لو بتكلم نفسك.. يبقى أنت عبقري
«فين الموبايل.. حطيتيه فين بس؟.. كان معايا من دقيقةأهو لقيته.. شكرا، يلا بقى عشان اتأخرنا»
«الأول هنروح نشتري الطلبات، بعدين نبعت الميل عشان أخر معاد للتقديم، ولو اتبقى وقت ممكن نشوف فيلم مثلا»
دي أمثلة من حوارات مع النفس، بتدور بين كتير مننا وبين النفس، وممكن الحوار ياخد شكل تاني زي مثلا تأنيب أو لوم أو شكوى من وإلى النفس، الناس اللي بتتكلم مع نفسها، بيحولوا الحوار الداخلي دا لحوار مسموع، ممكن تفتكر أنهم مجانين أو مش طبيعيين.. إلخ.
بس الحقيقة علم النفس ليه رأي تاني..
اللي بيتكلمو مع نفسهم، مش مجانين، في الواقع هم أذكياء جدا.
في دراسة أجراها اتنين من علماء النفس دانيل سويجلي «Daniel Swigley»، وجاري لوبيان «GaryLupyan» تم نشرها في دورية علم النفس المعملي، طلبوا من مجموعة أفراد أنهم يدخلوا سوبر ماركت ويدوروا على حاجة معينة (زي تفاحة –صابونة – كتاب)، ومنعوهم من إنهم ينطقوا أسامي الحاجات اللي بيدوروا عليها طول ما هم ماشيين في السوبر ماركت ولا يتكلموا خالص، ومجموعة تانية مسموح لهم أنهم ينطقوا أو يتكلموا براحتهم.
النتيجة كانت أن المجموعة التانية كانت بتلاقي الحاجات أسرع من المجموعة الأولى، وهم استنتجوا من دا أن نُطق الأفكار بصوت عالى بيساعد على تنشيط الذاكرة وتنبيه المخ.
خد بالك.. دا هيفيدك جدا لو انت عارف أنت عايز ايه بالزبط؟ أو بتدور على ايه؟ وانك تكون عارف شكله كويس.. ليه بقى؟
«في حالة أنك لا تعرف شكل الشيء الذي تبحث عنه، فإن نطق أسمه لن يفيدك، لأنك عندما تقول كلمة (موز) وأنت تعرف شكل الموز فإن هذا ينشط جزء في المخ يرسل إشارات لعينك لكي تكون أكثر انتباها وحساسية لهذا الشكل وبالتالي تجده بسرعة” -(جاري لوبيان)».
طريقة فعالة للتعلم
كنا بنتعلم بسهولة وأحنا صغيرين، والدليل إننا اتعلمنا اللغة العربية بكل مفرداتها ومعاني الكلمات بسهولة نتيجة أننا بنكررها وبنسمعها بتتكرر من الناس حوالينا.
العلماء بيقولوا أن الحوار مع النفس من أكتر الحاجات اللي ممكن تساعدنا نتعلم حاجات جديدة، ودي الطريقة الأمثل أنك تعلم طفل حاجة جديدة.
الطريقة الأمثل لتنظيم أفكارك
«الحديث مع النفس بشكل متكرر يعتبر أفضل طرق التخلص من التوتر والتشتت، فهذا يساعد على تصفية الذهن وترتيب الأفكار، وهو الخيار الأمثل لك إذا ما أردت اتخاذ قرار هام»..ليندا سبدين «Linda Sapadin» حاصلة على دكتوراه في علم النفس.
جرّب تنظم حياتك وتتكلم مع نفسك بصوت مسموع لما يبقى عندك حاجات كتير بتفكر فيها، شغل أو مذاكرة أو مشوار أو أي حاجة تانية، وهتشوف الحوار دا هيساعدك إزاي انك ترتب أفكارك وتحسن أدائك في كل الحاجات الي بتعملها.
دا معناه أن الناس اللي بتكلم نفسها بصوت مسموع مش مجانين، بالعكس مخهم على درجة عالية من الذكاء إنه وصلهم تلقائيا لاستخدام الطريقة دي، وكمان دا بيخليهم أكثر تركيزا وتحديدا في أفكارهم، وبالتالي بيطلعوا بنتائج أحسن.
متبطلش كلام مع نفسك، دا معناه أنك شخص منظم ومرتب وبتحاول تفهم نفسك وأفكارك.. مش مجنون.
