ليه الستات بتحب تشتري الأحذية؟.. هو ده سر الكعب العالي
معظم البنات والسيدات بيحبوا يشتروا أحذية كتير بمختلف الأشكال والأنواع والتصميمات؛ الكلاسيكية، والرياضية، والفلات، والكعب العالي.
يعني ممكن بنت يكون عندها أحذية كتير جدا، بس مجرد ما تشوف شكل جديد أو لون عاجبها تشتري مع أنها مش محتاجاه بس لأن الشكل شدها وعجبها.
لكن الموضوع مش بس أنهم بيحبوا يشتروا أحذية كتير، ولكن الموضوع هوس بشراء الأحذية طوال حياتهم لدرجة أنه لما بيبقى في أزمات اقتصادية أو مشاكل مالية، صناعة الأحذية مش بتتأثر بالموضوع دا.
الكاتب والمدون الدنماركي ومؤلف كتاب «حقائق وأكاذيب حول الشراء» مارتن ليندستون بيقول إن لما البنات أو السيدات يشتروا حذاء جديد بيكونوا حاسين أنهم مبسوطين جدا بشكله ولونه، ولو كانت متضايقة من حاجة قبل ما تشتريه، مزاجها بيتغير تمامًا بعد ما اشتريته، دا ممكن كمان يروحوا يشتروا مخصوص لأن حالتهم النفسية سيئة، دا لأن المخ بيفرز هرمون «الدوبامين» ابلي بيحسن الحالة النفسية بشكل كبير، وممكن الموضوع يوصل لإدمان الحالة دي وإدمان الإحساس بالدوبامين.
إحساس «الدوبامين» بيقل لما تيجي تدفع الفلوس وممكن تحس بتأنيب ضمير في الوقت دا، بس هتشتريه برضو والإحساس الحلو دا بيستمر فترة وبيظهر تاني كل ما تيجي تلبس الحذاء دا، ودا الي بيجذبها تاني للأحذية المعروضة في أي مكان ، أنه بيفكرها بحالة السعادة الي حصلتلها لما لبست أحذيتها قبل كدا وكان شكلها عاجبها.
لكن «الدوبامين» مش السبب الوحيد، وفقًا لـ«ليندستون» في سبب تاني نفسي برضو، وهو أن شراء الأحذية بيحفز الجزء الأمامي للدماغ، لأن الستات بيعتبروا الأحذية ثروة، وبيهتموا جدًا بشكل ترتيبهم في دواليب الأحذية وبيتفاخروا بشكله قدام صديقاتهم وقرايبهم.
الباحثة في علم الأنثرولوجيا هيلين فيشر بتقول إن «سر شراء السيدات للأحذية خصوصًا أحذية الكعب العالي، هي إننا كبني آدمين بنتشابه مع الحيوانات في ربط القوة والسلطة بالطول والقوة الجسدية، ودا الي بتعمله أحذية الكعب العالي إنها بتدي إحساس جسدي بالقوة والسيطرة».
دا غير أن أحذية الكعب العالي ليها تاريخ طويل مع القوة والسلطة، لأن في بداية ظهورها كان أبناء الطبقات العليا بس هم الي بيلبسو أحذية الكعب العالي وهم اللي يقدروا يتحملوا تمنها، وكان الكعب العالي مؤشر على المستوى المادي والاجتماعي العالي.
