5 تصرفات ابتعد عنها في «الإنترفيو»
كتير مننا بيتعاملوا مع «الإنترفيو» باعتباره مشكلة صعبة ملهاش حل، لدرجة إنهم ممكن يشتغلوا أي وظيفة ملهاش علاقة بالمؤهل بتاعهم لمجرد إنهم يبعدوا نفسهم عن الخطوة دي.
لازم تعرف إن الخطوة هتفضل صعبة طول ما أنت عاوزها تكون صعبة، والدليل على كده إن في كتير بيمروا بيها من غير أي مشكلة وبنجاح ملحوظ كمان، كل الحكاية إنك محتاج تبعد عن 5 تصرفات هي اللي بتكون السبب الرئيسي لرفضك من أي وظيفة.
بلاش مبالغة في قدراتك
لازم تعرف إن المقابلة الشخصية جزء مهم جدًا في «الإنترفيو»، يعني مينفعش تهتم بشكل لبسك وإنت رايح ومش عارف هتقول إيه؟ أو تقول كلام فيه مبالغة واضحة عن قدراتك وأنت في الحقيقة متعرفش تعمل أي حاجة من اللي بتقوله.
صدق كلامك مع اللي بيعمل معاك «الإنترفيو» هيحسسه إنك بتحترم إمكانياتك ونفسك، بس الكذب هيعرفه إنك شخص مينفعش يُعتمد عليه في أي شىء، علشان كده عود نفسك إن اللي تعرف تعمله قول عليه واللي متعرفش بلاش مبالغة فيه وقول الحقيقة.
متخليش ثقتك بنفسك قليلة
مش معنى إنك تبقى واثق من نفسك إنك تحول الموضوع لغرور، وضروري جدًا قبل ما تدخل «الإنترفيو» إنك تطمن نفسك علشان تعرف تتعامل صح، بس اللي مش صح إن ثقتك تبقى صفر.
طيب إزاي؟ عمر اللي بيعمل معاك المقابلة هيرضى بيك حتى لو معاك دكتوراه وأنت ثقتك في نفسك قليلة أو مهزوزة، ولازم تعرف إن الثقة أحيانًا بتخلي ناس تقبل في شغل بالرغم إن مش متوافر فيها كل الشروط.
خلي بالك من التواريخ والأرقام
معظم الشغل دلوقتي بيخليك تملى «أبليكيشن» بالرغم إن الـ«سي في» بيكون ضمن مطالبهم، في الوقت ده خلي بالك من مشكلة ممكن تظهرلك فجأة وهي التواريخ والأرقام. اقرأ أيضًا⇐اسأل الـ10 أسئلة دول في نهاية الإنترفيو.. هتعمل شغل
وبما إننا أحيانًا بنكتب الـ«سي في» بتاعنا من غير ما نحدد الفترة اللي اشتغلنا فيها في الشركة كذا أو حتى لما بنكتب بنبقى مش مركزين كويس في التواريخ دي، فلما بنتسأل بنقول كلام غير اللي قدامم في السي في.
في الوقت ده إما بتقال عليك كذاب أو مش مهتم بالوظيفة اللي أنت جاي تتقدملها فمذاكرتش الـ«سي في» بتاعك كويس.
ابعد عن الكلام الكتير
الموازنة حلوة في كل شيء علشان كده مينفعش يكون كلامك قليل أو إنك تكون بتتكلم زيادة عن اللزوم.
لازم تعرف إن الكلام الكتير أكيد هيدخلك في طريق من الأسئلة أنت في غنى عن الإجابة عليها، بس في نفس الوقت إجابات لازم تكون وافية عن سؤاله وبتوصله اللي عاوز يعرفه. اقرأ أيضًا⇐كيف تجتاز مقابلة العمل الشخصية بنجاح؟
لازم تعرف كل حاجة عن الشركة
مهم جدًا قبل ما تروح الشركة أو المصنع أو أيًا كان اللي هتعمل فيه «إنترفيو» إنك تكون عارف كل حاجه عنه؛ لإن المعلومات دي إنت ممكن تتسأل عليها وإنت جوه «الإنترفيو».
مثلًا ممكن يسألوك عن منتجاتهم أو فروعهم أو العملاء اللي بيستهدفوهم أو ممكن تلاقي السؤال عن أفضل الطرق لتطوير المنتجات اللي إنت أصلًا متعرفش عنها حاجه، في الوقت ده لو مكنتش عارف لازم تعرف إنك مرفوض أكيد.
