حامل وِسقطتي.. إزاي تقوي نفسك وتعاملي «طنط الحشرية»؟
صحيح هى بتبقى لحظة صعبة جدًا بعد ما استنيتيه بفارغ الصبر، تسقطي والناس كلها بعد لما كانت بتقولك مبروك تقولك قدر الله وما شاء فعل. بس دي عمرها ما كانت نهاية الدنيا ودي مش مجرد جملة بواسيكي بيها لأ ده كلام الدكتور النفسي محمد مزيد.
«مزيد» بيقولك في الموضوع ده من «شبابيك» إزاي تقوي نفسك وإزاي تتعاملي مع جوزك وحماتك وطنط الحشرية؟
إزاي تقوي نفسك؟
لازم تكوني مؤمنة إن اللي حصل ده قضاء وقدر وإن كل شيء قسمة ونصيب وإن الحياة عمرها ما كانت كلها وردي، وإن فيه مواقف صعبة أكيد هتقابلنا بس علينا إننا نتعلم منها ومنخلهاش تأثر فينا بالسلب وده عن طريق إن يكون معاكي «أساليب مواجهة الضغوط»، واللي بيفسرها لينا «مزيد» بأنها بتتكون من أسلوبين:
- أسلوب بنواجه بيه انفعالنا.
- وأسلوب بنواجه بيه المشكلة نفسها.
وأنتي لازم تتعاملي بالأسلوبين دول بإنك تواجهي انفعالك النفسي من اللي حصل وده عن طريق أنك تؤمني إن ده قضاء وقدر وتواجهي المشكلة، وتحليها بإنك تروحي للدكتور بتاعك وتشوفي إيه الأسباب الطبية للسقط وإيه اللي المفروض تعمليه عشان تحافظي على جنينك التاني.
إزاي تتعاملي مع طنط الحشرية؟
في تعاملك معاهم لازم تتبعي الحاجات دي: التجنب، والثقة بالنفس، والصلابة النفسية اللي بيفسرهم ليكي «مزيد» كالتالي:
- التجنب، أنك تتجنبي كلامهم اللي ممكن يضايقك في الموقف ده، ومتخليهوش أبدًا يأثر عليكى.
- الثقة بالنفس، أنك متخليهمش يهزوا ثقتك في نفسك ويحسسوكي أنك غلطانة ومش مسؤولة ومهما قالوا خليكي واثقة في نفسك.
- الصلابة النفسية، أن لو قالولك كلام حسيتي أنك لازم تردي فيه، ردي ودافعي عن نفسك بس مترديش رد مش كويس، لأ ردي رد يحرجهم بالذوق.
جوزك
جوزك طبعًا الموقف ده هيكون صعب جدًا بالنسبة ليه لأنه هيكون مابين إحساسين إحساس إنه كان نفسه يبقى أب وإحساس إنه عايز يواسيكي ويقولك قدر الله وما شاء فعل فإنتي عليكي أنك تقدري حاجة زي كده ومتزعليش لما تلاقيه شارد ومضايق وتتعاملي معاه في لحظاته ديه أنك تقوليله بكرة ربنا يكرمنا وتشوف ولادنا بيتنططوا حواليك وتحكيلوا كمان عن قصة شبيهة لقصتكوا وإزاي تخطوا الموقف ده وربنا كرمهم.
واستخدمي أسلحتك كأنثى من طيبة وحنان وحب لأن الأسلحة دي هتخلي قلبه يرق ويتقبل الأمر ويتخطى صعوبته النفسية.
