أفكار مجنونة عشان تخسي
جربتي وصفات تخسيس كتير وبرده مفيش فايدة، قررتي إنك تعملي عملية بس خوفتي في أخر لحظة، فدخلتي في مرحلة اكتئاب وزدتي عن الأول بكتير. «شبابيك» بيقولك اخرجي من حالة الضيقة اللي عايشها، وجربي أفكارنا المجنونة عشان تخسي.
اتحدي أصحابك
شوفي كام واحدة في أصحابك عايزة تخس واتفقوا إنكوا في مدة محددة عايزين توصلوا لوزن معين، وادخلوا في تحدي مع بعض انزلوا اتمشوا في أي تراك نادي أو في الشارع أو اعملوا سباق جري واتحدوا بعض وحمسوا بعض طبعًا.
ولو يا ستي شايفة ان اللي حواليكي صحيح عايز يخس بس معندوش حماس يعمل حاجة، فعندك كذا جروب بنات على الفيس بوك تقدري تقولي ليهم إنك عايزة تخسي، بس محتاجة حد يشجعك، فهتلاقي ناس كتير متحمسة معاكي وعايزين يخسوا، جمعيهم بقى كلهم في جروب وابتدوا اتحدوا بعض مين هيوصل للوزن المطلوب في الوقت اللي هتحددوه، وممكن كمان تتفقوا إنكوا تروحوا ترقصوا زومبا أو رقص شرقي في أي جيم.
ورقة على التلاجة
ارسمي الشكل الفظيع اللي متخيلة أنك هتكوني فيه لو سبتي نفسك ومخستيش، والزقي الورقة على التلاجة، والرسمة ديه هتبقى الحل في تخسيسك بسرعة جدًا؛ لأنك كل لما تشوفيها هتخافي أنك توصلي للشكل ده وهتخافي كمان أنك تفتحي التلاجة تاكلي أكل زيادة في غير وقته الصحي المناسب.
اتخيلي نفسك لما تخسي
زي ما رسمتي ورقة على التلاجة عشان تخوفك من التخن، ارسمي رسمة بس المرة ديه في خيالك، رسمة بتتخيلي فيها نفسك قد ايه هتكوني جميلة وجسمك متناسق وبتلبسي كل حاجة نفسك فيها :)
اجري على سلم شغلك
اخطفي 5 دقايق من الشغل واطلعي وانزلي وهكذا على السلم كله بتاع العمارة اللي فيها شغلك؛ لأن طبعًا ده هيخليكي تعملي مجهود وهتخسي ومتكسفيش من حد قابلتيه على السلم ولو حد سألك مثلًا بتعملي ايه، قوليله بعمل رياضة بابتسامة لطيفة، ولو اللي معاكي في الشغل حابين يخسوا برده خديهم وياكي واطلعوا وانزلوا. ولو شغلك كان في مكان مفيهوش سلالم عمارات، زي فيلا مثلًا يبقى برده اخطفي نفس الدقايق ديه واتمشي حوالين مكان شغلك.
شغلي مهرجانات وارقصي وادلعي
امشي على نهج إسلام فانتا لما قال ونشغل مهرجانات للقمة ونرقص كدة ندلع :D ، وشغلي أغاني شعبية ومهرجانات بتحبيها واديها رقص في البيت عندك، لأن طول ما انتي بترقصي بتعملي مجهود، والمجهود ده هيخسسك جدًا ومتبصيش أنك بترقصي عشان تخسي عشان متحسيش أنك ملزمة إنك تعملي حاجة معينة لأن ساعات الالتزام بحاجة بيقفل الشخص منها فبصي ليها أنك بترقص عشان حابة ترقصي وتغيري مودك.
