عشان ترتاحي.. اهتمي بنفسك وخلي العريس على ربنا
هتجوز امتى، كل الناس اللي حواليا اتجوزت، هو أنا وحشة عشان كدة مفيش حد راضي يبصلي، طب انا فعلًا مفروض أشد حيلي زي ما قالت طنط حشرية، طب أشده إزاي.
أسئلة كتير بتدور في ذهننا ومش بنلاقي ليها إجابة، وعشان كدة «شبابيك» جابتلك الإجابة في الموضوع ده من الدكتور النفسي محمد مزيد، والإجابة دي هتريح بالك وعقلك.
نفسك أولا
بمعنى إنك لازم تكوني متعلمة ومثقفة وقريبة من ربنا وعارفة دينك صح وأيه الصح وأيه الغلط عشان يبقى ليكي قيم وأخلاق، وكمان لازم تشتغلي لأن الشغل بجانب أنه هيحقق ليكي ذاتك، هيعرفك برده على أصناف كتير من البشر ولما تتعرفي عليهم هيكون عندك خبرة وهتكوني عارفة إزاي تتعاملي مع الناس كلها حواليكي سواء شباب أو بنات.
كل الحاجات ديه لما تمشي عليها هتلاقيها بتزود ثقتك في نفسك، ولما ثقتك تزيد في نفسك هتكون النتيجة إن الولد ينجذب ليكي لأنك هيكون فيكي كل مقومات المرأة الواثقة من نفسها القوية لأن ربنا معاها. يعني تطويرك لنفسك اللي بتعمليه عشان خاطر نفسك هو بيكون كمان مصدر جذب للراجل.
السن مش عائق
ولو أنت فيك كل مقومات المرأة الواثقة من نفسها وبرده مفيش حد انجذب ليكي، خليكي عندك حسن ظن بربنا وخليكي واثقة إنه هيرزقك وأن كل حاجة بمشيئته ومتبصيش على إن سنك بيكبر وفرصك بتقل لأن كل الكلام ده غلط.
عمر كبر السن ما كان عائق في الجواز لأن ربنا إذا أراد شيئا قال له كن فيكون، فمهما كان سنك لو ربنا أراد أنك تتجوزي هتتجوزي، وبصي على السن أنك هل لحقتي تحققي طموحاتك في شغلك ولا لأ، وحطي خطة عشان تحققيها السنة الجاية ومتربطيش السن أبدًا بإذا كنتي متجوزتيش لسة.
مترخصيش نفسك
دكتور «مزيد» بينصحك أنك مترخصيش نفسك، يعني متحوليش تكسري حياءك وتصطنعي حاجات عشان تجذبي الراجل، لأن لو انجذب ليكي هيبقى جذبه مظهرك الملفت بس، ومظهرك لو راح هو كمان هيروح معاه وده لأن نفسك فاضية مفيهاش الحاجات اللي اتكلمنا عليها فوق.
ونصيحة دكتور «مزيد» ليكي أنك تكوني عفيفة، وخافي على نفسك ومتعمليش أي حاجة وحشة تقلل من نفسك، وقربي من ربنا وحافظي على علاقتك معاه لأن طول ما أنت ملتزمة في علاقتك مع ربنا هيرزق بالشخص اللي قلبك يحبه وعقلك يكون واثق فيه.
طنط الحشرية
أما بقي طنط الحشرية اللي كل ما تشوفك تحشر نفسها في حياتك وتسألك هتتجوزي امتى فـدكتور «مزيد» بيقولك لما تسألك ابتسمي في وشها ابتسامة رضا وخليكي قوية لأنك واثقة في ربنا إنه هيرزقك وقولي ليها كله بمشيئة ربنا يا طنط، ربنا ييسر الأمور من عنده.
اذكري دايمًا ربنا في ردودك ليها خليكي ساندة عليه، ومتتعصبيش ومتكشريش أبدًا لما تسألك لأنها ممكن تسوق فيها بمعنى إنها تقولك كلام يضايقك أكتر، فكل ما أنتي ابتسمتي ليها ورديتي بأسلوب جميل كل ما بعدتيها عن إنها تسألك تاني بالذوق .
