عشان تثق في نفسك.. دليلك في 5 نصايح
مين فينا مش بيحس من وقت للتاني إن ثقته في نفسه بتقل، وإن كل يوم بيعدي عليه بيفقد فيه السيطرة على نفسه. صحيح فيه ناس بتعرف تسيطر على الإحساس ده بس معظمنا مبيعرفش وبدل ما يكون مجرد إحساس عابر بيحوله لحالة بيعيشها كل يوم.
وعلشان تتخلص من الإحساس ده، أستاذ الطب النفسي الدكتور محمد مزيد بيقدملك في الموضوع ده من «شبابيك» 5 نصائح لو التزمت بيها هتزود ثقتك في نفسك من غير مساعدة أي حد.
بلاش تقارن نفسك بغيرك
طول ما أنت بتقارن نفسك بغيرك عمر ما هيبقى عندك في ثقة في نفسك، لازم تعرف إن ربنا خلقنا كبشر فيه فروق فردية بيننا، بس في نفس الوقت لازم تعرف إن في حاجة عندك محدش تاني بيعرف يعملها.
ولو هتعرف توزان خلي المقارنة إيجابية وبلاش تكون سلبي، حاول تخلي المقارنة دي وسيلة لإنك تزود ثقتك بنفسك من خلال معرفتك بنقاط القوة اللي عندك.
متسمعش كلام حد
لو فعلًا ناوي تزود ثقتك بنفسك يبقى لازم تستغنى شوية عن كلام الناس اللي حواليك لإن كلامهم مش مقدس، يعني لو شايفين إنك غلط في حاجه معينة أو عملت حاجة بشكل غلط ده مش معناه إنك فاشل وعمرك ما هتنجح.
بص حواليك هتلاقي الناجحين ياما اتقالهم عبارات فشل بس لو ثقتتهم بنفسهم كانت اتهزت عمرهم ما كانوا هيوصلوا لكل النجاح ده.
حب نفسك
النقطة دي ممكن تكون مشكلة معظمنا لإنهم بيبقوا فاكرين إن أضرارها مش كبيرة طالما مش بتضر غيرهم مع إنها في الأساس بتضرهم وبتضر غيرهم.
لو عرفت تحب نفسك هتكون معجب بيها في كل حالاتها سواءً كانت صح أو غلط وده هيخلي أي حد يحاول يأثر على مستوى ثقتك بنفسك يفشل في محاولاته.
اهتم بمظهرك
بلاش تقول إن المظهر مش مهم لإن أغلب الناس بتتعامل بنظرية الجواب بيبان من عنوانه، حاول إن مظهرك يكون مهندم ومنظم مش لازم يعجب كل اللي حواليك، أهم حاجه إنه يكون عاجبك إنت.
طول ما أنت عندك إحساس إنك مستريح لشكلك، ده هيزود ثقتك وهيظهر خلال تعاملاتك مع اللي حواليك.
ابعد عن المنافقين
هتقول طيب وأنا هعرف إزاي إنه منافق، هقولك إنت عارف كويس مين اللي قدامك لما بيقولك سلبية فيك بيبقى قاصد إحباطك ومين لما يقولك إيجابية بيبقى كداب.
بلاش تسمعلهم كتير لإن ثقتك في نفسك هتعلى وهتقل حسب كلامه اللي هتتصدم في الآخر لما تعرف حقيقته.
