مواقع هتخلي أي «HR» يقبل الـ«CV» بتاعك بسهولة
معظمنا لما بيفكر في خطوة الشغل، بيجي على باله حاجات كتير من أهمها الـ «CV» بس مبيكونش عارف إزاي يبدأ فيه أو أيه النماذج اللي ممكن تساعده في عمل «CV» يميزه عن غيره لما يتقدم لأي وظيفة.
وبما إن الـ «HR» بيتعامل مع عدد مهول من الـ «CV»، فلازم بتاعك يكون مميز من حيث (التنظيم- الوضوح- التركيز على نقاط القوة)، وعلشان تلفت نظر الـ «CV» صح «شبابيك» هيعرفك في التقرير ده إزاي تنجح في الخطوة دي بكل سهولة من خلال مواقع متخصصة.
Europass
الموقع ده هيساعدك في تطوير سيرتك الذاتية من خلال تقديم مهاراتك والمؤهلات الخاصة بك بشكل فعال، ولو حابب تنشيء سيرة من البداية للنهاية فبردوا تقدر تعمل الخطوة دي من خلال الأمثلة الموجوده.
ولو عاوز تحمل أمثلة جاهزة بأي لغة، تقدر تستعين به. كمان الموقع متاح فيه خدمة التوظيف الأوروبية ده غير إنه بيوفرلك معلومات عن التعليم والحياة هناك علشان لو فكرت تسافر أوروبا.
Resume naukri
بعد ما تخلص الـ «CV» بتكون مش عارف اللي أنت عامله ده بنسبة أد أيه، والموقع ده هيفيدك في النقطة دي لإنه هيقيملك الـ «CV» بتاعك، وكمان هيعرفك إزاي تظبطه في 30 ثانية.
وهنا هتلاقي نماذج لكافة التخصصات هتساعدك في إنشاء سيرة ذاتية تظهر بيها نقاط قوتك وتحسن فرصتك في الحصول على الوظيفة مقارنة بغيرك.
حلو جدًا إننا نظبط الـ «CV» بتاعنا في مواقع متخصصة بس متنساش إنك أنت اللي بتختار «الفونت»، والألوان، وكل الحاجات دي يعني معنى كده إنك بردو ممكن تقع في مشاكل أنت في غنى عنها، علشان كده لازم تراعي أنك تبعد عن الحاجات اللي الـ HR بيكره يشوفها زي إيه: اقرأ أيضًا⇐كيف تجعل صورتك «السيلفي» تناسب الــ«CV»؟
الألوان: بلاش معاملة السي في زي كراسة الرسم، وكفاية الأبيض والأسود لإن ده هيحسسهم إنك شخص محترف.
مش أكتر من صفحتين: مينفعش يكون السي في أكتر من صفحتين، لازم تتعلم إنك تعرض نفسك في المساحة دي ومتخرجش عنها؛ لإن وقت الـ «HR» مش كتير علشان يقرأ ده كله.
Fonts: لازم يكون الحجم اللي بتستخدمه ونوع الـ Fonts سهلة في القراءة على أي حد، بمعنى حاول إنك تختار نوع خط واحد وحجمين مختلفين.
صورة UnProfessional: الصورة لازم تكون واضحة مش عن بعد أو بالجنب؛ لإنها بتكشف جزء معين في شخصيتك.
بياناتك الشخصة: قبل ما تكتب كلمة عنها لازم تتأكد إنها صح لو مثلًا بنتكلم عن رقم تليفون أو إيميل غلط.
Cover Letter
مينفعش تبعت إيميل فاضى و حاطط في الـ CV attached و خلاص .
علشان كده قسم الإيميل بتاعك لـ Subject عنوان، وbody الرسالة نفسها اللي هتكتبها اللى هى الـCover letter ، وAttachment أو المرفقات اللي هتحط فيها الـ«CV».
«العنوان»: بتكتب فيه اسم الوظيفة اللي إنت مقدم عليها.
«الإيميل نفسه»: بتوضح فيه الطلب اللي إنت متقدم ليه، مؤهلاتك العلمية، خبراتك السابقة باختصار، مهاراتك اللي تخليهم يقبلوا الـ«CV» بتاعك بجانب ذكر مهاراتك اللغوية.
«المرفقات»: لوضع الـ«CV» بشكل كامل. اقرأ أيضًا⇐كيف تكتب Cv نموذجيا؟
