رئيس التحرير أحمد متولي
 خطيبك صراحته «ألوان».. 8 نصائح هتعدلك ديله

خطيبك صراحته «ألوان».. 8 نصائح هتعدلك ديله

زي ما التكافؤ الاجتماعي مهم جدًا في العلاقة بين أي اتنين، كمان الصراحة شيء ضروري مينفعش العلاقة تستمر من غيره، وإن كان معظم الرجالة بتتعامل مع الصراحة كل واحد حسب لونه.

يعني لو كدب أبيض هيبقى مفيش مشكلة بس لو أسود مينفعش، وطبعًا الكلام ده مش صح لإن الكذب كذب في أي صورة، وعلشان المشكلة دي تتحل، «شبابيك» بيقدملك 8 نصائح هتعرفك إزاي تتعاملي بيها مع خطيبك الكذاب.

  • اوعي تقوليله إنه «كذاب»

مينفعش تكوني عاوزه تحلي مشكلة فتعالجيها بمشكلة أكبر، لازم تعرفي إنك لما تقوليله إنت بتكذب صراحة هيكدب عليكي أكتر وهيقولك محصلش وفي الوقت ده هتكوني خسرتيه أكتر.

اعرفي متى تعدي كذبته ومتى تصارحيه بيها، ولما تيجي تقوليله عليها إيه الطريقة والكلام اللي المفروض تقوليه؛ لإن مهما قولتيله إنت كذاب عمره ما هيبقى صادق وهيشوف دائمًا هيفضل في نظرك كذاب حتى لو كان صادق.

  • حسسيه إنك مصدر الأمان

هنا بقى إنتي لازم تصاحبيه، بمعنى تاني حسسيه إنك مصدر الأمان بتاعه وإنه مهما كذب إنتي هتتقبلي أي حاجه هيقولها من غير ما صورته تتهز قدامك.

في الوقت ده هو عمره ما هيخبي عليكي أي حاجه بيعملها؛ لإن عارف إنك هتقبلي كلامه، لما تسمعي منه حاولي تقوليله رأيك في الموقف اللي هو عمله وإن كان أفضل تعمل كذا بمنتهى الهدوء، هتلاقيه من نفسه فكر في كلامك وبطل كدب واحدة واحدة.

  • اعرفي ايه اللي بيخليه يكدب

قبل ما تتضايقي من كدبه، اعرفي السبب اللي بيخليه يكدب معاكي، مش يمكن أسلوبك مستفز وهو اللي بيخليه يعمل كده.

عارفه إن مش كل البنات أسلوبهم مستفز وإن الولاد مش ملايكة، بس معرفة السبب هنا هيفيدك في أسلوب العلاج يإما يخليكي تغيري من نفسك أو تعرفي الوسيلة الصح علشان تغيري منه.

  • افتحي الموضوع تاني بس بشكل مختلف

خلاص قررتي إنك تختاري الوقت المناسب علشان تكلميه في نفس الموضوع تاني، هنا بس لازم تعرفي هتقولي إيه.

ممكن تجيبي الموضوع من ناحيه إنك حاسة إنه مخبي عليكي حاجه وإنك مش مرتاحة وقلقانة عليه، أو تقوليله إنك اكتشفتي من بره إنه كدب عليكي وكان نفسك هو اللي يصارحك بالحقيقة، اطلبي منه إنك هتستحملي أي حاجه تسمعيها طالما منه مش من بره.

  • لو صمم إنه يخبي بلاش تلحي

إيه الفايدة من تصميمك وإنتي عارفة إنه مش هيصارحك بالحقيقة؟ لما تلاقيه مصمم خليه على راحته بس حاولي تحسسيه إنك مدايقة منه بس بطريقة تخليه ميقولش عليكي إنك نكدية أو مصممه تدمري العلاقة بينكم.

مرة على مرة هيجي يقولك وهو عارف إنك هتتصرفي بشكل عصبي، فاجئيه هنا بأسلوبك الهادىء هتلاقيه هو اللي جاي بعد كده يقولك على كل حاجه من غير ما تسألي.

  • بلاش ألفاظ خارجة

لو فاكرة إن الألفاظ الخارجة والزعيق هو اللي هيخليه يبطل كذب تبقي غلطانة، بالعكس ده هيبعد بالمشوار عنك وهيدور على حد يقبله بعيوبه.

اقرأ أيضًا⇐8 صفات تبعد النساء عنك

مش بقولك استحملي كدبه، بس لازم تعرفي تحتويه كويس زيه زي الأطفال اللي لما بيحسوا إننا مطمننهم بيقولوا الحقيقة، ده غير إن الالفاظ دي هتضيع العلاقة بينكم لإن هيحس إن كرامته بتتهان كل دقيقة وهو معاكي.

  • ابعدي عن اللوم الكتير

هو عارف إنه لما يجي يقولك الحقيقة هتلوميه، فهيوفر على نفسه محاضرة طويلة عريضة هيسمعها لما يقولك، فبيختصر الطريق بالكذب.

اقرأ أيضًا⇐العلاقة العاطفية تحتاج قوة الطرفين.. امشي على الروشتة دي

لازم تقولي لنفسك إن المصيبة حلصت خلاص وإن كلامك مش هيعمل حاجه، بس لو طلعتي ذكية في الطريقة اللي بتستقبلي بيها كلامه هيجي بعد كده يقولك على المصيبة قبل ما يعملها فتقدري تتصرفي.

  • فكري في حل عملي

جربتي كل الوسائل ومش عارفه تتأقلمي مع كده وده حقك طبعًا، ممكن تقوليله إنكوا هتلعبوا لعبة، حددي فيها رقم معين لعدد الكذب اللي بتتوقعي إنه يكذبه عليكي على مدار إسبوع مثلًا.

ولو نجح في إنه يقل عن العدد اللي قولتيه، يإما تجبيله هدية أو تعزميه على غداء مثلًا أو أي مكافأة تحددوها مع بعض، بس متنسيش تكون حاجة بيحبها يعني مش مثلًا إنتي عارفة إنه بيكره الخروج وتقوليله الهدية هي خروجة.

ههههههههههه

هه

سوزان حسني

سوزان حسني

صحفية مهتمة بالكتابة في مجال العلاقات