ليه بتقول عكس اللي في قلبك؟.. اعرف السبب من هنا

أوقات كتير بنقول كلام عكس اللي قلبنا حاسس بيه، وحاجة زي كدة بتدخلنا في حالة إرهاق نفسي، وأوقات تانية بتكون راحة لينا.

في تقرير منشور على موقع Speeli everything summarised هنعرف مع بعض أسباب إننا بنقول كلام عكس اللي قلبنا حاسس بيه.

خوف

خوفك من إنك لو عبرت عن اللي حاسس بيه تخسر مصلحتك عند الأخر يعني مثلًا إنك لو قولت لرئيسك في الشغل رأيك السلبي فيه ممكن ده يخليك تخسر مصلحتك عنده. مش بتتحكم في عصبيتك إنك تقول كلام في ساعة غضب مش قصدك تقولوا.

غيرة

غيرتك من أشخاص معينة بتخليك لو صادف وسألوك عن رأيك في حاجة تخصهم إنك تقولهم «وحشة جدًا»، رغم إنها حلوة بس أنت غيران منهم فبتقول عكس المتوقع.

احراج

أوقات كتير بتكون عايز تقول حاجة بس محرج من الناس اللي حواليك إنهم يضحكوا علي اللي هتقوله، فالإحراج ده بيخليك تسكت وتظهر السكوت عكس ما بتحس بيه من إنك عايز تقول حاجة.

كدبة لتجميل وضع

أنت ساعات بتلجأ للكذب في حاجات لمجرد بس إنك تجمل وضعك، يعني لو كنت ساكن في حي شعبي بتقول للناس إنك ساكن «في الشيخ زايد».

لتزويد ثقتك بنفسك

ممكن يكون الكدب ده عشان أنت حاسس إن ثقتك بنفسك ضعيفة فبتلجأ لكلام حلو عن نفسك عشان الناس يبصوا ليك على إنك واحد ناجح واثق من نفسه.

الفوز ثم الفوز

يعني ممكن تقول كلام وجهة نظرك فيه مش صح وأنت مش قاصده بس لمجرد إنك تطلع من الحوار فايز.

مبتقدرش تعبر

إنك مش بتعرف تعبر عن مشاعرك تجاه الناس اللي بتحبهم وممكن ده يخليهم يحسوا إنك بتكرههم مع إنك بتحبهم بس مش بتعرف تعبر ودي بتبقى مشكلة كبيرة مع الناس اللي في علاقة عاطفية لما يكون واحد فيهم مش عارف يعبر عن حبه للتاني فده بيخلي فيه مشاكل تحصل بينهم.

حساس بزيادة

حساسيتك الزيادة تجاه مشاعر الآخرين بتخليك مش بتقدر تنتقدهم عشان متجرحش مشاعرهم فبتقول كلام عكس احساسك بيه.

نيتك كويسة

بمعنى إنك مش بتبقى عايز تقول حقيقة اللي حاسه جواك عشان متجرحش حد فبتضطر تقول حاجة كويسة ليه عكس اللي أنت حاسه.