوق كيران المكان إللى ممكن تشترى منه كل حاجة تتخيلها من منتجات عالمية أو محلية. أما هواة القراءة و الثقافة ممكن يزوروا «التحالف الموروتاني الفرنسى» وهو عبارة عن مركز ثقافي بالمدينة.
فى الطريق من «شنقيط» لـ«نواذيبو» أو العكس. لازم تمر على تاني أكبر صخر فى العالم علميا إسمه «منولوث» ارتفاعه 400 متر وهو عبارة عن صخرة ضخمة من الجرانيت الاسود. ده مش «المنولوث» الوحيد فى المكان فى «منولث« تانى إسمه «عائشة» على إسم زوجة بن عميرة. فى المكان هتلاقى منحوتات صخرية تانية ودى كان عمل قام نحاتين عالميين احتفالا بالألفية التانية سنة 1999 .
على الرغم من إن موريتانيا أغلب مساحتها صحرا بس برودو فيها أماكن ماتتفوتش. إحنا جنبنا الأماكن إللى مش بنسمع عنها. بس ده مش معناه إننا ننسى العاصمة نواكشط. حاليا لازم قبل ما تحجز لموروتانيا لازم تراجع صفحة وزارة الخارجية المصرية عن موروتانيا وإللى بتعرفك كزائر مصرى طبيعة البلد والتقاليد وإزاى تتعامل داخلها و التأشيرة وأهم حاجة عنوان السفارة المصرية هناك.
يمكنك قراءة الحلقة الأولى من هنا ⇐ ليه الإجابة دايما تونس؟
يمكنك قراءة الحلقة الثانية من هنا ⇐العالم المسحور.. المغرب ومدينة الألوان والجمال والصوفية
