5 نصائح للتعامل مع «المزعجين»
نبحث في علاقاتنا بالآخرين عن الراحة التي نفتقدها وسط الأقارب، لكن الأمر يصبح مستحيلًا حينما نصطدم بفصيلة «المزعجين» وتتحطم آمالنا في الخروج إلى عالم مليء بالمتفهمين.
لو وقعت في «المزعجين» لا تقلق، فقط اتبع الـ5 نصائح التي يوجهها لك عبر «شبابيك» الأستاذ والخبير النفسي الدكتور أحمد عبدالله، عند التعامل مع المزعجين وستجد الأمر بسيطًا حينها.
اقطع علاقتك بيهم
لو علاقتك بيهم سطحية في الوقت ده لازم متأجلش القرار وتقطع علاقتك بيهم فورًا؛ لإن كل دقيقة هيفضلوا في حياتك إنت هتكون الخسران الوحيد.
بس لو كنت مضطر للتعامل معاهم، حاول إنك تلاقي حل يناسبك من غير ما تزود الضغوط عليك.
وقف توقعاتك بإنه يتغير
«المزعجون» يعتقدون دائمًا أن تدخلهم في حياتك لمصلحتك اللي إنت مش واخد بالك منها، علشان كده طالما مضطر تتعامل معاهم لازم توقف توقعاتك بإنه هيجيله يوم ويبطل تدخل في حياتك أو إنه هيتغير.
لازم تتعلم إنك تقبله زي ما هو، بس على الناحية التانية صمم على رأيك ومتنفذش أي حاجة يطلبها لمجرد إنك تخلص من إزعاجه.
احصل على الاستقلال
كتير من المزعجين بيكونوا شايفين إن احتياجنا الدائم ليهم بمثابة تصريح للتدخل في حياتنا سواء كان التدخل ده بيرضينا أو لا. علشان كده حاول إنك متحتاجش لأي حد وحقق الاستقلال اللي من خلاله هتقدر ترفض أي حد منهم من غير ما تحس إنك مضطر تعاملهم.
ارسم حدودك
من حق أي إنسان إن يكون ليه مساحة شخصية في حياته، علشان كده لو مقدرتش ترسم حدودك هيكون من السهل إزعاجك، خصوصًا من الأشخاص اللي مبيحترموش وجود الحدود الشخصية.
عاملهم بلطف
حاول إنك تخلي أسلوبك اللطيف وسيلة لتغيير تفكيرهم ناحيتك؛ لإن ممكن يكون أسلوبهم معاك بالطريقة دي لإنهم عاوزين اللي يتعاطف معاهم أو اللي يسمعهم.
علشان كده حاول تسمعهم ومتوقفهومش عن الكلام لإن ممكن تكون طريقتك دي وسيلة لتغيرهم.
