7 حاجات هتتعلمها في مصر غصب عنك

إحنا كمصريين شخصيات مختلفة تماما عن الآخرين، ومرينا بتشكيلة من الظروف، والأحداث، والمرمطة، والشقلبظات مفيش كائن حي في أي بقعة من بقاع الأرض عدى عليها غيرنا.

ومهما اختلفت تجربتك الشخصية عن غيرك فأكيد هنلاقي حاجات مشتركة اتعلمناها كلنا كمصريين، ولو حتى بطرق مختلفة وفي ظروف مختلفة.

إليكم خلاصة تجربة المصري الأصيل:

• الصبر

أصل الموضوع مش اختيار، كدا كدا لازم تصبر، لازم تصبر على ما تخلص جيش، ولازم تصبر على ما الإشارة تفتح، ولازم تصبر على ما ورقك يخلص في أي مصلحة حكومية ومش صبر عادي لا لا، دا صبر مصري، يعني تخلي بالك طويــــــــــل على ما مدام «عفاف» اللي في الدور التاني تمضي الورق بتاعك.

• المرونة

المرونة شيء أساسي عشان تعيش وتتعايش في مصر، بنتعلم المرونة من كل حاجة حوالينا، احنا شعب ياخد أوسكار في التأقلم والتكييف في أي وضع.

• التقرب إلى الله

الطبيعي وأنت ماشي، أو سايق، أو راكب مواصلات في أي شارع مصري، هتلاقي حاجات تخليك تقول كل شوية «استغفر الله» أو ممكن «حسبي الله ونعم الوكيل» أو «إنا لله وإنا اليه راجعون» يعني حسب الموقف.

• مفيش أي اندهاش

إحنا كمصريين، بقى عندنا العقلية اللي تخلينا نتوقع أي حاجة في أي وقت وأي مكان، يعني مفيش عنصر الانبهار أوالاستغراب دا.

• كظم الغيظ

في حالة إنك بتحاول متتعصبش على سواقين التاكسي الي مبيبطلوش رغي، أو إنك بتحاولي تمشي في الشارع من غير ما تشتمي المتحرشين كل شويا، دا اسمه كظم الغيظ، ودا أجره كبير إن شاء الله.

• اللاإنتماء واللاوطنية

كتير من الشباب المصري بقى معندهوش مانع يعيش في أي دولة في العالم هتوفر له أساسيات الحياة الكريمة، ودي درجة عالية من التسامي فوق المسافات والتقسيمات الجغرافية وحب السفر كمان.

وفيه مواطن مصري طالعان عينه قال لـ«شبابيك» إن «مصر علمتني إن مفيش حاجة اسمها وطنية وانتماء، وإن الإنسان ممكن يعيش في أي حتة طالما اتوفرت له الظروف المناسبة للمعيشة».

• السخرية

السخرية سلاح قوي جدا، المصريين بيواجهوا بيه واقعهم، وبيتفننوا في أنواع وطرق السخرية.