السينما الهندية مش كلها «مهبوب ومهبوبة».. والدليل الأفلام دي
السينما الهندية اتعرفت بأفلامها الرومانسية اللي بطلها «المهبوب والمهبوبة» لدرجة إننا دايمًا بنربط السينما الهندية بالأفلام الرومانسية. لكن في الحقيقة فيه أفلام هندية بتقدم أفكار مختلفة بعيدة عن الإطار الرومانسي اللي اتحطت فيه السينما الهندية.
في الموضوع ده «شبابيك» يترشحلك 5 أفلام هندية عشان تشوفها ممكن تغير وجهة نظرك عن السينما الهندية.
البلهاء الثلاثة.. 3 Idiots
«عامر» طالب ذكي جدًا بيستغل ذكاءه في إنه يحطم القواعد التقليدية في دراسته بكلية هندسة، والقواعد ديه بتتمثل في مدير جامعة مش بيفكر برا الصندوق وعايز الطلبة يبقوا نسخ مش بتفكر وبتحفظ بس وعشان كدة بيقرر إنه يتحدى النظام والمدير والفقر.
Black
الإصرار والتحدي معاني عظيمة بنشوفها في الفيلم ده، اللي بيدور حول الفتاة ميشيل اللي لا بتسمع ولا تتكلم ولا بتشوف من أول ما اتولدت، ووالديها دوروا ليها على علاج بس ملاقوش حل فالأمل فقدوه بس المعلم «سهاي» قرر لما عرف حالتها إنه يروح ليها ويعلمها بدون أجر.
P K
أسئلة كتيرة كانت بتدور في ذهننا وإحنا صغيرين بس عمر ما حد جاوبنا عليها على اعتبار إنها أسئلة جريئة، بس الفيلم ده بيتعرض لأهم التابوهات حساسية وهى علاقة الدين بالمجتمع ، وده من خلال اكتشاف التنوع العقائدي الكبير ومفهوم القدسية لدى الناس وكيف يتعايش المجتمع مع الأفكار الغريبة.
Mumbai Diaries - يوميات مومباي
أشخاص يجمعهم القدر في مدينة مومباي، وواحد منهم بيشتغل في بنك وبيحب التصوير فقرر إنه يلف في المدينة عشان يصور أحلى لحظاتها، والتاني شاب فقير بيدور على فرصة إنه يشبع رغبته في التمثيل، والتالت رسام بيحاول يدور على أي لحظة في المدينة تلهمه إنه يرسمها، وكل واحد منهم هيورينا جزء من الحياة في مدينة مومباي.
النصر للهند - chak de india
برغم اتهامه بالخيانة لأنه خسر قدام منتخب باكستان بيقرر بطل الهوكي «شاروخان» إنه يرجع للهند بعد 7 سنين من السفر خارجها، وإنه يدرب منتخب فتيات الهوكي برغم معاناة حياتهم اليومية اللي بتقضي على أي شعور جواهم بالطموح، بس برغم كل ده بيشوف «شاروخان» إنه هيقدر يخليهم ينتصروا على المعاناة في حياتهم وفي المباراة.
