6 أخطاء نرتكبها عند الاستماع للآخرين
لما حد بيبقى عايزك تسمعه وأنت قررت تسمعه، في شوية حاجات لازم تاخد بالك منها عشان يحب يتكلم معاك تاني وميندمش أنه قرر يحكيلك.
دي أخطاء بنقع فيها لما بنسمع أي حد بيحكي عن أي موقف مر بيه أو حاجة عايز يحكيها لحد:
المقاطعة
لو اللي هتقوله مش ضروري أن المتكلم يعرفه دلوقتي يبقى استنى لما يخلص كلامه خالص وبعدين قول رأيك أو تعليقك، لكن متقاطعهوش كل شوية لأن دا معناه أنك مش مهتم تسمع الكلام لآخره.
لكن برضو مهم أنك تسأل لو مش فاهم حاجة معينة عشان تقدر تستوعب الكلام، استغل الوقت الي المتلكم بيسكت فيه واسأله أو استغل فرصة أنه يسألك «فاهمني؟» أو «فاهم قصدي؟»
التركيز على حاجات غير المتلكم
لو أنت بتسمع حد بس وفي نفس الوقت باصص في الموبيل أو بتعمل أي حاجة تانية بعينيك بس، ثق أنه هيفهم أنك مش مركز معاه 100%، وهياخد الانطباع أن كلامه مش مهم عندك، وممكن يكون شخص حساس فيتضايق وميحبش يحكيلك أي حاجة تاني.
مهم كمان أنك تكون باصصله وهو بيتكلم، لأن في معظم الثقافات يفضل أنك تبص للشخص المتكلم في عينيه Eye contact.
التململ
لازم قبل ما تقرر تسمع لشخص ما تبقى مجهز نفسك توجهله كامل انتباهك، يعني متبقاش قاعد معاه بتتاوب أو بتفكر في الأكل أو تتحرك كتير، أو بتفكر في حاجة تانية أصلا ومش مركز معاه.
الاستماع بهدف الرد
معظم الناس بتسمع الي حواليها بهدف أنها تجهز رد على الكلام، مش بهدف أنها تسمع وتفهم فعلا اللي بيتلكم بيقول أيه.
دا بيخليك تجهز عقلك أنه ياخد من الكلام أجزاء معينة ويجهز ردود عليها ويتجاهل أجزاء تانية لان معندكش ردود عليها، وبالتالي طول الكلام هتركز على تجهيز الردود بدل ما تستمع فعلًا.
التسرع في الحكم
دا خطأ في التفكير بشكل عام وحتى لو أنت مقولتش الحكم دا بصوت عالي، وجوده في دماغك هيأثر على تواصلك مع الآخر.
لما بتسمع حد بيحكيلك أي حاجة حاول تتخلص من الحكم الداخلي على الكلام أو الشخص بناء على الدين أو العرق أو الجنس، لأن أي حد لما بيحب يحكي حاجة ميحبش المستمع يبقى مصنفه في شريحة معينة أو يوصمه بوصمة ما، دا غير أن حكمك ممكن يكون خاطيء بنسبة كبيرة وحتى لو صحيح فهو في مش هيفيدك في الاستماع.
التركيز على الكلام
لما حد بيتكلم معاك حتى لو على التليفون، نبرة الصوت نفسها بتقولك هو مبسوط ولا متضايق ولا بيضحك.
في شغل المبيعات، بيطلبو من الموظفين أنهم لو هيتكلموا مع العميل في التليفون لازم يكونوا مبتسمين وهم بيتكلموا لأن العميل هيحس من نبرة الصوت أن اللي بيتكلم معاه أسلوبه لطيف وهو بيكلمه.
في دراسة بتقول إن احنا لما بنتواصل مع بعض بالكلام، بناخد انطباعنا من تعبيرات الوجه بنسبة 20% والكلام نفسه بيمثل 30% ونبرة الصوت اللي بيتقال بيها الكلام عليها نسبة 50% يعني بتعبر أكتر عن حالة المتكلم.
وأنت بتسمع ركز على نبرة الصوت وانفعالات المتكلم وتعبيرات وجهه وخاصة العينين، وهل في كلام معين كان صعب عليه يقوله أو حس بالارتباك أو السعادة وهو بيقول حاجة معينة.
